1 Nan rak i buarso ruang le nan sual ruangah nan rak thi i amah nih an nunter hna. 2 Hi vawlei phung hin nan rak nung i thli siangpahrang huham nan rak zul; cu Thlarau cu atu zongah nawlngai lomi hna lakah rian a òuan ko rih. 3 Mah hna sinah cun kannih zong kan rak i tel ve; kan pumsa duhnak zul in kan taksa diriamhnak le ruahning in kan rak nung i midang cio hna bantukin kan kotho in Pathian thinhunnak a ing ding hrimhrim cu kan rak si. 4 Sihmanhsehlaw Pathian cu zaangfahnak in a khat i kan i buar ruang i kan thih ko lio hmanh ah khan a kan dawtnak lianngan, 5 cun Khrih he a kan nunter òhan (a vel in khamh nan si). 6 Amah he cun a kan thawhter i van ah khin Khrih Jesuh he a kan òhutter. 7 Cucu Khrih Jesuh nih hmailei chan ah khin tah cawk loin a nganmi a vel kha a zaangfahnak in kan cungah a langhter lainak caah a si. 8 Zeitintiah nan zumh ruangah a vel in khamh nan si, nanmah òuanmi a si lo, Pathian laksawng a si. 9 Nan òuannak ruangah a si lo, cuti a si ahcun nan i porhlaw sual hnga. 10 Zeitintiah amah kut chuak kan si i Khrih Jesuh ah cun rian òha òuan awkin ser kan si; cu rian òha òuan in kan kal awk cun Pathian nih a rak timh ciami a si.

11 Chuahkehnak in Jentail a simi nannih cu kut in titsa cuarpartanmi hna nih ‘cuarpartan lo’ an rak in ti hna kha philh hlah u. 12 Mah caan lioah khan cun Khrih he nan i òhen i Israel chungkhar ah nan i tel lo caah kamhmi biahren ah cun mising nan si i vawlei ah hin ruahchannak ngei lo le Pathian ngei lo nan rak si kha philh hlah u. 13 Sihmanhsehlaw hlatpi ah a rak um tawnmi nannih cu Khrih Jesuh ah amah thisen thawngin atu cu amah he naihter nan si cang. 14 Zeitintiah amah cu kan i remnak a si; kan pahnih in pumkhat ah a kan ser i kan i huathaihnak ruangah i òhennak vampang cu a chimh. 15 Nawlbia phung le zulh awk phungphai hna cu amah pumsa in a hloh dih cang. Amah ah cun mi pahnih cu mithar pakhat ah a ser i remnak a chuahter. 16 Kan pahnih in Pathian ah pum khat kan si nakhnga vailam in a kan remter i cuticun huathaihnak cu a dihter cang. 17 Khrih cu a ra i lam hla deuh ah a ummi nannih sinah remnak a chim i lam nai deuh i a ummi kannih sin zongah remnak òhiamòhiam a chim. 18 Amah thawng cun kan pahnih in Thlarau pakhat thawngin kan Pa sinah kan phan kho cang. 19 Cu a si caah nannih cu mising le khual nan si ti lo i laikhat mithiang mi le Pathian chungkhar nan si cang. 20 Lamkaltu hna le profet hna lungphum cungah sak nan si; cu lungphum a biapi bikmi tukki lung cu Khrih Jesuh hi a si; 21 cu inn cu a tungtlang a dihlak in amah ah cun pehtonh a si i Bawipa biakinn thiang ah a hung cang. 22 Amah ah cun nannih zong Thlarau in Pathian umnak inn ah sak nan si.