FILIPI
(Philippians)
Kawhhran Hnenih Paul Cakuat
Thuhmaihruai
Filipi pawl hnenih Paul cakuat hi Europe ram ah a din hmaisabikmi Filipi kawhhran ah a kuatmi a si. Filipi cu Masidonia pengah a um ih Rom acozah ih ukmi a si. Paul in Filipi kawhhran ca a kuat tikah hin amah hi thawng sungah a um. A cuih thawng sungih a um lai ahcun Khristian hnaòuantu dang pawl in an dodal ih tlunah Filipi kawhhran sungah zirhtu dik lo pawl an um. Cumi ruangah Paul cu a thinlung a har ngaingai. Asinan a cakuatmi hi lungawinak le hnangamnak in a khat ih a cuih lungawinak le hnangamnak pawl tla cu Jesuh Khrih a zumnak ruangih a ngahmi a si, ti kha a langter.
Paul cu thawng a tla ih harsa zet ih a um laifangah Filipi kawhhran pawl in bomnak an kuat. Cumi lungawi thu simsal dingah hi cakuat hi a ngan. Filipi kawhhran khal siseh, Paul khal siseh, thinhar ih um veve cu an si ko nain Paul in himi tikcu hi caan òha ah a ruat ih Filipi pawl thapeknak le hnemnak ah a hmang. Porhawknak le hamòamnak ih ukmi si lo in Jesuh Khrih bangtukih tangdornak lungput neih dingah zangfah a dil. Khrih thawn thinlung hmun khatih an um theinak kha Judah daan an thlun thei ruangah si lo in zumnak ruangah Pathian zangfahnak laksawng a si sawn ti kha a theihtersal. Jesuh Khrih thawn thinlung hmun khatte ih a umtu pawl hnenah Pathian in lungawinak le hnangamnak a pek a si, ti thu khal a ngan.
Hi cabu sungah hin lungawinak, hnangamnak, thinlung hmun khatnak le Khristian nunnak le zumnak sungih tuartheinak tla hi thuuk deuh le hminsin tlak deuh in a langter. Filipi kawhhran a duhdawtnak thu khal a langter.
1
1 Khrih Jesuh ih sal a simi Paul le Timote in, Khrih Jesuh thawn a pehzom aw mi Filipi khua ih Pathian minung a ummi hnenah le nan kawhhran sungih hruaitu le upa pawl hnenah ca kan lo kuat.Ref 1.1 Tirh 16:12;
2 Kan Pa Pathian le Bawipa Jesuh Khrih in zangfahnak le daihnak lo pe hram seh.
Paul In An Hrangah Thla A Cam
3 Nanmah ka lo ruah tin tein ka Pathian parah ka lung a awi.
4 Nan zate hrang thla ka cam tin tein lungawinak thawn thla ka cam,
5 ziangahtile Thuthangòha hnaòuannak ahhin a thokpekte ihsin tuih sun tiang nanmah cu i bawm ringringtu nan si.
6 Curuangah nanmah sungih hnaòuan òha a thoktu Pathian in Khrih Jesuh ih Ni a ra thlen tikah cumi cu a òuansuak ding tiah ka thei fiang.
7 Nanmah cu ka thinlung sungah nan cam ringring. Nan parih hibangtuk thinlung ka neihmi hi nei ding mawi ka si. Ziangahtile atu thawng sungih ka um lai ah siseh, luat zet in Thuthangòha ka òanpi ih cuih Thuthangòha hngetkhoh sinsin dingih ka òuannak ah siseh, Pathian zangfahnak ruangih ka comi òuanvo ahhin nan zate in nan tel ringring ve a si.
8 Khrih Jesuh ih zangfah thinpemnak sungah ziangtlukin ka lo ngai hai, timi thudik ka simmi i theihpitu cu Pathian a si.
9 Pakhat le pakhat nan duhawknak cu theihnak dik le thu thleidan thiamnak thawn a òhanso vivonak dingah thla ka cam a si.
10 Cutiin nan òhang asile a òhabikmi kha hril nan thiam ding. Cule Khrih Ni ahcun borhhlawhnak le mawhthluknak hmuahhmuah ihsin nan thiangfai ding.
11 Jesuh Khrih lawng ih pektheihmi ziaza òha taktak cu nan nunnak ah a khat dingih cumi cu Pathian thangòhatnak le sunlawinak ah a si ding.
