5
Naaman A Damter
1 Naaman cu Siria ralkap hotu ralbawipa pakhat a si ih amah thawngin Siria ralkap pawl cu Bawipa in a bawm ih an ral pawl an neh ringring. Curuangah an siangpahrang in ralbawi Naaman cu a uar zet ih a upatzet fawn. Ralbawi makzet a si; asinain phaarnat a tuar ngelcel.
2 Veikhat ah Israel mi an do lai ah Siria ralkap pawl in Israel nauhaknu pakhat an kai. An hruai ih Naaman nupi ih hnenum ah a cang.
3 Nikhat ah a bawinu hnenah, “Ka bawipa hi Samaria ih a ummi profet hnenah va feh sehla ka va duh so! A phaarnat hi a damter rori ding,” tiah a ti.
4 Cuih thu cu Naaman in a theih tikah siangpahrang hnenah a va feh ih a va sim.
5 Cutikah siangpahrang in, “A òha, va feh awla hi ka cakuat hi Israel siangpahrang va pe phah aw,” tiah a ti.
Naaman cu a feh ih ngun tangka thawng sawmthum, sui tlep thawngruk le thlengawknak hnipuan zuun hra a keng.
6 A kenmi cakuat sungah cun, “Hi cakuat a lo petu hi ka ralbawi Naaman a si ih na rak theihnak dingah hi ca hi ka lo kuat. A natnak hi rak damter hram aw,” tiah a ngan.
7 Cuih cakuat cu Israel siangpahrang in a rak siar tikah mangbang in a hnipuan a thlek òheh ih, “Ziangtinso Siria siangpahrang in hi pa hi rak damter aw tiah i ti men? Nunnak le thihnak huham nei Pathian ah maw i ruah? Keimah thawn tawhawknak a hawl a si ko ding,” tiah awloksong in a ti.
8 Cuih thu cu profet Elisha in a theih tikah siangpahrang hnen ahcun, “Ziangahso riahsia in na hnipuan na thlek òheh? Israel ram sungah profet a um a si, ti a theihnak dingah cupa cu ka hnenah ratter aw,” tiah thu a cah.
9 Curuangah Naaman cu a rang le a rangleng pawl thawn a feh ih Elisha inn ih kotka ah a va ding.
10 Elisha in a hnenum pakhat a hei thlah ih Naaman hnen ahcun, “Feh awla Jordan Tiva ah vei sarih in ti va bual aw. Na titsa an cerhsal dingih na dam ding,” tiah a va sim.
11 Cutikah Naaman cu a thinheng in a kir ih, “Cu lawmmam! Ka hnenah ra in Bawipa a Pathian hnenah thlacam tahrat in ka natnak hma parah a kut suangin i damter hmang ding, tiah ka ruat nain cuvek zianghman a um ual lo.
12 Cuih tlunah Damaskas ih a luangmi Abana le Pharpar tiva pawl cu Israel ram ih tiva hnakin an òha deuh a si lo maw? Cuih tiva pawl ah ti bual ningla ka dam sawn lo ding maw?” tiah a phunzai ciamco. Cuticun thinheng in a kir.
13 Cutikah a hnenum pawl in an hei naih ih, “Bawipa, profet in thil harsa deuh tuah dingah lo fial sehla na tuah ko ding a si. Ziangahso tiva sungih ti bual ih dam cu na duh lo?” tiah an ti.
14 Curuangah Naaman cu Jordan Tiva ah a vung feh ih, ti sungah cun Elisha ih ti vekin vei sarih a hnim aw ih, cuòheh cun a dam ngaingai! A taksa cu a dam òheh ih naute taksa bangin a ngil lellel. Cuticun mi thiangfai ah a cang.Ref 5:1-14 Luk 4:27;
15 Cule Elisha hnen ahcun a minung pawl thawn an va kir ih, “Atu cun Israel ram ih Pathian siar lo leilungtlun khuitawk hmanah Pathian dang a um lo, ti ka thei zo. Curuangah Bawipa, ka lungawinak laksawng hi i sang hram aw,” a ti.
16 Elisha in, “Ka biakmi a nung Pathian hmin saal in ka lo sim: Laksawng zianghman ka la lo ding,” tiah a ti.
A laksawng la dingah Naaman cun a hnek rero nain Elisha in a duh lo.
17 Cule Naaman in, “Ka laksawng i co sak thei lo a si ahcun ka khua ih phurh dingah laak pahnih phur in leilung i lakter hram aw;b Leilung i lakter hram aw ti tikah culai ahcun khawzing cu amah ih leiram lawngah biak theih a si, tiah an rak zum ruangah a si. ziangahtile atu thok ihsin Bawipa ih hnenah siar lo pathian dang zohnen hmanah raithawinak le mei-ur thawinak pawl cu ka pe nawn lo ding.
18 Siria khawzing Rimmon biakinn ah ka siangpahrang a feh ih ka thlun tikah anih in khawzing a biak tikah cun ka biak ve a òul dingih cutik lawngah Bawipa in i ngaithiam hram seh. Bawipa cun i ngaithiam ko ding,” tiah a ti.
19 Cutikah Elisha in, “Damte in va feh aw,” a ti. Cule Naaman cu a feh.
Asinan malte lawng a feh man.
20 Elisha ih hnenumpa Gehazi in, “Ka bawipa in zianghman laksawng la lo in Naaman a fehter. Siria ralbawipa ih a pekmi cu saan ding a si nain! A nungmi Bawipa ih hmin saal in ka sim: Ka dawi dingih ziangtal ka dil ding,” tiah a ti.
21 Curuangah Naaman cu a dawi. Naaman in a dunglam ih a ra tlan reromi pakhat a hmuh tikah a rangleng par ihsin a òum duak ih a rak tong ih, “Thupoi a um maw?” tiah a rak sut.
22 Cutikah Gehazi in, “Thupoi zianghman a um lo. Asinan Efraim tlangpar ram ih profet pawl lakin minung pahnih an ra thleng ih an hnenah ngun tangka thawngthum le hnipuan thlengawknak zuun hnih ka bawipa in pek a duh ih cumi cu nangmah in na rak pe thei pei maw ti lo sim dingah i thlah a si,” a ti.
23 Naaman in, “Ngun tangka thawngruk in la aw,” a ti. Ngun tangka cu dip pahnih sungah a thun sak ih la dingin a hnek. Cumi le thlengawknak hnipuan zuun hnih cu a hnenum pahnih a phurhter ih Naaman ih thupeknak bangin Gehazi ih hmai ahcun an feh.
24 Elisha umnak tlang an thlen tikah Gehazi in dip pahnih cu a la ih inn sungah a ret. Cuih hnuah Naaman ih hnenum pahnih cu a kirter.
25 Inn sungih a ra lutsal tikah Elisha in, “Khuiahso na feh?” tiah Gehazi cu a sut.
Gehazi in, “Khuitawk hmanah ka feh hrimhrim lo,” tiah a pheh.
26 Sikhalsehla Elisha cun, “Naaman cu a rangleng in a òum ih a lo ton lai ahkhan ka thlarau in na hnenih tel ve lo ah maw si i ruah? A tuih caan hi paisa le hnipuan, olif hmuan le sabit hmuan, tuu le caw, salnu le salpa, laak caan a si lo.
27 Asinan Naaman ih nat in a lo kai dingih nangmah le na tesinfa pawl cu cuih natnak a kumkhua in nan nei ta ding a si,” tiah a ti.
Gehazi cu lengah a suak ih cuih nat cu a tuar ngaingai, a vun cu vur bangin a rang òheh.