19
Ammon Mi le Siria Mi An Tei Hna
(2Sam 10.1-19)
1 Cun hi hnuah hin Ammon mi hna siangpahrang Nahash kha a thi i a fapa kha amah hmun ah khan a bawi.
2 Cun David nih a thawh i, “Nahash fapa Hanun hi a pa nih ka cungah zumhawktlak tein a rak um caah khan a cungah zumhawktlak tein ka um ve lai,” tiah a ti. Cucaah David nih a pa kong ah khan amah cu va hnemh awkah lamkal a hei thlah hna. Cun David sinum hna cu Hanun sin kha Ammon mi hna ram chungah cun, amah cu va hnemh awkah, an va phan.
3 Sihmanhsehlaw Ammon mi bawi hna nih khan Hanun cu an thawh i, “David nih nangmah sinah hnemtu a hun thlah hna caah hin na pa kha a upat tiin maw na ruah? A sinum hna nih hin kan ram hi thlokdah awk le tei awk le ngiatthlai awkah na sinah an ra ko lo mei?” tiah an ti.
4 Cucaah Hanun nih David sinum hna cu an khahmul a meh hna i an khelbo zawn ah an puan cu a laifang in a tan hna i a kalter hna i an kal.
5 Cun David cu mi hna kong kha an chimh tikah, anmah don awkah mi a hei thlah hna, zeitintiah annih cu an ning a zak ngaingai ko. Cun siangpahrang nih cun, “Nan khahmul a corh òhan hlantiang Jeriko khua ah cam ko u, cun nan ra kir òhan te lai,” tiah a ti hna.
6 Ammon mi hna nih annih cu David huat kan phor cang ti kha an theih tikah, Hanun le Ammon mi hna nih khan Mesopotamia le Aram-maakah le Zobah ram in rangleng hna le rangcung ralkap hna hlan awkah ngun talen 1-000 an kuat hna.
7 Rangleng 32-000 le Maakah siangpahrang le a ralkapbu, cu an hlan hna i Medeba hmaiah khan an riak. Cun Ammon mi hna cu an khua cio khan an pumh hna i raldohnak hmun ah khan an ra.
8 Mah cucu David nih a theih tikah Joab le a òhawngmi ralkapbu vialte kha a thlah hna.
9 Cun Ammon mi hna cu an ra chuak i khua luhnak ah khan raldoh awkah an i tiang i siangpahrang a rami hna cu anmah tein ramlak ah cun an um ve.
10 Joab nih hmailei he hnulei he an ka tuk lai ti kha a hmuh tikah, Israel mi chungin thim khunmi kha a thim hna i Siria mi dohtu dingah khan a ningcang tein òanhmun a khuarter hna;
11 cun a taang rihmi a mi hna cu a unau Abishai kut tangah a chiah hna i Ammon mi hna dohtu dingah khan a ningcang tein òanhmun a khuarter hna.
12 Cun anih nih, “Siria mi hi ka caah an òhawn tuk ahcun na ka bawmh lai, sihmanhsehlaw Ammon mi hna kha na caah an òhawn tuk ah cun kan bawmh ve lai.
13 Ralòha ngaiin um tuah, kan mi hna le kan Pathian khua hna caah hin pasal si u sih; cun Bawipa nih a òha a tining paoh in tuah ko seh,” tiah a ti.
14 Cucaah Joab le a sin i a ummi hna nih cun tuk awkah Siria mi cu an hei fuh hna i an hmaiah cun an zaam.
15 Cun Ammon mi hna nih Siria mi an zam ti kha an hmuh tikah annih zong, cu bantukin Joab unau Abishai hmai khan an zam ve i khua chungah khan an lut. Cun Joab cu Jerusalem ah a tlung.
16 Sihmanhsehlaw Siria mi hna nih Israel mi nih an kan tei ti kha an hmuh tikah, lamkaltu an thlah hna i Zufrates tiva ral ah a ummi Siria mi hna, Hadadezer ralkapbu ralbawi Shofak nih a hruimi hna kha an hun chuahpi hna.
17 Mah cucu David kha an chimh tikah Israel mi vialte kha hmunkhat ah a pumh hna i Jordan tiva kha an tan i an sin cu an phan i annih cu tuk awkah a ralkap cu a sersiam hna. Cun David nih Siria mi cu a tuk tik hna ah annih zong nih an tuk ve.
18 Cun Siria mi cu Israel mi hna hmai in an zam; cun David nih Siria mi hna chung khan rangleng 7-000 aa citmi hna le ke ralkap 40-000 a thah hna i an ralkapbu ralbawi Shofak zong kha a thah.
19 Cun Hadadezer sal hna nih khan Israel mi nih an tei ti kha an hmuh tikah, David he cun remnak an ser i a kut tangmi ah an cang. Cucaah Siria mi nih Ammon mi kha bawmh an duh ti hna lo.