10
(Mat 19:1-12; Luk 16:18)
1 Cuka cun a chuak i Judah ram le Jordan ral ah a kal; mi tampi nih a but in an but hnawh òhan i a ti tawn bantuk khan a cawnpiak hna.
2 Farasi mi an ra i hneksak duh ah, “Mi nih nupi mak hi a phung a si maw?” tiah an hal.
3 A thawh hna i “Moses nih zei phung dah an pek hna?” a ti.
4 Annih nih, “Òhennak ca pek in mak cu Moses nih a awnh ko,” an ti.
5 Jesuh nih, “Moses nih cu nawlbia a òial cu nan lung a khawn tuk ruangah a si.
6 Sihmanhsehlaw vawlei ser hramthawk in, ‘Pathian nih nu le pa a ser hna.
7 Cucaah pa nih a nu le a pa a kaltak hna lai i a nupi he an um òi lai.
8 An pahnih cun thisa khat an si cang lai.’ Cuticun pahnih an si ti lo, pakhat an si cang.
9 Cucaah Pathian nih a fonhmi hna cu ahohmanh nih òhen hna hlah seh,” a ti hna.
10 Cu kong cu a hnuzul hna nih inn ah an hal òhan. Hitihin a ti hna,
11 “Nupi a ma i nu dang a òhimi cu òangdangpom sualnak a tuah a si;
12 nu zong a va a kirtak i midang a vat ahcun òangdangpom sualnak a tuah a si ve,” a ti.
(Mat 19:13-15; Luk 18:15-17)
13 A kut in tawngh awkah ngakchia kha a sinah an ratpi hna. A hnuzul hna tu nih cun an rak sik hna.
14 Sihmanhsehlaw Jesuh nih a hmuh tikah a thin a hung i, “Ngakchia hna kha ka sinah ra ko hna seh, dawn hna hlah u, zeitintiah Pathian pennak cu mah hna bantuk ta kha a si.
15 Biangai tein ka chim, Pathian pennak cu ngakchia bantukin a cohlang lomi cu ahohmanh a chungah an lut kho lai lo,” a ti.
16 A pom hna i an cungah kut chuan in thluachuahnak a pek hna.
(Mat 19:16-39; Luk 18:18-30)
17 Khualtlawn awk i a thawh ah khan mi pakhat a ra le i a hmai ah a khuk a bil i, “Cawnpiaktu òha, nuncanghmunhnak co awkah zeidah ka tuah lai?” a ti.
18 Jesuh nih, “Zeicahdah miòha na ka ti. Ahohmanh miòha an um lo. Pathian lawng a òha.
19 Nawlbia cu na hngalh ko òung: ‘Lai va nawng hlah, òangdangpom hlah, fir hlah, a dik loin mi va rawiphiar hlah, mi va hleng hna hlah, na nu le na pa va upat hna,’ ti an si,” a ti.
20 Anih nih, “Cawnpiaktu, cu vialte cu ka no lio tein ka zulh cang hna,” a ti.
21 Jesuh nih a hun zoh i a lung a ton ngai i, “Pakhat te na bau. Va kal law na ngeihmi vialte va zuar dih law misifak va pe hna; vancung ah chawhlawn na ngei lai, cun ra law ra ka zul,” a ti.
22 Cu bia a theih tikah a hmai a chia i ngaihchia ngai in a kal, zeitintiah chaw tampi a ngeimi a si.
23 Jesuh nih a hun zoh duahmah hna i a hnuzul hna kha, “Mirum hna caah cun Pathian pennak luh cu a va har dah!” a ti.
24 A hnuzul hna cu a chimmi ruangah cun an khuaruah a har. Sihmanhsehlaw Jesuh nih, “Fale hna, Pathian pennak luh hi a har dahkaw!
25 Mirum mi hna Pathian pennak i luh nakcun kalauk òhimka i luh hmanh a fawi deuh hnga,” a ti hna.
26 A hnuzul hna cu an ar ko. “Cuti a si ah ahodah khamh a si kho kun hnga? an ti.
27 Jesuh nih a zoh hna i, “Minung caah cun a si kho lo, sihmanhsehlaw Pathian caah cun cuticun a si lo; zeitintiah Pathian caah cun zeipaoh a si kho ko,” a ti hna.
