14
1 “Nan lungre thei hlah seh; Pathian zum u law keimah zong ka zum ve u.
2 Ka Pa inn ah umnak hmun tampi a um, cuticun si hlah seh law cu nan umnak hmun pakhat timhtuah awkah ka kal lai kan ti hna hnga maw?
3 Ka kal i nan umnak hmun pakhat ka va timh tikah ka ra òhan lai i ka sinah kan lak hna lai, cucu nannih zong ka sinah nan um khawh ve nakhnga caah a si.
4 Cun ka kalnak ding lam cu nan hngalh ko,” a ti hna.
5 Thomas nih a thawh i, “Bawipa, khuazei ah na kal lai ti kan hngal lo, zeitindah lam cu kan hngalh khawh lai?” a ti.
6 Jesuh nih, “Keimah hi lam le biatak le nunnak ka si; keimah sin lo cun ahohmanh Pa sinah an ra lo.
7 Keimah nan ka hngalh ahcun ka Pa zong nan hngalh ve ko hnga; atu hin cun nan hngalh i nan hmuh cang,” a ti hna.
8 Filip nih, “Bawipa, Pa cu kan hmuh law kan lung a tling ko hnga,” a ti.
9 Jesuh nih, “Hi cancan nan sinah ka um nain maw atu tiang nan ka hngalh rih lo, Filip? Keimah a ka hmumi nih cun Pa zong a hmuh ko, zeitindah ‘Pa cu kan hmuhsak’ na ti khawh?
10 Pa chungah ka um i Pa zong keimah chungah a um ti hi nan zum lo maw? Nan sinah bia ka chimmi hna hi keimah nawl in ka chim lo; ka chungah a ummi Pa rianòuannak a si.
11 Keimah hi Pa chungah cun ka um i Pa zong ka chungah a um ti hi zum ko u. Asiloah, rian ka òuanmi hna thawng tal hin ka zum u.
12 Biangaite kan chimh hna, keimah a ka zummi nih cun ka tuahmi zong kha a tuah ve lai. Pa sinah ka kal lai caah hi nak rian ngan deuh hna hmanh hi a tuah rih lai.
13 Ka min in nan halmi paoh cu ka tuah lai, cuticun Fapa chungah Pa cu sunlawiter a si nakhnga caah a si.
14 Ka min in nan halmi paoh cu ka tuah ko lai,” tiah a ti hna.
15 “Nan ka dawt ahcun ka nawlbia kha nan zulh lai.
16 Nan sinah um camcin dingin ka Pa sinah kan nawlpiak hna lai i òanpitu dang an pek hna lai;
17 cucu biatak Thlarau a si. Vawlei nih a cohlang kho lo, zeitintiah a hmuh zong a hmu lo i a hngalh zong a hngal fawn lo; nannih nih cun amah cu nan hngalh, zeitintiah nan sinah a um i nan chungah a um lai.
18 Ngakòah in kan chia hna lai lo, nan sinah ka ra lai.
19 A rauh hlanah vawlei nih a ka hmu ti lai lo; sihmanhsehlaw nannih nih cun nan ka hmuh lai; ka nun caah nannih zong nan nung ve lai.
20 Cu ni ah cun ka Pa chungah ka um i nannih zong ka chungah nan um i kei zong nan chungah ka um kha nan hngalh lai.
21 Ka nawlbia a pom i a zulmi cu a ka dawt a si; a ka dawmi cu ka Pa nih a dawt ve lai, kei zong nih ka dawt ve lai i amah sinah kaa phuang lai.
22 Judas Iskariot a si lomi Judas nih, “Bawipa, zeitindah vawlei ah i phuang loin kanmah sinah naa phuan lai cu a si?” a ti.
23 Jesuh nih, “Ahopaoh nih a ka dawt ahcun ka bia a ngaih lai i ka Pa nih a dawt ve lai; a sinah kan ra lai i umhmun kan khuar lai.
24 A ka daw lomi nih cun ka bia a ngai lo, nan theihmi hi keimah bia a si lo, a ka thlahtu ka Pa bia a si.
25 Nan sin i ka um ko rih lioah hin hi bia hi kan chimh hna.
26 Sihmanhsehlaw Fimchimtu, Thiang Thlarau kha Pa nih ka min in a run thlah laimi nih cun zeizong vialte an chimh hna lai; kan chimh cangmi hna vialte kha nan lung ah a hung pem lai.
27 Daihnak kan chiahtak hna; keimah daihnak kan pek hna; vawlei nih an pek hna bantukin kan pe hna lo. Nan lungre thei hlah seh, a òih zong òih hlah u.
28 ‘Ka kal lai i nan sinah ka ra òhan lai,’ tiah kan chimhmi hna kha nan ka theih. Nan ka dawt ahcun ka Pa sin i ka kal lai caah nan tha a nuam hnga; zeitintiah ka Pa cu keimah nakin a ngan deuh.
29 A caan a phanh tikah nan zumh khawh nakhnga a hlankan in kan chimh chung hna.
30 Nan sinah bia tampi ka chim ti lai lo; zeitintiah vawlei pengtu cu a ra lio. Ka cungah nawl zeihmanh a ngei lo;
31 sihmanhsehlaw ka Pa ka dawt hi vawlei nih a hngalh nakhnga ka tuahmi cu ka Pa nih a ka fial bantukin ka tuah. Tho u, hika hin chuak u sih.