TVTSVMC 30
1 Yehowa lex, mnoz rueq ngaz palc wvnc phux,
ngvy ralx htenc rueq ngaz taungx gay phuex wawc
mnoz rueq ngaz tvkhup wungx wvnc phux ningkhvnc nuex
ngaz rueq mnoz muex tvtsvmc vphaungx.
2 O Yehowa ngvy Tishox lex, romc kuy tvkoc ngaz rueq
mnoz muex ramc vphaungx,
mnoz rueq ngvy thuiuz vsac vruex tvhvlc kuq koq;
3 mnoz rueq ngaz kuex ruiuz khux wawc tvguing wvnc phux.
Ngaz kuex wulumx mungx nuex kaz wvnc yaq wawc,
mnoz rueq ngvy rullungx kuex tvguing wvnc phux.
4 Vpiq tvmtuing miqsaz lotlaz lex,
Yehowa muex tvtsvmc shix wuez shuinz!
Vsawc Waz rueq shuimx wvnc tueq kuex rvwvl vtueq,
vpiq muex kejux vyungx ngoz wuez shuinz!
5 Vpiq thuinkhvy kuex vlox dvyx rvtueq,
vpiq vhvlx lvmx kuex rullungx wvlex tvkoc rvtueq.
Raungwvrx nuex muik phic svrc ruiux muinz,
raungnvp raungwuic wvnc ruiux yuq kokez thuinz hvlc juing lvp yaq.
6 Miqmac nuex kvwungx juing vhttax ngoz tueq kvmx vtueq,
“Ngaz kuex mkaq muinz sum-rumx wvnc taungx rvmuq,”
ngoz tueq kv-ngoc vtaungx.
7 Yehowa lex, mnoz rueq ngaz muex vhvlx kejux kuq phux shex;
kankhux nuex vtec nolaungx ghaqshungc vshiz ikhoc
ngaz muex tvkhup wungx kuq phux.
Yuq muinz mnoz rueq ngvy kox wawc htvlx phawc phel wvnc toq nuex,
ngaz kuex vhiz vsungx rvhumc tauk.
8 Yehowa lex, ngaz rueq mnoz gvl vphaungx;
mnoz rueq romc kuy tvkoc ngaz rueq thoz vphaungx:
9 “Ngaz thueyc kaz ruiux yuq mnoz rueq yvmx vjux lac lvp wvnc shuiux?
Luip ruiuz khux nuex ngaz kaz wvnc ruiux yuq yvmx vlap lac lvp shuiux?
Vthueyc kay wuez jix rueq mnoz muex tvtsvmc lot yaq haz?
Tsuingshiq rueq mnoz vhvlx lvmx kuex tvkhic jungx kuq lot yaq haz?
10 Yehowa lex, ngaz muex tay kuq vtueq menjenc kuq koq!
Yehowa lex, ngaz muex romc kuq koq!”
11 Mnoz rueq ngaz yonzyex vtaungx kuex vkoz vkez dawk dat vtueq layc gay toq;
ngvy yonzyec kuex mnoz rueq lvmz gay ruiux,
vkoz vkez maq ngaz kuex tvroz komc taq shec phux.
12 Kvkhoc rvtueq ngaz kuex kuiyq-shuik maq dvyx httax taungx rvmuq;
ngaz rueq mnoz tvtsvmc shic shix taungx.
Yehowa lex, mnoz kuex ngvy Tishox rvtoq,
ngaz rueq mnoz muex pattup kejux vyungx ngoz phaungx.