10
Nupa Òhenawknak Thu
(Mat 19:1-12; Luk 16:18)
1 Cule Jesuh cu cutawk hmun in a suak ih Judea peng ah a feh ih Jordan Tiva a tan. Tiva ral khat ahcun miburpi in an pan thotho ih a zirh keel vekin thu a zirh.
2 Farasi mi hrekkhat a sual hawl duh ah an ra; annih in, “In sim hnik! Mipa in a nupi maak dingah kan Daan in a thlah maw?” tiah an sut.
3 Jesuh in, “Ziangbangtuk daan so Moses in a lo pek?” tiah a sut.
4 Annih in, “Moses cun nupi maaknak ca nan ngan pei ih nan maak thei dingin ti,” tiah an let.Ref 10.4 Daan 24:1-4; Mat 5:31;
5 Jesuh in an hnenah, “Nan thinlung a ruh tuk ih zirh theih nan si lo ruangah Moses in hibangtuk daan cu a lo pek a si.
6 Asinan a hramthok, lei le van semsuah a si lai ahcun Ca Thianghlim ih a sim vekin ‘Pathian in mipa le nunau a tuah.Ref 10.6 Sem 1:27; 5:2;
7 Curuangah mipa in a nu le a pa a tanta dingih a nupi thawn an kom aw dingih pumkhat ah an cang ding,’ tiah a ti a si.
8 Cu a si ruangah annih cu pahnih an si nawn lo, pakhat an si zo.Ref 10.7-8 Sem2:24;
9 Pathian ih a kommi cu zohman in òhen hlah hai seh,” tiah a ti.
10 Inn sungih an luhsal tikah a dungthluntu pawl in cuih thu cu an sut.
11 Jesuh cun an hnenah, “Mi pakhat in a nupi a maak ih nunau dang a òhit asile a nupi par ihsin nunau dang thawn òaangòawm sualnak a tuah a si.
12 Cuvek thotho in nunau in a pasal a taan ih mipa dang a neih ahcun òaangòawm sualnak a tuah a si,” tiah a ti.Ref 10.11-12 Mat 5:32; 1 Kor 7:10-11;
Nauhak Pawl Thluasuah A Pek
(Mat 19:13-15; Luk 18:15-17)
13 Mi òhenkhat in an faate pawl kha Jesuh in thluasuah pe dingah an rak hruai. Asinan cupawl cu a dungthluntu pawl in an rak kawk.
14 Cuih thu cu Jesuh ih a theih tikah a thin a heng ih a dungthluntu pawl hnenah, “Nauhak pawl cu ka hnenah ra hai seh, dawn hlah uh. Ziangahtile Pathian Uknak cu hibangtuk nauhak pawl hrangah a si.
15 Fiang tein ka lo sim: Zokhal sisehla nauhak bangtukin Pathian Uknak an cohlang lo ahcun cuih Pathian Uknak sungah an lut thei dah lo ding,” tiah a ti.Ref 10.15 Mat 18:3;
16 Cule nauhak pawl cu a pom ih an parah a kut a suang fingfing ih thluasuah a pek.
Milianpa Ih Thu
(Mat 19:16-30; Luk 18:18-30)
17 Jesuh cu khual tlawng dingih a pawh zawng ah mi pakhat a hnenah a ra tlan ih a khukbil tahrat in, “Zirhtu òha, kumkhua nunnak ka co theinak dingah ziangso ka tuah ding?” tiah a sut.
18 Jesuh in, “Ziangahso zirhtu òha i ti? Pathian siar lo zohman miòha an um lo.
19 Thukham pawl cu na thei a sisi. ‘Mi that hlah; òaangòawm sualnak tuah hlah; rukru hlah; a dik lo in midang sual puh hlah; mi va bum hlah; na nu le na pa upat aw,’ ti an si kha,” tiah a ti.Ref 10.19 Suah 20:12-16; Daan 5:16-20;
20 Cupa cun, “Sayapa, hi thukham pawl cu ka nauhak lai ihsin ka thlun òheh cia mi an si,” tiah a ti.
21 Jesuh in cupa cu duhdawtnak thawn a zoh hliah ih, “Thil pakhat na sam lai. Va feh awla na neihmi hmuahhmuah zuar in tangka na ngahmi kha mifarah va pe awla vancung ah hlawnthil tampi na nei ding. Cuih hnuah i ra thlun aw,” tiah a ti.
22 Cuih thu a theih tikah mithmai sia le riahsia in a feh; ziangahtile amah cu milian ngaingai a si.
23 Jesuh in a dungthluntu pawl cu a zoh vivo hai ih, “Milian pawl hrangah Pathian Uknak sungih luh cu ziangtlukin so a har ding!” tiah a ti.
24 Cumi an theih tikah dungthluntu pawl cu an mang a bang ngaingai; asinain Jesuh cun a sim bet ih, “Ka faale tla, Pathian Uknak sung luh ding hi ziangtlukin so a har!
25 “Pathian Uknak sungih milian pa a luh ding hnak cun òhimte hnakua sungih kalauk a luh a ol sawn ding,” tiah a ti.
26 Cuih thu an theih tikah dungthluntu pawl cu an mang a bang sinsin ih, “Cuti a si ahcun zoso runnak a ngah thei ding?” tiah pakhat le pakhat an ti aw.
27 Jesuh in a dungthluntu pawl cu hmaiton tein a zoh ih, “Himi hi milai hrangah cun a cang thei lo; Pathian hrang lawngah a cang thei. Ziangahtile Pathian hrangah cun a cang thei lomi zianghman a um lo,” tiah a ti.