28 Peter nih, “Zohhmanh, kannih nih cun zeizong kaltak in pei kan in zulh hi,” a hun ti.
29 Jesuh nih hitihin a leh, “Biangaite kan chimh hna, ahopaoh keimah le thawngòha bia ruangah inn siseh, lo siseh, unau siseh, farle siseh, pale siseh, nule siseh, fale si seh a kaltakmi cu,
30 atu nun chung lila ah hin a let za in inn he unau he far he pa he nu he fa he a lo he a hmu lomi an um lai lo; cun a ra laimi chan ah nuncanghmunhnak zong an hmuh fawn lai.
31 Sihmanhsehlaw a hmasami tampi cu an hmanung lai i a hmanung kha an hmasa lai,” a ti hna.
(Mat 20:17-19; Luk 18:31-34)
32 Jerusalem i an hun ah khan Jesuh cu hmaiah a kal i an khuaruah a har; a hun zulmi hna kha an ning a òi. Hleihnih hna kha a dang deuhah a kalpi òhan hna i a cungah a tlung laimi vialte kha a chimh hna.
33 “Ngai hmanh u, Jerusalem ah kan hung lai i Mi Fapa cu tlangbawi upa hna le phung cawnpiaktu hna kut ah chanh a si lai, thah dingin a cungah bia an ceih lai i Jentail hna kut ah an chanh lai.
34 Cu hna nih cun an rak cawhdeh lai, cil an chak lai, fung in an tuk lai i an thah lai; sihmanhsehlaw ni thum hnuah a tho òhan lai,” a ti.
(Mat 20:21-28)
35 Zebedi fapa Jeim le Johan nih an hun fuh i, “Cawnpiaktu, kan in halmi paoh kan tuahpiak law kan duh,” an ti.
36 Anih nih, “Zeidah in tuahpiak hna ning law nan duh? tiah a hal hna.
37 An thawh i, “Na sunparnak ah cun pakhat na orhlei ah pakhat na kehleiah kan òhutter te,” an ti.
38 Sihmanhsehlaw Jesuh nih, “Nan halmi hi nan hngal lo. Ka din laimi hrai cu nan din khawh lai maw? Ka in hngami baptisma zong nan in khawh lai maw?” a ti hna.
39 Annih nih “Kan ti khawh lai,” an ti. Cun Jesuh nih a thawh hna i, “Ka din hngami hrai hi nan din khawh ko hnga; ka in laimi Baptisma zong nan in khawh ko hnga;
40 sihmanhsehlaw ka orhlei le ka kehlei i òhutter cu keimah nawl a si lo, an ca i timhpiak a simi hna caah a si,” a ti.
41 Cu kong cu a dang pahra hna nih an theih tikah Jeim le Johan hna cungah cun an thin a hung.
42 Jesuh nih a auh hna i, “Jentail mi hna uktu nih cun an michia hna cu a lal in an lal hnawh tawn hna i an mingan hna nih cun fek ngai in nawl an pek hna ti cu nan hngalh.
43 Nannih cu cuticun nan si lai lo. Nan lak i mingan si a duhmi cu nan miòhi a si lai.
44 Nan lak i san bik a duhmi cu zapi sal a si awk a si.
45 Mi Fapa zong hi rianh awkah a ra lo i mi riantu le mi tampi tlanh awkah a nunnak pek awk tuah a ra deuh,” a ti hna.
(Mat 20:29-34; Luk 18:35-43)
46 Jeriko khua an phan. A hnuzul hna le mi runpi hna he Jeriko in an chuah òhan ah khan Timeas fapa, mitcaw awkhlawh Bartimu cu lam kamah a rak òhu ko.
47 Nazareth Jesuh a si ti a theih tikah, “Jesuh, David Fapa, ka zaangfah ko,” tiah fakpi in a au. Mi tampi nih an caak i dai ko, an ti;
48 asinain a au chinchin i, “David Fapa, ka zaangfah ko,” a ti.
49 Jesuh cu a dir i, “Hei au u,” a ti hna. Mitcaw cu an hei auh i, “Na tha chia hlah, tho, an auh hih,” an ti.
50 A puan a hlonhtak i Jesuh sinah cun a va pet.
51 Jesuh nih, “Zeidah in tuahpiak ning law na duh,” a ti. Mitcaw nih cun, “Cawnpiaktu, khua hmuh òhan ka duh,” a ti.
52 Jesuh nih, “Va kal, na zumhnak nih an damter,” a ti. Chikkhatte ah khua a hmu òhan i Jesuh cu a zulh colh.