TVTSVMC 31
1 Yehowa rueq tvkhup wungx kuy tvkoc mnoz kox nuex ngaz httuiuc kaz raungx;
ngaz kuex mkaq muinz nauk tvsumx rumx vkueq.
Mnoz kuex tsuingrux Tishox rvtoq;
ngaz kuex palc wvnc koq, ngaz rueq thoz vphaungx!
2 Ngaz rueq thoz vphaungx kvjaz
kuex tay kuq koq! Majuiuc dvyx palc wvnc koq!
Ngvy tvkhup wungx tvkoc ngvy kvwungx juing muex yaungx kuiuz;
ngaz palc wvnc tvkoc ngvy kvgawx juing muex yaungx kuiuz.
3 Mnoz kuex ngvy kvwungx juing nuiyc ngvy kvtuing juing rvtoq;
mnoz rueq bomkhvmc taq toq rulc rv-ngvlc
ngaz kuex shunshvlx vtueq lvmx tvkhic koq.
4 Ngvy tvkoc vtsvnc bix kvwawc tvdung wvnc koq;
vhiz juing wawc ngaz kuex tvkhup wungx kuq koq.
5 Mnoz rueq lawc mawc vphux kejux nuex ngvy shauk pumz kuex
ngaz rueq lekuq vphaungx.
Yehowa lex, mnoz rueq ngaz kuex palc wvnc phux;
mnoz kuex tvmtuing vhttax Tishox rvtoq.Ref 31:5 Luk 23:46
6 Vrot vkaq tishox htenc muex
nawk palx jix kuex mnoz rueq shuiuc vshuiux,
yuq muinz ngaz kuex mnoz muex tvluimc vphaungx.
7 Mnoz phaungx ngaungx yaq lung-wawc thuinz ningkhvnc nuex
ngaz thuinhvlx vtueq kokez vtaungx.
Ngaz jamjaux vtaungx kuex mnoz rueq khiz kuq vphux;
ngaz kuilc daz vtaungx kvmuinz mnoz rueq tuiuz yaq.
8 Ralx htenc rueq ngaz lvp wvnc muex mnoz rueq lekuq vphux rvmuq;
ngaz kaz roc taungx baung nuex tamx shuex tamx khuemc
shamc muex mnoz rueq tvhungx kuq phux.
9 Ngaz kuilc daz rvhumc vtaungx ningkhvnc nuex
Yehowa lex, ngaz muex menjenc kuq koq;
vkhoarc htuiz rueq ngvy muik phuingx kaz,
ngaz kuex vsuing pinhtumc hunnyex tauk.
10 Thuinz bac ningkhvnc nuex ngvy hungc nulx vtueq rvyuiuq bvt vtaungx,
vkhoarc vnyerc rueq ngvy rullungx kuex tvtut gay yaq.
Ngaz kuilc daz vtaungx lvmz lotlaz rueq ngvy hungc vlaungc yomx vtaungx,
ngvy ruk vrawz htenc nuex httuiuc laz nyvmc wvnc vshuex.
11 Ngvy ralx htenc lotlaz htauk nuex, jvnc vtueq yuimx phic wuinz
rueq ngaz kuex wvlc guez tvyaungx yaq;
ngaz tuiuz yaq jix htenc muinz ngaz muex hiz wuez vtueq,
tsuingshiq rueq ngaz kuex lvmx nuex khiz ruiux muinz;
tsuingshiq vyuz rvwvnc wuez yaq.
12 Ngaz kuex vthueyc kay wuez ikhoc miq htenc rueq ngaz kuex lauk gay phuex;
ngaz kuex vtuip vruez gay rv-nyet rvshet rulc rv-ngvlc dvyx shex.
13 Ralx hez paunghvlc rvshuip shuyx yaq kvjaz kuex ngaz rueq tay tauk;
kvhiz juing lotlaz rueq ngaz kuex tvroz tuimx wvnc phuex.
Tsuingshiq rueq ngaz kuex khawc lvlc lvmz rvjungc phvnc vtueq,
ngvy thvy gay tvkoc kvmungx wuez yaq.
14 Yuq muinz O Yehowa lex, ngaz kuex mnoz muex dvyx tvluimc vphaungx;
mnoz kuex ngvy Tishox rvtoq.
15 Ngaz kuex mkaq muinz m-yauk nuex httax yaq;
ngaz muex guirguenz yaq jix
nuiyc ngvy ralx hez yauk wawc ngaz kuex palc wvnc koq.
16 Mnvrc waz htauk nuex menjenc thuinz maq khiz kuq koq;
mnoz phaungx ngaungx yaq lungwawc thuinz maq ngaz kuex palc wvnc koq.
17 Yehowa lex, ngaz rueq mnoz gvl vphaungx;
ngaz muex yvlc svy nauk tvrv-humc vkueq.
Layx bac jix htenc kuex yvlc svy mrvhumc kueq,
tsuingshiq kuex wulumx mungx nuex kuiyqshuik maq mkaz wvnc kueq.
18 Vrot vkaq jix htenc ngamc boq vtueq thuinz tvyungx httax ruiux,
tsuingrux miqsaz lvmx kuex
wvlc guez waqguez jungc svy jix
lotlaz kuex tvsuingx gay shuiuz.
19 Mnoz muex tvtsanc nganc jix htenc tvkoc mnoz rueq vyoalc
taq vhvlx kejux htenc kuex pinhtumc vwangc juing mvnauz!
Mnoz mtanc lac hvlx vtuiux kvruex muinz
mnoz muex tvluimc yaq jix htenc kuex mtanc lac mnoz rueq
tvkhup wungx vshuiux kuex miq ruip rawx rueq tuiuz yaq.
20 Miq rueq kvmungx dvnc yaq wawc mnoz rueq tsuingshiq kuex
mkhaungkac wawc kvwungx juing baung nuex httuiyq taq ruiux;
tsuingshiq ralx htenc rueq yomnamc yaq wawc muinz
kvwungx baung nuex mnoz rueq
tsuingshiq kuex httuiyq taq koq.
21 Yehowa muex tvtsvmc wuez shuinz!
Ngaz tuimx vtueq khvt yaq nuex
ngaz muex vpiq lungwawc thuinz tvkhic kuq phuex kuex
pinhtumc vwangc juing mvnauz!
22 Ngaz kuex vpiq khaungkac wawc yurc gay phuex shex ngoz tueq
ngaz rvwvl vtueq hiyaz gay tauk.
Yuq muinz romc kuy tvkoc vpiq kuex ngaz gvl koq tueq,
ngaz rueq guyc sez thoz tauk kuex vpiq rueq tay tueq.
23 Vpiq muex tvmtuing httaz jix miq lotlaz lex, Yehowa muex lungwawx wuez shuinz.
Yehowa rueq tvmtuing miqsaz kuex tvkhup wungx kuq yaq,
yuq muinz ngamc ngax jix htenc kuex tsuingshiq rueq lvp aungx yaq rulc rv-ngvlc
murx tvgurc kuq yaq.
24 Yehowa muex thuinz tvluimc jix miq lotlaz lex,
hungc tvtsanc ruiux khvmc thuinz httax wuez kuinz.