28 Cutikah Piter in, “A si ahcun kannih hi ziang hmuahhmuah kan tlansan ih nangmah kan lo thlun zo,” tiah a ti.
29 Jesuh in, “A si, thungai in ka lo sim: Zokhal sisehla a inn siseh, a lo siseh, a unau siseh, a farnu siseh, a nu le a pa siseh, a faate pawl siseh, keimah le Thuthangòha ruangah a tlansantu cu,
30 tuih san hrimhrim ahhin tam sinsin a ngah ding. Inn siseh, lo siseh, unau siseh, farnu siseh, nu siseh, faate siseh, a let zakhat in a ngah ding; cuih tlunah hremnak khal a ngah ve ding. Cule a ra dingmi san ah kumkhua nunnak a ngah ding a si.
31 Sikhalsehla atu ih hmaisabik a simi tampi cu netabik an si ding, cule atu ih netabik a simi tampi cu hmaisabik an si leh ding,” tiah a ti.Ref 10.31 Mat 20:16; Luk 13:30;
Jesuh In A Thihnak Ding A Sim Lala
(Mat 20:17-19; Luk 18:31-34)
32 Jesuh le a dungthluntu pawl cu Jerusalem lamah an feh lai ah Jesuh cu an hmaiah a rak feh; a dungthluntu pawl cu an thin a nuam lo. An dung ihsin a thluntu midang pawl khal an thin a phangzet. Dungthluntu hleihnih pawl cu hmundang deuh ah a hruai ih a parih a ra thleng dingmi thil pawl cu a simsal.
33 Anih in, “Ngai hnik uh! Jerusalem khua kan thleng dingih cutawkah Milai Fapa hi puithiam upa pawl le Daanthiam pawl kut ah pek a si ding. Annih in thah dingin thu an relcat dingih cuih hnuah Zentail mi pawl kut ah thlenter a si ding.
34 Hnihsuahsainak ah an hmang ding, cil an phui ding, an vuak dingih an that ding. Asinan ni thum hnuah a thosal ding,” tiah a ti.
Jeim Le Johan Ih Dilnak
(Mat 20:20-28)
35 Cule Zebedi ih fapa Jeim le Johan cu Jesuh hnenah an ra ih “Sayapa, thil pakhat in tuah sak hram dingah kan duh,” tiah an ti.
36 Jesuh in, “Ziangso nan duhmi cu a si?” tiah a sut.
37 Annih in, “A sunglawimi na Uknak sungih na bawi tohkham parih na to tikah na kiangah in toter ve hram aw; pakhat na vorhlam ah, pakhat na kehlam ah,” tiah an ti.
38 Jesuh cun an hnenah, “Ziang kan dil tihi nan thei lo. Ka in dingmi tuarnak khuathai hi nan in thei ding maw? Baptisma ka lak vek rori in nan lak thei ve ding maw?” tiah a sut.Ref 10.38 Luk 12:50;
39 Annih in, “Kan ti thei ding,” tiah an let.
Jesuh in an hnenah, “Ka in dingmi khuathai hi nan in thei ngai ko dingih baptisma ka lak vekin nan lak thei ve ko ding.
40 Sikhalsehla ka vorhlam le ka kehlam ih totu ding hril theinak cu keiih thu a si lo. Pathian in hi hmun cu a timtuah sak cia mi pawl hnenah a pe ding a si,” tiah a ti.
41 Cuih thu cu dungthluntu dang pahra pawl in an theih tikah Jeim le Johan parah an thin a heng ngaingai.
42 Curuangah Jesuh in an zate in a kokhawm ih, “Leitlun ram uktu pawl cu an ukmi pawl kha an lal-hnawh ih an hotu pawl tla cu thu an nei nasa ti cu nan thei.
43 Asinan nannih lakah cun hibangtuk cun a si lo pei. Nanmah lakah pakhat in a tum bik si a duh ahcun nan zate riantu a si pei.Ref 10.42-43 Luk 22:25-26;
44 Nanmah lakah pakhatnak si a duhtu cun nan zate sal a si pei.Ref 10.43, 44 Mat 23:11; Mar 9:35; Luk 22:26;
45 Ziangahtile Milai Fapa hman hi rianmi si lo in miriantu si dingah le mi tampi tlen dingah a nunnak pe dingin a ra a si,” tiah a ti.
Mitcawpa Bartimia A Damter
(Mat 20:29-34; Luk 18:35-43)
46 Jesuh le a dungthluntu pawl le miburpi cu Jerikho khua an thleng. Cule Jerikho khua ihsin an pawh zawng ah Timia ih fapa Bartimia an timi mitcaw kutdawh cu lamzin kiangah a to.
47 Nazareth mi Jesuh a si, ti kha a theih tikah, “David Fapa Jesuh! I zangfah hram aw,” tiah a au.
48 Mi tampi in an kawk ih, “Dai tein um aw,” tiah an ti. Asinan a dai duh cuang lo. “David Fapa, i zangfah hram aw,” tiah ring sinsin in a au.
49 Jesuh cu a cawl ih, “Hei ko hnik uh,” a ti.
Mitcaw pa cu an ko ih, “Na lungawi aw, tho aw, a lo ko sokhaw,” tiah an ti.
50 A puan sin laimi hlon duak in amah cu Jesuh hnenah a pet vurvo.
51 “Ziang lo tuah sak ding so na duh?” tiah Jesuh in a sut. Mitcaw pa in, “Sayapa, khua hmuh theisal ka duh,” tiah a ti.
52 Jesuh cun, “Va feh aw, na zumnak in a lo damter zo,” tiah a ti.
Hmakhat teah khua a hmu thei ih cuih sin Jesuh cu a thlun.