Khrih Hrangah Nung Ding
12 Ka u le ka nau pawl, ka parih a ra thlengmi thil pawl hi Thuthangòha karhzai tertu riangri ah an cang, tihi nan theih dingah ka duh a si.
13 Hi thil ruangah hin, siangpahrang inn kilvengtu hmuahhmuah le hitawkih midang pawl khalin Khrih ih sal ka si ruangah thawng ah in thlak kha an thei òheh a si.Ref 1.13 Tirh 28:30;
14 Cule thawng ka tlaknak hin kan unau tam sawn cu Bawipa an rinsannak a hngetkhohter ih an ral a òha sinsin ih ngam zet in thu an sim.
15 Mi òhenkhat cun in iksik ruangah le thu-el duh pawl an si ruangah Khrih thu cu an sim ngai; sikhalsehla a hrek cu thinlung tluangtlammi an sinak in Pathian thu an sim.
16 Cupawl cu duhdawtnak an neih ruangah an sim, ziangahtile Thuthangòha a òantu dingah Pathian in òuanvo i zem hi an hmu.
17 Mi hrekkhat pawl cu thinlung tluang zet in Khrih thu sim lo in anmah hamòam zawnruahnak thinlung thawn an sim. Thawng ih a um lai ahhin harsatnak betcih vivo uh si tiin an ruat.
18 Zianghman a poi lo. Ka lung a awi zet ko; thinlung òha lo thawn an simah siseh, thinlung tluangih an sim khalah siseh, Khrih thu an sim poh ahcun ka lung a awi thotho ko ding.
19 Ziangahtile nanmah ih thlacamnak le Jesuh Khrih ih Thlarau hnen ihsin a rami bomnak thawngin luatter ka si ding, ti ka thei.
20 Ka duh bikmi le ka hngakhlap zetmi cu òuanvo ka neihmi hi tuahsuak hram ningla, cule ziangtik caan khalah le a hleice in atu fang hrimhrim ahhin, ralòhatnak thawn khat tahrat in ka nunah siseh, ka thih ah siseh, ka thinlung ka taksa zate thawn Khrih hi upat hmaihngalnak pe thei ningla, tihi a si.
21 Nun timi hi ziangso a si? Kei ka hrangah cun nun cu Khrih a si. Curuangah thih khalle a hlawk sinsin.
22 Sikhalsehla nungin thil man nei deuh ka tuah thei a si ahcun khuimi sawn ka hril ding ka thei lo.
23 Ka thinlung kaahnih ah a feh. Hi nunnak hi tlansan ih Khrih thawn um cu ka duh zet; cumi cu a òha deuh ngaingai.
24 Sikhalsehla ka nun hrih ding cu nan hrangah a rak òulzet fawn.
25 Cumi cu fiang tein ka theih ruangah ka nung hrih ko ding. Zumnak sungah nan òhansonak le nan lungawinak kha a lo betbawmtu si dingah nan hnenah ka nung rei hrih ding a si.
26 Cuticun nan hnenih ka ra thlensal tikah, Khrih Jesuh thawn nan nunnak cu a pehzom awk ruangah, keimah parah hmaihngalnak tampi nan nei ding.
27 Atu lai ah a thupimi cu Khrih Thuthangòha ih duhdan vekin nan nuncan cu si thei sehla, cuticun ka ra lo ton thei ah siseh, ton thei lo khalah siseh, tumtahmi pakhat nei in fektein nan dingih Thuthangòha hrangah hmunkhat ah thinlung rual tein ral nan dotlang ti kha ka thei ding a si.
28 Nan ral pawl kha òih hlah uh. Ralòha zet in um uh. Cumi cun annih an sung dingih nannih nehtu nan si ding ti kha a langter ding; ziangahtile nehnak a lo petu cu Pathian a si.
29 Khrih nan zumnak lawngah si lo in amah ih hrang nan tuarnak khalah covo zemmi nan si hi mi vannei nan si.
30 Curuangah atu cun raldonak sungah ka hnenah nan tel thei ve ding. Cumi ral cu kan dung khalah ka rak do zo ti nan hmu ih, atu khalah nan theih vekin ka do rero lai a si.Ref 1.30 Tirh 16:19-40;