1 Nan lak i unau pakhatkhat cungah lungfahnak a ngeimi pa nih zeitindah mithiang hna sinah si loin a ding lomi biaceihnak hmaiah a kal ngam? 2 Mithiang hna nih vawlei bia hmanh nan ceih awk a si kha nan hngal lo maw? Cuti nan ceih awk a si òung ahcun biatenau cu nan ceih kho lo maw? 3 Vanmi hmanh bia kan ceih hna lai hi nan hngal lo maw? Cuti a si ahcun hi nunnak he aa pehtlaimi bia cu zeitluk in dah kan ceih chinchin lai? 4 Cu a si caah cu bantuk bia nan ngeih tikah zeitindah Khrihfabu nih an upat lo tukmi hna hmaiah nan chuahpi. 5 Nan ningzahter awkah ka chim. Unau rual nan lakah biaceihtu a fimmi ahohmanh nan um lo ti cu a si kho hnga maw? 6 Unau pakhatkhat nih unau dang kha a zum lomi hna ceih awk tu in a chuahpi awk a si lo!

7 Pakhat le pakhat taza i cuai hrimhrim kha nan caah sungh a si. Zeicahdah a ingtu zong cu nan si deuh ko lo? Zeicahdah hlenthawi i sungh zong cu nan in deuh ko lo? 8 Zumtu unau rual pakhat le pakhat nanmah le nanmah tu nan i fahter i nan i hleng.

9 A ding lomi nih cun Pathian pennak nan co lai lo ti nan hngal lo dahra? Nanmah le nanmah i hleng hlah u. Nu le pa sualnak tuahmi, siasal biami, òangdangpommi, pa hlawhhlang, pa le pa sualnak tuahmi, 10 mifir, hakkau, zuri, hauhhmang le rokhmang hna zong nih Pathian pennak cu an co lai lo. 11 Nannih lak i acheu zong cu bantuk cu nan si ve. Sihmanhsehlaw Bawipa Jesuh Khrih min le kan Pathian Thlarau thawngin òawl nan si, thiancheh nan si i thiamcoh nan si.

12 “Kei ka caah cun zeipaoh tuah phung a si ko,” sihmanhsehlaw thil vialte bawmtu an si lo. “Kei ka caah cun zeipaoh tuah phung a si ko,” sihmanhsehlaw zeihmanh nih a ka sal lai lo. 13 “Rawl cu paw caah a si i paw cu rawl caah a si: sihmanhsehlaw Pathian nih a hrawh veve hna lai. Pum cu nu le pa sualnak caah a si lo, Bawipa ca tu ah a si i Bawipa cu pum caah a si. 14 Pathian nih Bawipa cu a thawhter i kannih zong a huham in a kan thawhter lai. 15 Nan pum cu Khrih cheu bang a si kha nan hngal lo maw? Khrih cheu bang cu lak riangmang in hlawhhlangnu cheu bang ah ka tuah lai maw? Tuah naisai hlah! 16 Hlawhhlangnu he aa pehtlaimi pa cu hlawhhlangnu he pumkhat ah an cang ti nan hngal lo maw? Zeitintiah “An pahnih in thisa khat ah an i cang,” tiah rak òial a si. 17 Sihmanhsehlaw Bawipa he aa pehtlaimi pa cu amah he thlarau pakhat ah an i cang. 18 Nu le pa sualnak cu hrial ko u. Mi pakhatkhat nih sualnak a tuah ahcun a pum lengah a si, sihmanhsehlaw nu le pa sualnak a tuahmi nih cun amah pum cungah a sual. 19 Nan pum cu Pathian sinin nan hmuhmi a si i nan chung i a ummi Thiang Thlarau biakinn pakhat a si ti nan hngal lo maw? Nannih cu nanmah ta nan si lo; 20 a man in cawkmi nan si. Cu a si caah nan pum in Pathian cu thangòhat ko u.