1 “Keimah cu mitsur ruang taktak ka si i ka Pa cu dum ngeitu a si. 2 A tlai lomi nge paoh cu a sam i a tlaimi nge paoh cu tam deuh a tlai khawh nakhnga a nge kha a hleuh tawn. 3 Nan sinah kan chimh cangmi hna bia nih an thianter cang hna. 4 Ka chungah hmun u law kei zong nan chungah ka hmun ve lai. Mitsur ruang ah aa peh lomi nge nih amah tein thei a tlai khawh lo bantukin nannih zong keimah chungah nan um lo ahcun nan tlai kho ve lai lo. 5 Keimah cu mitsur ruang ka si, nannih cu a nge nan si. Ka chungah a um i a chung i ka um venak nih cun thei tampi a tlai tawn, zeitintiah keimah lo cun zeihmanh nan tuah kho lo. 6 Mi pakhatkhat nih ka chungah a um lo ahcun hleuhmi nge bantukin hlonh a si i a car tawn; cu nge hna cu an khawmh i mei ah an paih i an khangh tawn. 7 Ka chungah nan hmunh i ka bia zong nan chungah a hmunh ahcun nan duhmi paoh hal u law nan caah tuah a si lai. 8 Thei tampi nan tlainak thawngin ka Pa cu sunlawiter a si i cu nih cun ka hnuzul nan si kha a langhter. 9 Ka Pa nih a ka dawt bantukin keimah zong nih kan dawt ve hna; ka dawtnak chungah cun hmun ko u. 10 Ka nawlbia nan zulh ahcun ka dawtnak chungah cun nan hmun lai; keimah zong ka Pa nawl ka zulh i a dawtnak chungah ka hmun ve. 11 Hihi kan chimhnak hna cu nan chungah kaa lawmhnak cu a hmunh i nan i lawmhnak zong a tlin ve nakhnga caah a si.

12 Ka nawlbia cu hihi a si: keimah nih kan dawt hna bantukin pakhat le pakhat i daw u. 13 Mi nih a hawile caah a nunnak a pekmi dawtnak nakin dawtnak ngan deuh a ngeimi ahohmanh an um lo. 14 Ka nawl pekmi nan tuah ahcun ka hawile nan si. 15 Miòhi kan ti ti hna lo, zeitintiah miòhi nih cun a bawipa tuahmi a hngal lo; asinain hawikom kan ti cang hna, zeitintiah ka Pa sinin ka theihmi paoh cu nan sinah ka langhter cang. 16 Nanmah nih nan ka thim lo, keimah nih kan thim hna. Nan tlai awk a si; nan theitlai zong a hmunh zungzal dingin kan fial hna; cucaah ka Pa sinah ka min in nan halmi paoh cu an pek hna lai. 17 Hi nawlbia hi kan pek hna: Pakhat le pakhat i daw ko u.

18 “Vawlei nih an huat hna ahcun nanmah an huat hna hlanah keimah a ka huat hmasa ti kha hngal ko u. 19 Vawlei mi si ahcun vawlei nih cun amah ta cu a dawt lai; sihmanhsehlaw vawlei ta nan si lo, vawlei in kan thim hna caah vawlei nih an huat hna. 20 ‘Miòhi cu a bawipa nakin a ngan deuh lo,’ tiah kan chimhmi hna kha i cinken ko u. An ka hrem ahcun nannih zong an in hrem ve hna lai; ka bia an ngaih ahcun nan bia zong an ngaih ve lai. 21 Sihmanhsehlaw hi vialte hi keimah ruangah nan cungah an tuah lai, zeitintiah a ka thlahtu kha an hngal lo. 22 An sinah ra in bia chim hlah ning law sualnak an ngei hnga lo; sihmanhsehlaw atu ah cun an sualnak caah sawtphetnak an ngei lo. 23 A ka huatu paoh nih ka Pa zong an huat ve. 24 Midang ahohmanh nih an tuah lomi rian kha anmah lakah rak tuah hlah ning law sualnak an ngei hnga lo, sihmanhsehlaw atu cu an hmuh i keimah he ka Pa he kan pahnih in an kan huat cang. 25 ‘Sullam ngei loin an ka huat,’ tiah phungbia i aa òialmi kha a tlin nakhnga caah a si. 26 Sihmanhsehlaw Pa sinin ka run thlah laimi Fimchimtu, Pa sinin a rami, biatak Thlarau a rat tikah cun ka sining kha a langhter lai; 27 nannih zong hngalhpitu nan si, zeitintiah a hramthawk tein ka sinah a ummi nan si.