4
Esther Nih Ka Mi Hna Caah Siangpahrang Ka Nawl Lai, A Ti
1 An tuahmi vialte cu Mordekai nih a hngalh tikah a puan kha a thleh hna i buri kha a aih i vutcam kha aa phulh, cun khualai ah khan aa chawk i fakpi le lunghno ngaiin a òap.
2 Ahohmanh siangpahrang kutka ah khan buri aih in luh phung a si lo caah siangpahrang kutka luhnak tiang lawng kha a hung kal.
3 Cun siangpahrang nawlbia le biakhiahnak a phaknak peng paohpaoh ah khan Judah mi caah òahnak a um i rawl an ul i an òap i an ngaih a chia i a tam deuh cu buri an i aih i vutcam an i phulh.
4 Cun cu kong cu a sinum nu hna le a cawngtu tildit pawl nih khan Esther cu an ra chimh tikah a lungre a thei ngaingai; Mordekai cu a buri kha i phoih i puan kha i aih awkah hnipuan a hei chanh, sihmanhsehlaw aa lak duh lo.
5 Khi tikah amah a tuammuaitu caah chiahmi siangpahrang tilditmi pakhat Hathak kha Esther nih cun a kawh i Mordekai sinah khan va kal i hi thil hi zeidah a sullam a si i zeicahdah a si ti kha va hngalh awkah nawl a pek.
6 Cun khua chung tual, siangpahrang kutka hmai zawn ah khan Hathak cu Mordekai sinah khan a va kal i
7 a cungah thil a tlungmi vialte le Judah mi hrawh awkah zeizat sette dah siangpahrang chawkhonnak chungah Haman nih tangka ka chiah lai tiah a timi kha Mordekai nih cun a rak chimh.
8 Mordekai nih cun, annih hrawhnak ding caah Susa khua chung i nawlbia an chuahmi òial chinmi pakhat kha a pek i, Esther kha na va hmuhsak lai i a sullam na va chimh lai i siangpahrang sinah a va kal lai i amah cu a miphun hna caah a va nawl nakhnga na fial lai, tiah a ti.
9 Cun Mordekai nih a chimmi cu Hathak nih a va kal i Esther kha a chimh.
10 Cun Esther nih khan Hathak cu a chawnh i
11 “Siangpahrang sinum vialte hna le siangpahrang peng chung mi vialte hna nih nu siseh, pa siseh, ahohmanh kawh loin siangpahrang sinah chungchin tual chungah an luh ahcun, phung pakhat lawnglawng a um ti kha hngalh dih a si: cu phung cu siangpahrang nih a nun nakhnga a bawi suifung kha a hlerpiak lo ahcun ahohmanh aa khatrep in thah awk an si ko. Cun atu hi ni 30 chung va luh awkah kawh ka si ti lo,” tiin Mordekai cu bia a cah.
12 Cun Esther chimmi cu Mordekai kha an chimh.
13 Cun Mordekai nih annih cu hi bantukin Esther cu va chimh awkah bialehnak a pek hna: “Judah mi a dang vialte hna nakin kei cu siangpahrang innchung ah hin ka um caah ka luat deuh hnga tiah i ruat hlah.
14 Zeicahtiah hi bantuk caan i dai tein na um ko ahcun, Judah mi hna caah hin himnak le luatnak cu hmun dang le ka dang in a chuak òhiamòhiam ko lai, sihmanhsehlaw nangmah le na pa innchungkhar hna tu hi nan thi lai. Hi bantuk caan caah hin dahkaw pennak chung i na phak hi a hei si ko hnga, aho nih dah a hngalh?” tiah a ti.
15 Cun Mordekai cu hitihin va leh awkah Esther nih a ti hna:
16 “Va kal law Susa khua chung i a ummi Judah mi vialte kha va pum hna, cun keimah caah rawl ulhnak pakhat ni thum chung rak ser u; chun ah siseh zan ah siseh zeihmanh ei in ding hlah u. Cun nannih nih nan tuah bantukin kei le ka sinum hna zong nih rawl ulhnak cu kan rak tuah ve lai. Cun phung he aa ralchanhmi a si nain siangpahrang sinah cun ka va kal lai, ka thih ah thih si ko seh,” tiah a ti hna.
17 Cun Mordekai cu a kal i Esther nih nawl a pek bang khan a tuah dih.