35
Levi Mi Hna Covo
1 Bawipa nih Moses cu Moab nelrawn Jordan tiva kam Jeriko zawn ah khan a chawnh i, Ref 35.1-8: Jos 21.1-42
2 “Israel mi cu nawl pe hna law, an comi ram chungin Levi mi cu umnak khua pe hna seh; cun Levi mi hna cu khua velchum i phong ram cu nan pek hna lai.
3 Khua cu annih umnak caah an si lai i an phong ram hna cu an caw le an òilva le an saòil vialte caah an si lai.
4 Levi mi hna sinah nan pek laimi khua i an phong ram hna cu khua kulhnak hau in dong 1-000 a velchum in an phan lai.
5 Cun khua lengah cun nichuahlei kamah dong 2-000, thlanglei kamah dong 2-000, nitlaklei kamah dong 2-000, chaklei kamah dong 2-000 nan tah lai i khua cu a laifang ah a um lai; mah hihi an khua hna ca i phong ram caah an ta a si lai.
6 Levi mi nan pekmi hna khua cu himnak khua paruk kha an si lai, cuka ah cun mi that paoh zamnak nan awnh hna lai, cun cu hna hleiah khua 42 nan pek hna lai.
7 Levi mi nan pekmi khua vialte hna cu 48, an phong ram cio he, an si lai.
8 Cun Israel mi hna ngeihmi chungin nan pek laimi khua hna cu, phun ngan deuh in tam deuh nan lak lai i phun hme deuh in tlawm deuh nan lak lai; anmah le an covo a tlawm a tam ningin an khua hna cu Levi mi sinah an pek cio hna lai,” tiah a ti.
Himnak Khua Hna
9 Cun Bawipa nih Moses cu a chawnh i,
10 “Israel mi cu hi bangin chim tuah hna, Jordan tiva nan tan i Kanaan ram nan luh tikah,
11 timhnak ngei loin mi a thatmi paoh nih an zamnak dingah nannih caah himnak khua caah khua nan i thim lai.
12 Biaceih awkah mibu hmaiah a dir hlanah mithattu cu a thih nakhnga lo, cu khua hna cu nannih caah phuhlamtu sinin himnak an si lai.
13 Cun nan pekmi khua hna cu nan himnak khua paruk an si lai.
14 Himnak khua caah Jordan tiva ral ah khua pathum, Kanaan ram chungah khua pathum nan pek lai.
15 Hi khua paruk hna hi Israel mi ca le phun dangmi le an sinah a pemmi khual hna caah an si lai, timhnak ngei loin mi a thatmi paoh nih cuka ah an zam khawh nakhnga.
16 “Sihmanhsehlaw thir hriamnam in a tuk i a thih ahcun, amah cu lainawng a si; lainawng cu thah awk a si lai.
17 Cun minung a that khomi lung aa putmi in a den i a thih ahcun amah cu lainawng a si; lainawng cu thah awk a si lai.
18 Asiloah minung a that khomi thing hriamnam aa putmi in a tuk i a thih ahcun, amah cu lainawng a si; lainawng cu thah awk a si lai.
19 Thisen phuhlamtu amah theng nih lainawngmi cu a thah lai; a ton tikah a thah lai.
20 Cun huatnak ruangah a nam ah siseh, a bawh i a cheh ah siseh, a thih ahcun,
21 cun ralnak ruangah a kut in a thongh i a thih ahcun, a thongtu cu thah a si lai; amah cu lainawng a si; thisen phuhlamtu nih lainawng cu a thah lai, a ton tikah.
22 “Sihmanhsehlaw huatnak um loin a nam sual ah siseh, bawh loin a cheh sual ah siseh,
23 a ral a si lo i a òhat lonak a kawl lo nain mi thih khawhnak lung a hman i hmuh loin amah cu a thlakhnawh i a thih ah siseh,
24 cu tikah mi thatpa le thisen phuhlamtu karlak ah cun, hi phunglam hna ning hin, mibu nih bia an ceih lai;
25 cun mibu nih cun mi thattu cu thisen phuhlamtu kut chungin an khamh lai i, mibu nih cun a zamnak khua himnak khua ah khan an kirter òhan lai i, a thiangmi chiti thuhmi tlangbawi ngan kha a thih hlantiang cu ka ah cun a um lai.
26 Sihmanhsehlaw mi thattu kha zeitik caan hmanh ah a zamnak himnak khua ramri lengah khan a chuah i
27 cu a himnak khua ramri lengah cun thisen phuhlamtu nih khan a hmuh i mi thattu cu thisen phuhlamtu nih khan a thah ahcun, amah cungah thisen mawhnak a um lai lo.
28 Zeitintiah cu pa cu a himnak khua ah cun tlangbawi ngan kha a thih hlantiang um awk a herh; sihmanhsehlaw tlangbawi ngan a thih hnuah cun mi thattu kha amah ram ah a kir kho lai.
Hngaltu Hna Caah le Tlanhnak Phung
29 “Cun mah thil hna hi nan caah nan tefa chin tiangin nan umnak kip ah nawlbia le phunglam an si lai.
30 Mi pakhatkhat nih mi a thah ahcun lainawngtu cu hngaltu hna chimmi bia ningin thah a si lai; sihmanhsehlaw hngaltu pakhat lawng chimmi bia cu thah awk biakhiahnak caah a za lo. Ref 35.30: Deu 17.6, 19.15
31 Cu hleiah thih awk a tlakmi lainawngtu caah cun tlanh man zeihmanh nan cohlang lai lo; amah cu thah awk a si ko.
32 Cun a himnak khua ah a zam i amah ram chung i um awkah kir a duhmi caah, tlangbawi ngan a thih hlanah cun, tlanh man zeihmanh nan cohlang lai lo.
33 Cu bantukin nan umnak ram cu nan thurhhnawmh lai lo, zeitintiah thi nih ram cu a thurhnawmter i cu thi a chuahtertu thi lila dah ti lo nih cun, cu ram chung thletmi thi caah tlenghnak a tuah khotu zeihmanh a um lo.
34 Nan umnak ram, ka umnak hi nan thurhnawmter lai lo; zeitintiah Bawipa keimah cu Israel mi lakah ka um,” tiah a ti.