1 A donghnak ah, u le nau hna, Bawipa ah cun i lawm ko u. Ka òial ciami nolh òhan nih hin a ka simh lem lo; nan caah himnak a si.

2 Uico hna khan i ralring u, thil òha lo a tuahmi hna zong khan i ralring u, cuarpartan a biapittermi hna zong khan i ralring u. 3 Kannih, Pathian Thlarau thawngin Pathian a biami le Khrih Jesuh ah aa sunsakmi le thisa ah aa hngalsak lomi hi cuarpar aa tan taktakmi cu kan si. 4 Ka duh ahcun kei zong hi thisa thil hngalsak awk ka ngei ve ko hnga. Lenglei thil ah hngalsak awk ka ngei a timi an um ahcun keimah nih ka ngeih deuh. 5 Ni riat ni ah cuarpar tanmi, Israel phun, Benjamin hrin, Hebru chungchuak, phung leiin Farasi ka si; 6 phung òanh ruangah Khrihfabu hremtu ka si i phung zulh leiah sawi awk um lo ka si fawn. 7 Sihmanhsehlaw cu bantuk thil ka caah miaknak hna cu Khrih ruangah sungh ah ka rel cang. 8 Ka Bawipa Khrih Jesuh hngalh ruangah cun zeizong vialte sungh dih hi a phu taktak ah ka ruah. 9 Phung zulhnak in keimah dinnak ka ngei ti lo; sihmanhsehlaw ka ngeihmi cu Khrih zumhnak thawngin zumhnak ah aa hngatmi Pathian sinin a rami dinnak a si. 10 Cuticun amah le a thawhòhannak huham cu ka hngalh lai i a temhinnak cu kaa hrawm lai i a thihnak ah ka thi ve lai. Cun, a si khawh ahcun, 11 Mithi thawhternak ah cun thawhter ka si ve nakhnga zong kaa ruahchan.

12 Hihi ka hmuh cang ka ti lo i ka tlinh cang ti zong ka ti fawn lo; Khrih nih amah ta ah a ka ser bantukin ka ta a si ve khawh nakhnga hmailei tu ah ka fong chin lengmang. 13 U le nau hna, keimah tein ka tlinh cang ka ti hin lo, sihmanhsehlaw thil pakhat ka tuahmi cu, hnulei thil kha philh in hmailei thil tu kha ka hei banh. 14 Cucaah Khrih Jesuh ah Pathian auhnak lawmhman laksawng nunnak cu hmuh awkin tinhmi kawltung leiah cun ka tli lengmang. 15 Cucaah kannih patling hna nih cun cu bantuk lungput cu ngei u sih. Ruahning dang a ngeimi nan um zongah Pathian nih nan caah a fianter ko lai. 16 A zeikhum a si ah, kan phanh cangmi bel te ah him tein um ko u sih.

17 U le nau hna, ka nawl ka cawng ko u. Zohchunh awk nan ngeih cang bangin, cu bantukin a nungmi hna cu i ngiat hna u. 18 An nuncanning ah Khrih vailam ral tampi an um ti kan chimh tawn ko hna; atu zong mitthli he kan chimh òhan hna. 19 An dih donghnak cu rawhralnak a si; an paw kha Pathian ah an i ser. Vawlei thil ah an lungthin an phum. 20 Ningzah awk kha an i hngalsak. Sihmanhsehlaw kannih kan khuaram cu van ah a si. 21 Cuka cun Khamhtu Bawipa Jesuh Khrih a rat lai kha kan hngak. A huham in zeizong vialte amah nawlngeihnak tangah a chia khotu nih cun santlailo kan pumsa hi a liannganmi amah pumsa bantuk ah a thlen te lai.