10
David In Ammon Le Siria A Neh
(1 San 19:1-19)
1 Tikcu a hung rei deuh tikah Ammon siangpahrang Nahash cu a thi ih a fapa Hanun siangpahrang ah a cang.
2 Cutikah David in, “A pa Nahash in ka parih upatnak le zangfahnak a rak tuah zo bangin Hanun parah ka langter ve ding,” a ti ih a riahsiat hnemtu dingah mi a thlah.
3 Sikhalsehla a mithlah mi pawl an va thlen tikah Ammon mi hruaitu pawl in an siangpahrang Hanun hnenah, “Na riahsiat hnemtu dingah tiah David in hitiih mi a rak thlah hi na pa an upat ruangah a si, tiah na zum maw? Si hrimhrim hlah! In neh duh ruangah kan khuapi ra zohhliah dingin thlingthlatu hitawkah a rak thlah a si,” tiah thusia an forh.
4 Curuangah David ih thlahmi palai pawl cu Hanun in a kai ih an khabe hmul kapkhat lam ciar a met hnuah an kor fualpi cu an tai ri in a tan sak ih a thlah hai.
5 Cuih thu David in a theih tikah a palai pawl tong dingin mi a thlah. Ziangahtile an ning a zak tuk ruangah a hnenah an ra ngam lo. Jerikho khua ih um dingin le an khabe hmul a cerhsal hnu lawng ih ra tlung dingin thu a cah.
6 Cutiin David an ral ih an canter kha Ammon mi pawl in an theih fiang tikah, Bethrehob le Zobah ihsin Siria ralkap thawngkul an hlang; Tob ralkap thawng hleihnih, le Maakah ram siangpahrang tla a ralkap thawngkhat thawn, an hlang.
7 A cuih thu cu David in a theih tikah Joab cu a ralkap òha bik pawl thawn a thlah.
8 Ammon mi pawl cu an ra suak ih Rabbah khuapi vung luhnak ihsin òanhmun an rak khuar. Siria ralkap, Tob ralkap le Maakah ralkap pawl khal ramkip le hmun kip in Israel pawl cu an rak bawh.
9 Joab in ral pawl in hmailam le dunglam in, in do ding, ti kha a theih tikah Israel ralkap lakih a òha bik pawl a hril ih hmailam ih Siria ralkap pawl dotu dingah a ret.
10 A ralkap dang pawl cu a naupa Abishai ih ho ah a ret ih Abishai cu Ammon mi pawl tawng dingah òanhmun a khuarter.
11 Joab in a nau Abishai hnenah, “Siria ralkap pawl in, in nor deuh asile in ra bawm pei. Cun Ammon ralkap pawl in an lo nor deuh asile ka ra lo bawm ding.
12 Zianghman òih hlah aw! Kan minung pawl le kan Pathian ih khuapi pawl hrangah nasa tak in kan òang pei. A òha bik a timi cu Bawipa in tuah hram seh,” tiah a ti.
13 Cutikah Joab le a ralkap pawl cun an nam ciammam ih Siria ralkap pawl cu an tlanhlo òheh.
14 Cule Ammon mi pawl in Siria ralkap pawl an tlan kha an hmuh tikah Abishai mithmuh ah an tlan ve ih an khuasung ah an kir. Ammon mi an donak ihsin Joab cu a kir ih Jerusalem a thlengsal.
15 Israel pawl in, in neh a si, ti kha Siria mi pawl in an theih tikah an ralkap hmuahhmuah cu an khawmsal.
16 Eufrates Tivapi ihsin nisuahnak lamih a ummi Siria mi pawl khal Hadadezer siangpahrang in a ko thluh ih Helam ah an ra ih Zobah siangpahrang Hadadezer ih ralkap pawl uktu ralbawi Shobak ih ho in an um.
17 A cuih thu cu David in a theih tikah Israel ralkap pawl a ko khawm òhehsal ih Jordan Tiva an tan hnuah Helam lam ahcun an feh. Siria ralkap pawl cu Halem ah David do dingin nasa zet in òanhmun an rak khuar. An do aw ciammam ih,
18 Siria ralkap pawl cu Israel pawl in an dawiòek thluh. David le a ralkap pawl in Siria rangleng mawngtu zasarih le rang ralkap thawng sawmli an that ih, Siria ralbawipa Shobak khal an hriam ih cuih hmunah a thi.
19 Siangpahrang Hadadezer kuthnuai ih a ummi siangpahrang dang pawl khalin Israel pawl in, in neh a si, ti kha an hmuh tikah, Israel thawn remawknak an tuah ih an kuthnuai um ah an cang. Cuih hnu cun Siria mi pawl in Ammon mi pawl cu an bawm ngam nawn lo.