20
Jonathan In David A Bawm
1 David cu Ramah khua kiang Naioth khua ihsin a tlan ih Jonathan hnenah a thlengsal ih a hnenah, “Thil sual ziangso ka tuah? Ziang mawhnak so ka neih? Na pa ih parah ziangvek thilsia ka tuah ruangah so hitiih thah i tum?” tiah a ti.
2 Cutikah Jonathan in, “Pathian in na thih ding cu lo siang hram hlah seh. Ka pa in a tuahmi hmuahhmuah cu thupi siseh, thute siseh, i sim thluh òheu. Thah a lo tum sisehla i pheh lo ding. I sim ko ding a si,” tiah a ti.
3 Cule David in, “Nangmah in kei hi ziangtluk i duh ti cu na pa in a theih ruangah a tumtahmi cu na thinlung natter ding a phan ruangah lo theihter a tum lo a si. Ka thihnak ah kar khat lawng a sam ti cu Bawipa ih hmin in ka kam ngam a si,” tiah a ti.
4 Jonathan in, “Tuahter i duhmi pohpoh ka tuah ding,” tiah a ti.
5 Cutikah David in, “Thaisun hi Thla Thar Puai a si ih siangpahrang hnenih rawl ei ding ka si. Asinan na lung a kim ve asile hramlak ah ka feh pei ih tipsun zanlam tiang ka va thup aw ding.Ref 20:5 Mipum 28:11;
6 Rawl ei tikcu ih ka um lo tikah na pa in i hlam asile Bethlehem an inn ah zamrang in a va tlungta; ziangahtile an sungkhat in kumtin an pek òheumi thawinak pek tikcu a si ih keimah i simta a si, tiah run ti aw.
7 Cutikah na pa in, “A òha ko,” a ti ahcun phan ding zianghman a um lo. Asinan a thin a heng a si ahcun i siatsuah tengteng a tum ti na thei ding.
8 I zangfah hram awla ka hnenih Pathian hmin saal in thukamnak na tuahmi cu thlun hram aw. Sikhalsehla keimah lehlam ka mawh a si ahcun nangmah sawn in i that aw. Ziangahso na pa ih kut cun ka thih ding?” tiah a ti.
9 Cutikah Jonathan in, “Cuticun a si lo pei. Ka pa in thah a lo tum ngaingai a si, ti ka theihfiang a si ahcun ziangtinso nangmah sim lo in ka um thiam ding?” tiah a ti.
10 Cule David in, “Na pa thinheng zet in a òong, ti cu zoso in simsal ding?” tiah Jonathan cu a sut.
11 Jonathan in, “Hramlakah feh uh si,” tiah a sawm. Curuangah hramlak ah an feh.
12 Cutikah David hnenah Jonathan in, “Israel ih Bawipa Pathian cu in theihpitu si hram seh. Thaisun le tipsun atu tikcu ahhin ka pa cu thu ka rak sut ding. A thinlung na parih a òhat a si ahcun thu ka lo than ding.
13 Asinan siatsuah a lo tum a si ahcun, ka lo theihter dingih na rak tlan pei. Ka lo theihter lo ih siatsuahnak na tong a si ahcun Pathian in i that seh. Ka pa hnenih Bawipa a rak um bangin na hnenah um ve hram seh.
14 Cun ka nun hrih a si ahcun na thukamnak thianghlim cu hmunter awla ka hrangah rintlakmi si hram aw. Asinan ka thih ahcun,
15 a kumkhua in ka innsang pawl hnenah na zangfahnak run langter hram aw. Cun Bawipa in na ral hmuahhmuah an ci a hmih thluh tik khalah,Ref 20:15 2 Sam 9:1;
16 kan thukamnak cu ziangtik hmanah cat hlah seh. A cat asile Bawipa in nangmah a lo mawhthluk ding,” tiah a ti.
17 Jonathan in David cu a duhdawtnak thu a kamsal, ziangahtile amah le amah a duh awk vek rori in Jonathan in David cu a duhdawt a si.
18 Cule Jonathan in, “Thaisun cu Thla Thar Puai a si ih na tel lo ahcun na tohkham a lawng dingih na um lo a lang zet ding.
19 Na tel lo kha tipsun ahcun a lang sinsin ding. Curuangah kan dungih na thuhawknak hmun ahkhan va fehsal awla cutawkih lungkhon reprep phenah khan va relh aw.
20 Hmuibat bangin cutawk cu thal pathum in ka rak sai ding.
21 Cule thal pawl hawl dingah ka hnenumpa ka rak thlah ding. A hnenah, “Thal pawl cu na umnak ihsin hi lam kap ah an um; rak lak hai aw,” ka ti a si ahcun na hrangah phan ding zianghman a um lo, na ra suak thei, tinak a si ding. Phan ding a um lo ti cu Bawipa ih hmin in ka sim a si.
