7
David Hnenah Nathan Thucahmi
(1 San 17:1-15)
1 David siangpahrang cu ral nei lo in ram uktu a si ih a siangpahrang inn ah dai tein a um ngah tikah,
2 Profet Nathan hnenah, “Zoh hnik, kei ka umnak hi sidar thingih sakmi inn a si ih, Pathian ih Thukam Kuang sawn cu thlam sungih ret a si,” tiah a ti.
3 Cutikah Nathan in, “Tuah na duhmi cu tuah aw. Bawipa na hnenah a um a si,” a ti.
4 Sikhalsehla a cuih zan ah Bawipa in Nathan hnenah,
5 “David ka salpa hnenah va feh awla, “Ka umnak dingah biakinn a saktu ding cu nangmah na si lo.
6 Israel mi pawl Izipt ram in ka suahpi ihsin tuih sun tiang biakinn sungah ka um dah lo. Ka fehnak kipah puanthlam sungah ka um ringring.
7 Israel mi pawl thawn ka fehnak hmuahhmuah ah Israel hotu dingih òuanvo ka pekmi hruaitu pawl hnenah, ziangahso ka hrangah sidar thingih biakinn nan sak lo, tiah ka ti dah lo.
8 Curuangah David cu sim awla Keimah Ziangkimtithei Bawipa ih òongmi cu hitiin a si: Ka minung Israel mi pawl hruaitu dingah nangmah cu hramlak ih tuu na khalhnak ihsin ka lo ko.
9 Keimah cu na fehnak hmuahhmuah ah ka tel ih na ral pawl ka neh thluh. Cule leilungtlun ih mi tum bik tluk in mi hminthang zet ah ka lo tuah ding.
10-11 Ka minung Israel hrangah hmun ka hril dingih cutawkah zohman ih hnaihnok nawn lo in an um ding. Hi ram an thlen thok ihsin anmah cu mi puarthau pawl in an do ringring. Sikhalsehla cuticun a si nawn lo ding. Na ral pawl hnen ihsin ka lo hum dingih tesinfa tampi ka lo pe ding, tiah thu ka lo kam.
12 Na nunnak a cem ih na pu le na pa hnenah phum na si tik khalah na fapa pakhat cu siangpahrang ah ka tuah dingih a ukmi ram cu ka cakter ding.
13 Ka hrangah biakinn a sak pei ih a tesinfa pawl ih ram an uknak cu kumkhua in a hmun ding.
14 Keimah cu a pa ka si dingih amah cu ka fapa a si ding. Sualnak a tuah tik khalah a pa in a fapa cu nun a sim òheu vekin amah cu nun ka sim ding. Milai in nunsimnak ah fungfeek an hman bangin ka hmang ding.Ref 7:14 2 Kor 6:18; Heb 1:5; Thup 21:7;
15 Sikhalsehla a hnen ihsin ka duhdawtnak cu ka lakir lo ding. Nangmah siangpahrang na sinak dingih Saul hnen ihsin ka duhdawtnak ka lakkir vek cun ka lakir lo ding.
16 Tesinfa na nei vivo dingih na uknak cu a kumkhua in ka hmunter ding. Na siangpahrang uknak cu a cem dah lo ding,” tiah va sim aw,” tiah a ti.
17 Pathian in a hnenih a run phuan mi hmuahhmuah cu Nathan in David hnenah a sim thluh.
David Ih Lungawinak Thlacam
(1 San 17:16-27)
18 Cutikah siangpahrang David cu Bawipa umnak Puanthlam ah a feh ih a to ih thla a cam: “Maw Bawipa Pathian, kei hi zianghman ka si lo! Ka hrangih thil na tuahmi hmuahhmuah co dingah ka tlak hrimhrim lo. Ka innsang pawl khal an tlak lo.
19 Bawipa Pathian, hi hnakih tam deuh khal na tuah lai ding a si. Hmailam tikcu ih ka tesinfa pawl hrangah thukamnak na tuah zo. A cuih thu cu, maw Bawipa, ka hnenah na fiangter zo.
20 Maw Pathian, lo dil ding zianghman a um nawn lo. Na salpa kei hi i thei thluh ko.
21 Hi thil hmuahhmuah hi na tuahmi le na tummi an si. Hitlukih mangbangza thil hi nangmah in i theiter thluh zo.
22 Maw Bawipa Pathian, ziangtluk mangbangza so na si? Nangmah bangtuk zohman an um lo; kanmah rori ih kan theih thluh zo vekin nangmah bangtuk Pathian zohman an um lo.
23 Nangmah ih minung si dingih na run zomi Israel mi vek leilungtlun ah zo miphun hman an um lo. Nangmah in na hmin cu na thanter ih na minung pawl hrangah thil maksak le mangbangza tampi na tuah a si. Mi phundang pawl le an khawzing pawl cu na minung pawl lamzin tluangter dingah na dawihlo òheh. Israel mi pawl cu na ta si dingah Izipt ram ihsin na luatter zomi an si.
24 Na miphun Israel pawl cu kumkhua in na minung ah na tuah ih Bawipa Nangmah cu an Pathian na si zo.
25 “Curuangah Bawipa Pathian, keimah le ka innsang hrangih na thukammi hmuahhmuah cu a kumkhua in kimter hram awla, ka tuah ding na timi cu tuah thluh ko aw.
26 Na hmin cu kumkhua in a thang dingih mi in, “Cungnungbik Bawipa cu Israel uktu Pathian a si,” tiah an ti ding. Cun ka tesinfa pawl cu cat lo in siangpahrang siter hram aw.
27 Cungnungbik Bawipa, Israel ih Pathian, ka tesinfa pawl siangpahrang an si ringringnak ding cu keimah na salpa hnenih na langter zo ruangah na hnenih ral òha zet in thla ka cam ngamnak a si.
28 “Maw Bawipa Pathian, nang cu Pathian na si ih, na thukammi cu na kimter ringring. Ka hnenah hitluk òha thukamnak na tuah zo.
29 Curuangah Bawipa, na mithmai òha cotu an si ringringnak dingah ka tesinfa pawl cu nangmah in atu ah thluasuahnak pe hram aw. Bawipa Pathian, nangmah in hi thukamnak cu na tuah zo ih ka tefa pawl ih parah na thluasuahnak cu a kumkhua in um hram seh,” tiah a ti.