TVTSVMC 32
1 Mvrax dawc kuy rvhumc vtueq, vyaq jix htenc mvrax wawc
dawc kuy rvhumc yaq jix htenc kuex thuinhvlx yaq.
2 Vyaq yauk shuimc wawc Yehowa rueq mvrax tvgurc rvhumc muq nuiyc,
vrot vkaq lvmx lotlaz wawc
dungc wvnc jix waz kuex thuinhvlx yaq.Ref 32:1-2 Rom 14:7-8
3 Ngvy mvrax htenc kuex ngaz max kvjungc nuex,
nuiyqtuimc khoarnyerx vtueq ngaz nyex vtaungx.
4 Yehowa lex, mnoz rueq ngaz muex raungnuiyq raungwvrx murx tvgurc phux;
raungluimc yac nuex vkalc rueq vhemz baung htenc wul wvnc yaq ikhoc,
ngvy hungc vlaungc muinz sawc ric htumx wvnc vtuex.
5 Kvkaq ngvy mvrax htenc kuex
mnoz muex kvjungc vphaungx;
ngaz rueq shuimx wvnc tauk vyaq htenc kuex duimx puiuc shaungx rvmuq.
Kvruex htenc kuex mnoz muex kvjungc tvkoc ngvy thuinz maq htvp htaz tauk,
ngvy mvrax lotlaz kuex mnoz rueq dawc kuq gay phux.
6 Kvkhoc rvtueq mnoz muex tvmtuing httaz yaq miqsaz lotlaz kuex
rax yaq vkhing nuex mnoz kox wawc vjux thoz aungx yaq;
vdaungx maq buk wvnc yaq yuix kuex tsuingshiq kox nuex httuiuc kaz tuex rvmuq.
7 Mnoz kuex ngvy kvwungx juing rvtueq;
mnoz rueq ngaz kuex kuilc daz mungx wawc palc wvnc phux.
Mnoz rueq ngaz muex tvkhup wungx kuq phux ningkhvnc nuex,
mnoz rueq palc wvnc phux lvmz kuex daungdaungx shix tvtsvmc shaungx.
8 Yehowa rueq, “Mnoz rueq phvnc juing lvmx ngaz rueq tvluing kuq phaungx,
ngaz rueq mnoz muex tharc jungx kuq ruiux shvlix lawx kuq phaungx.
9 Kvjaz tay tvkoc ruiuz pumz nuiyc ruiuz pvnc htenc maq nvrc
juing mvre nuiyc loze htenc ikhoc
vngaz muex nauk yaungx kaz,”
ngoz tueq jungx tueq.
10 Layx bac jix htenc kuex kuilc daz rvhumc tuex,
yuq muinz Yehowa muex tvluimc jix htenc kuex vpiq phaungx
ngaungx yaq lungwawc thuinz maq tvkhup wungx kuy rvhumc tueq.
11 Tsuingrux jix htenc lex, Yehowa rueq shuimc wvnc tueq shex
ningkhvnc nuex vshuenc vruenc maq kokez wuez kuinz.
Vpiq kvjaz tay jix htenc lex, vkoz vkez maq guyc wuez kuinz!