34
1 Bawipa nih Moses cu,
2 “Israel mi cu nawl pe hna law, hi bangin chim hna, Kanaan ram ah nan luh tikah (mah ram hi nan co awk hnga ram cu a si, Kanaan ram hi a ning piin),
3 nan thlanglei kam cu Zin ramlak in Edom kam hrawn in a si lai i, thlanglei nan ramri cu nichuahlei ah Cite Rili donghnak in a si lai;
4 cun nan ramri cu Akrabbim hung kainak thlanglei ah khan aa mer lai i Zin tiang a phan lai i a donghnak cu Kadesh-barnea thlanglei ah a si lai; cun Hazar-addar ah a hei kal lai i Azmon tiang a lan lai;
5 cun ramri cu Azmon in Izipt Tiva tiang aa mer lai i a donghnak cu Rili ah a si lai.
6 “Nitlaklei ramri caah cun Rili Ngan le a kam kha nan tin lai; mah cucu nitlaklei nan ramri a si lai.
7 “Mah hihi chaklei nan ramri cu a si lai: Rili Ngan in Hor Tlang tiang nan rin lai;
8 Hor Tlang in Hamath luhnak tiang nan rin lai i ramri a donghnak cu Zedad ah a si lai;
9 cun ramri cu Zifron tiangin a hei kal rih lai i a donghnak cu Hazar-enan ah a si lai; mah hihi chaklei nan ramri a si lai.
10 “Nichuahlei nan ramri cu Hazar-enan in Shepham tiang nan rin lai.
11 Ramri cu Shepham in Ain nichuahlei i a ummi Riblah tiang a vung kal lai; ramri cu a vung kal lai i nichuahlei ah Khinnereth rili a liang tiang a vung phan lai;
12 cun ramri cu Jordan tiang a vung kal lai i a donghnak cu Cite Rili ah a si lai. Mah hihi nan ram le a velchum dihlak in a ramri cu an si lai,” tiah a ti.
13 Moses nih Israel mi cu nawl a pek hna i, “Mah hihi nannih nih camcawh fung khiah in nan co hnga mi, Bawipa nih phun kua le phun cheu hna sinah pek awk i nawl pekmi ram cu a si; Ref 34.13-15: Jos 14.1-5
14 zeitintiah Reuben fapa hna phun nih an chung ning cio ah, cun Gad fapa hna phun nih an chung ning cio in vo an co cang i Manasseh phun cheu zong nih an co ve cang;
15 phun hnih le phun cheu hna nih khan Jordan tiva ral, Jeriko zawn, nichuahlei ah khan an vo an co cang, nichuahnak lei kamah khan,” tiah a ti.
16 Bawipa nih Moses cu a chawnh i,
17 “Mah hna hi nan co awkah ram an phawtu hna an min cu a si lai: tlangbawi Eleazar le Nun fapa Joshua.
18 Ram cu co awk i a phawtu ah phun khat in hruaitu pakhat na lak lai.
19 Mah hihi an min cu a si: Judah phun in Jefunneh fapa Kaleb.
20 Simeon fapa hna phun in Ammihud fapa Shemuel.
21 Benjamin phun in Khislon fapa Elidad.
22 Dan fapa hna phun in hruaitu pakhat, Jogli fapa Bukki.
23 Josef fapa hna chungin: Manasseh fapa hna phun in hruaitu pakhat Efod fapa Hanniel.
24 Cun Efraim fapa hna phun in hruaitu pakhat Shiftan fapa Kemuel
25 Zebulun fapa hna phun in hruaitu pakhat Parnak fapa Elizafan.
26 Issakhar fapa hna phun in hruaitu pakhat, Azzan fapa Paltiel.
27 Asher fapa hna phun in hruaitu pakhat, Shelomi fapa Ahihud.
28 Naftali fapa hna phun in hruaitu pakhat, Ammihud fapa Pedahel.
29 Mah hna hi Kanaan ram chungah Israel mi nih an covo a phawtu dingah Bawipa nih nawl a pekmi hna cu an si,” tiah a ti.