4
Elisha In Farah Nuhmei A Bawm
1 Profet burpi sung ihsin profet pakhat ih nupi cu Elisha hnenah a feh ih, “Bawipa, na salpa ka pasal in i thih san. Na theih vekin amah cu Pathian duh zettu a si. Asinan atu ah lei a baak mipa a ra ih ka fapa pahnihte leiba ai ah sal ah kaih a tum a si,” tiah a ra ti.
2 Cutikah Elisha in, “Ziangso ka lo tuah sak ding? Inn ah ziangso na neih?” tiah a sut. Annih in, “Olif siti langkhat siar lo zianghman neihmi dang ka nei lo,” tiah a sim.
3 Elisha in, “Va feh awla na innhnen pawl hnen ihsin palang lawng tampi in va sang aw.
4 Cuthluh in nangmah le na fapa pahnih cu inn sungah lut uhla sangka khar uhla palang lawng sungah cun na siti palang sungih siti cu than vivo uh. An khah ve tein palang pawl cu a dang ah re cingcing uh,” a ti.
5 Curuangah nuhmeinu cu a fapa pawl thawn inn sungah an lut ih sangka a khar hnuah, a fapa pawl ih rak kenmi palang sungah a neih cia mi siti cu a thun vivo.
6 Palang hmuahhmuah khat òheh ko ih a thun hnuah, “Palang lawng dang a um lai maw?” tiah a sut. A fapa pakhat in, “Palang lawng dang a um nawn lo,” tiah a ti. Cutikah siti a thlet reromi cu a pit ve.
7 Profet Elisha hnen ahcun a va fehsal ih, Elisha in, “Na siti zuar awla na leiba hmuahhmuah sam thluh aw. Cuih tlunah nangmah le na fapa pawl nunnak dingah paisa hlei a um hrih thotho ding,” a ti.
Elisha Le Shunem Khua Milian Nu
8 Nikhat ah Elisha cu Shunem khua ah a feh. Cuih khua ahcun nunau milian pakhat a um ih Elisha cu rawl ei dingah a ko ih,
9 cuih thok ihsin Shunem khua a thlen tin tein cuih inn ah Elisha cu rawl a ei ringring. Cule a pasal hnenah, “Kan inn ih a ra ringring pa hi mi thianghlim a si ding tiah ka zum.
10 Kan inn diphun parah khaan pakhat kan tuah sak pei ih cuih khaan sungah ihkhun pakhat, cabuai pakhat, tohkham pakhat le mei-inn pakhat kan retsak pei ih in ra tlawn tinin cutawkah a riak òheu pei,” tiah a ti.
11 Nikhat cu Shunem khua ah Elisha cu a ra tlawng ih a khaan sungah cun a hung cawl.
12 Cule a hnenumpa Gehazi cu, “Inntek nu va ko aw,” tiah a fial. Inntek nu a rat tikah,
13 Elisha in Gehazi hnenah, “Hitlukih in tuamhlawm ruangah le kan hrangih a zonzaih ai ah ziangso a hrangah ka tuah sak thei ding, sut hnik aw. Siangpahrang maw, ralkap hotu ralbawipa maw va ton sak in ziangthu tal va sim sak a duh maw?” tiah a ti.
Inntek nu cun, “Òulmi zianghman ka nei lo. Ka miphunpi lakah hin sammi zianghman ka nei lo,” a ti.
14 Cule Elisha in, “Cuti asile a hrangah ziangso ka tuah sak ding?” tiah Gehazi cu a sut.
Gehazi in, “Sammi pakhat cu a nei: Fapa a nei lo. A pasal le a tar zo fawn,” tiah a ti.
15 “Hitawkah ra seh,” tiah Elisha in a ti. Inntek nu cu a ra ih sangka ah a ding.
16 Cule Elisha in, “Hmaikum atu tikcu ah na òaang ah fapa te na cawi ding,” a ti.
Cutikah anih in, “Aw, bawipa, nang Pathian ih minung na sisi; thuphan cu i sim hlah aw!” a ti.Ref 4:16 Sem 18:14;
17 Asinan Elisha ih a tivek in cuih hnu kum khat ah fapa a hring ngaingai.
18 A hung upat deuh tikah veikhat cu fang at dingah, fang attu dang pawl thawn a pa cu lo ah a feh. An fapa te khal a pa hnenah a feh ve.
19 Cule rinlopi ah, “Ka pa, ka lu a na, ka lu a na,” tiah a ai ciamco.
Cutikah a pa in, “A nu hnenah vun pawk aw,” tiah a hnenum pakhat a fial.
20 Hnenumpa in a nu hnen ahcun a vun pawk ih a nu in a cawn parah sun tiang a cawi ih a thi.
21 Cutikah a nu in Elisha ih khaan ah a ruak cu hun cawi in ihkhun parah a ret ih sangka a khar hnuah a taan.
22 Cule a pasal a ko ih, “Hnenum pakhat laak pakhat thawn rak thlah aw. Profet Elisha hnenah ka va feh pei ih zamrang zet in ka ra kirsal ding,” a ti.
23 A pasal in, “Ziangahso tuih sun kherkher ih feh cu na duh? Sabbath ni a si lo, Thla Thar Puai khal a si lo,”a Sabbath ni le Thla Thar Puai ih profet leen cu a òha bik tiah an rak zum. tiah a ti.
