18
David Nih A Pennak A Kauhter
(2Sam 8.1-14)
1 Cun mah hnuah cun David nih Filistin mi kha a tei hna i a tangchiah hna i Filistin mi hna kut chung cun Gath le a khuate hna kha a lak hna.
2 Cun Moab kha a tei, Moab mi hna cu David sal ah an cang i ngunkhuai an pek.
3 David nih Zufrates tiva i a lungphun bunh awk i a kalpah ah Hamath lei i a ummi Zobah siangpahrang Hadadezer zong kha a tei.
4 Cun David nih amah sin khan rangleng 1-000, rangcung ralkap 7-000, le ke ralkap 20-000 a tlaih hna i David nih leng hnuktu rang vialte kha an tha a pheh dih hna, sihmanhsehlaw rangleng 100 ca i a za ding lawnglawng kha a nganh hna.
5 Cun Damaskas khuami Siria mi nih khan Zobah siangpahrang Hadadezer kha bawmh awkah an rat tikah, David nih khan Siria mi cu 22-000 a rak thah hna.
6 Cun David nih Damaskas i Siria ah khan ralvengtu ralkapbu a chiah hna i Siria mi cu David sal ah an cang i ngunkhuai kha an pek. Cun Bawipa nih David cu a kalnak kip ah khan teinak a pek lengmang.
7 Cun Hadadezer sinum hna nih an i putmi sui phaw kha David nih a lak hna i Jerusalem ah a rak phorh hna.
8 Cun Hadadezer khua a simi Tibaath le Kun in David nih dar tampi a lak; mah cu cun Solomon nih khan dar hmaihum kha le tungpi hna kha le dar umkheng hna kha a ser hna. Ref 18.8: 1Sia 7.40-47; 2Cha 4.11-18
9 Hamath siangpahrang Tou nih, Zobah siangpahrang Hadadezer ralkapbu kha David nih a ning piin a tei dih hna ti kha a theih tikah.
10 Hadadezer kha a doh i a tei caah amah cu va biakchawnh awk le va conglawmh awkah Siangpahrang David sinah khan a fapa Hadoram kha a hei thlah; zeitintiah Hadadezer nih khan Tou kha a rak doh lengmang tawn. Cun amah nih cun sui in sermi thilri a phunphun, ngun in sermi a phunphun le dar in sermi a phunphun kha a kuat;
11 mah thil hna zong cu Siangpahrang David nih a teimi miphun vialte hna, Edom, Moab, Ammon mi hna, Filistin mi hna le Amalek sinin lakmi sui le ngun hna he khan hmunkhat ah Bawipa sinah a pekchanh hna.
12 Cun Zeruiah fapa Abishai nih khan Cite Nelrawn ah Edom mi 18-000 a thah hna. Ref 18.12: Slm 60 (A tlangpi)
13 Cun Edom ram chungah ralvengtu ralkapbu kha a chiah hna i Edom mi vialte cu David sal ah an cang. Cun Bawipa nih David cu a kalnak kip ah teinak a pek lengmang.
David Bawi Hna
(2Sam 8.15-18; 20.23-26)
14 Cucaah David nih Israel mi vialte cu a pen hna i a mi vialte cu biading le ruannak in a uk hna.
15 Cun Zeruiah fapa Joab cu ralkapbu haotu bik a si i Ahilud fapa Jehoshafat cu cazin òialtu a si;
16 cun Ahitub fapa Zadok le Abiathar fapa Ahimelek cu tlangbawi an si; cun Shavsha cu caòialtu a si;
17 cun Jehoiada fapa Benaiah cu Khereth mi le Peleth mi hna cung i haotu a si i David fapa hna cu siangpahrang rian ah khuakhangtu upa bik an si.