22 Sikhalsehla a hnenah, “Thal pawl cu na umnak ihsin khatlam kapah an um a si,” ka ti ahcun rak tlan aw. Bawipa in hmundang ih feh dingah a lo duh, tinak a si.
23 Kan karlak ih thukamnak kan tuahmi thu ahcun kumkhua ih ka hmunternak dingah Bawipa in a kimter ko ding,” tiah a ti.
24 Curuangah David cu hramlak ah a thup aw. Thla Thar Puai rawl ei-nak ah Saul siangpahrang cu a ra lut ih,
25 a to òheunak phar kiangah a to. A sangtu ah Abner a to ih, Jonathan cu cabuai ih khatlam kap, Saul ih hmaizawn ah a to. David ih tohkham cu a lawng.
26 Asinan cuih ni ah Saul cun zianghman a sim lo, ziangahtile, “A thianhlim lonak thil pakhatkhat a um a si ding,” tiah a ruat.
27 A thai sun, Thla Thar Puai hnu ni khatnak ah, David ih tohkham cu a lawng thotho. Curuangah Saul in, “Ziangahso mizan sun siseh, tuih sun siseh, rawl einak ih David a suah lo?” tiah Jonathan a sut.
28 Cutikah Jonathan in, “Bethlehem ih feh dingah thungai thlak in i dil ih,
29 “Ka sungkhat pawl kan khua ah thawinak puai an tuah ih ka u pa in tel tengteng dingah i rak cah a si; curuangah ka rual òha na si ahcun i thlah hram awla ka sungkhat pawl ka va tong hai ding,” i ti. Curuangah hi rawl einak ih a tel thiam lonak a si,” tiah a sim.
30 Cuih thu cu Saul in a theih tikah a thin a heng tuk ih, “Nang mi hlothlau, raltho le rintlaklo nunau ih fapa! Jesse ih fapa David na òan a si tihi fiang tein ka thei zo. Na nu ih thang na siatter ih nangmah ih thang khal na siat aw a si.
31 David a nunsung hmuahhmuah cu hi ram ih siangpahrang na si dah lo ding, ti na thei lo maw? Atu zamrang in va feh awla David cu hitawkah va hruai aw, a thih a òul a si!” tiah Jonathan cu a kawk ciamco.
32 Cutikah Jonathan in, “Ziangahso a thih ding? Ziangso a sual?” a ti.
33 Cutikah Saul in Jonathan sunthat dingin a feipi a vun lak ih a khawh. Cuih hnu cun a pa in David thah tengteng a tum a si, ti cu Jonathan in fel tein a thei.
34 Cabuai ihsin Jonathan cu thinheng zet in a tho ih cuih ni Thla Thar Puai a ni hnihnak ni cu zianghman ei lo in a um. A pa Saul in David cu mualpho tuk ih a tuah ruangah Jonathan cun a ninghanpi ngaingai.
35 An tiam awk cia bangtukin a thaizing ah Jonathan cu David tong dingah hramlak ah a feh. Jonathan cun tlangval note pakhat a fehpi.
36 A cuih tlangvalpa ih hnenah, “Ka sai dingmi thal pawl hi va tlan awla va hawl aw,” tiah a ti. Tlangvalpa cu a tlan ih Jonathan in thal cu hlatpi ah a sai.
37 Thal a tlaknak zawn a va thlen tikah Jonathan cu na pi in a au ih, “Thal cu hlatpi ah a um a si.
38 Khatawkah ding men hlah. Zamrang in feh aw,” tiah a ti. Tlangvalpa cun thal cu a sar ih a bawipa ih hnenah a thlenpi.
39 Asinan a tican zianghman a thei lo. Jonathan le David hrangah cun tican a nei thluh.
40 Cule li le thal pawl cu khuasung ih hei fehpi dingah Jonathan in a tlangvalpa cu a pek.
41 Tlangvalpa a feh hnuah a relhnak lungkhon phen ihsin David cu a tho ih leilung dai rori in vei thum tiang a lu a kun. David le Jonathan cu an hnam aw ih an òap veve. David ih riahsiatnak cu Jonathan ih riahsiatnak hnakin a zual sawn.
42 Cule Jonathan in, “Na hnenah Pathian um hram seh. Bawipa in kan pahnih karlak le na tesinfa le ka tesinfa karlak ih Bawipa ih hmin saal in thukamnak kan tuahmi cu kan hngetkhohter ringringnak dingah in bawm hram seh,” tiah David hnenah a ti. Cule David cu a feh ih Jonathan cu khuasung ah a kir.