Anih in, “A poi lo, a òha ko ding,” a ti.
24 Laak cu a kung an dan òheh tikah hnenumpa cu, “Laak hi zamrang in nawt awla ka lo sim lai hlan lo fuungter aw hlah,” tiah a ti.
25 Cuticun a pok ih Elisha umnak Karmel Tlang ah a feh.
Shunem khua ih nunaunu a rat kha Elisha in hla nawn ah a hei hmu ih a hnenum Gehazi hnenah, “Zoh hnik, Shunem khua ih nunaunu a rat khi!
26 Zamrang in a hnenah va tlan awla, amah le a pasal le an fapa te an dam maw, va sut hnik,” tiah a ti.
Gehazi hnen ahcun, “Thawmvang a òha ko,” tiah a rak ti.
27 Asinan Elisha hnenih a thlen tikah cun a hmaiah a kun ih Elisha ih ke cu a pom. Gehazi in tuul hloh a tum nain Elisha in, “Tuul hlah aw. Vansang in a um tihi na hmu lo maw si? Bawipa in a vansannak thu i sim fawn lo,” tiah a ti.
28 Cutikah nunaunu in, “Bawipa, fapa ka lo dil dah lem maw si? Thuphan i sim hlah aw ka lo ti lo maw?” tiah a ti.
29 Elisha in Gehazi hnenah, “Zamrang aw! Ka kianghrol hi la awla a tlan in tlan aw. Lamzin ah zohman be aw hlah. Mi ih an lo biak khalle bia kir hlah aw. A inn ah va feh awla a fapa ih tlunah ka kianghrol hi va thlir aw,” a ti.
30 Cule nunaunu in, “ Bawipa ih nunnak le nangmah ih nunnak saal in thu ka lo kam: Ka lo taan lo ding,” tiah Elisha cu a ti. Curuangah an pahnih in an feh tlang.
31 Gehazi cu an hmaiah a rak feh ih, an fapa teih tlunah cun Elisha ih kianghrol cu a va thlir. Asinan ziang thawthang hman a nei lo; cang khal a cang lo. Curuangah a kir ih Elisha hnenah, “Nauhakpa cu a nung thei cuang lo,” a ti.
32 Elisha a thlen tikah amah lawng a khaan sungah a lut ih ihkhun parah nauhakpa ih ruak cu a hmu.
33 Sangka a khar ih Bawipa ih hnenah thla a cam.
34 Cule nauhakpa ih parah cun a bok ih a kaa zawn ah a kaa, a mit zawn ah a mit, le a kut zawn ah a kut ret in a nen. Cuticun nauhakpa ih ruak cu malte a hung hlum.
35 Cun Elisha cu a tho ih a khaan sungah cun khatlam le khatlam ah a vak zok rero; cuih hnuah nauhakpa ih ruak cu a va nensal. Cutiih a tuah hnuah nauhakpa cu vei sarih a hahthio ih a mit a hun meng.Ref 4:34-35 1 Siang 17:21;
36 Cule Gehazi a ko ih, “A nu vung ko aw,” a ti. A nu cu a ra ih Elisha in, “Na fapa hi ra la aw,” tiah a ti.
37 Cutikah a nu cu Elisha ih kehram ah a bok ih a hmai leilung dai in upatnak a pek. Cule a fapa te cu a cawi ih a fehpi.
A Dang Mangbangza Pahnih
38 Veikhat cu an ram pumpi ah paam a tlung ih cutikah Elisha cu Gilgal ah a kir. Elisha in profet pawl thu a zirh rero lai ah a hnenumpa hnenah, “Tap parah beel tumpi toh awla hi profet pawl hrangah sa-buber suang aw,” a ti.
39 Hnenum pakhat cu vauhrial hawl ah hramlak ah a feh. Hramlak uumhri a hmu ih uumrah a lo ih a phurh theizat in a puan in a fun. Inn ah a tlung ih ziang a si, ti thei lo in hramlak uum cu a sat ih sa-buber ah a suang.
40 An ei dingah sa-buber cu an suak ih an teh tikah, “Ai law, thihsii a si ee!” tiah an au ciamco ih an ei ngam nawn lo.
41 Cutikah Elisha in, “Sangphut malte in i pek uh,” a ti. Cumi cu beel sungah a vun thlah ih, “An ei dingah sa-buber cu suak uh,” tiah a ti. An suahsal tikah cun ei òha ah a cang òheh.
42 Cun veikhat cu Baal Shalishah ihsin mi pakhat a ra ih cuih kum ih lak hmaisabik barli sangvut ih tuahmi sang zawlkul le fangthar lakmi a vui in Elisha hrangah a rak phur. Elisha in, “Hi rawl cu profet pawl pe aw, ei hai seh,” tiah a hnenumpa a fial.
43 Asinan a hnenumpa in, “Minung zakhat hrangah hi cu zianghman titham a si ual lo,” a ti.
Elisha in, “An ei dingah pe ko aw, ziangahtile Bawipa in, “An ei dingih an hlahmi tla a um ding,” a ti,” tiah a sim.
44 Curuangah profet pawl cu a pek hai ih an zate ih an ei hnuah, Bawipa ih ti vekin, an hlahmi a um ngaingai.