9
David Le Mefibosheth
1 Nikhat ah David in, “Saul ih sungkhat ihsin a nungmi pakhat tal an um maw? An um asile Jonathan ih ruangah an parah zangfahnak ka langter duh a si,” tiah a ti.Ref 9:1 1 Sam 20:15-17;
2 Cutikah Saul ih hnenum pakhat Ziba timi a um ih amah cu David hnenah an fehter. A feh tikah, David in, “Ziba na si maw?” tiah a rak sut.
Ziba in, “Ka si bawipa,” tiah a ti.
3 David siangpahrang in, “Pathian hnenih thu ka kam zo vekin Saul sungkhat pawl parah zangfahnak langter ka duh a si; a nungmi pakhat tal an um lai maw?” tiah a sut.
Ziba in, “Jonathan ih fapa pakhat a nungmi a um ih a ke a zeng,” tiah a ti.Ref 9:3 2 Sam 4:4;
4 David in, “Khuiahso a um?” tiah a sut.
Ziba in, “Lodebar khua, Ammiel ih fapa Makhir ih inn ah a um,” tiah a sim.
5 Cutikah Jonathan ih fapa cu David in a ko.
6 Saul ih fasuan, Jonathan ih fapa Mefibosheth a rathlen tikah upat òihzahnak in David ih hmaiah a kun. David in, “Mefibosheth!” tiah a ko. Anih in, “Bawipa, hinah ka um!” tiah a hun ti.
7 Cutikah David in, “Na thinphang hlah. Na pa Jonathan ih i duhdawtnak ruangah na parah zangfahnak ka nei a si. Na pu Saul ih leiram hmuahhmuah cu ka lo pekir thluh dingih nangmah cu ka hnenah rawl na ei ringring ding,” tiah a ti.
8 Cutikah Mefibosheth cu a lu a kunsal ih, “Bawipa, kei hi uico thicia hman ka tluk lo. Ziangahso hitlukih i zangfah lawmmam?” a ti.
9 Cule siangpahrang David cun Saul ih hnenum Ziba a ko ih, “Saul le a sungkhat pawl ih neihmi hmuahhmuah cu na bawipa Saul ih fasuan Mefibosheth hnenah ka pe thluh ding.
10 Nangmah le na fapa pawl le na hnenum pawl in an leiram cu nan òuan pei ih na bawipa Saul ih sungkhat pawl ih ei dingah rawl nan khawm pei. Asinan amah Mefibosheth cu ka hnenah rawl a ei ringring ding,” a ti. (Ziba in fapa hleinga le hnenum kul a nei.)
11 Cutikah Ziba in, “Siangpahrang na thupekmi vekin ka tuah thluh ding,” tiah a ti.
Mefibosheth cu siangpahrang ih fapa vekin David hnen ahcun rawl a ei ringring.
12 Cun Mefibosheth in Mika timi fapa pakhat a nei. Ziba ih sungkhat pawl cu an zate in Mefibosheth ih hnenum ah an cang.
13 Cuticun a ke a zengmi Mefibosheth cu Jerusalem ah a um ih rawl cu siangpahrang hnen lawnglawng ah a ei.