32
Jeremiah In Lo Ram A Lei
1 Bawipa in, Zedekiah ih Judah siangpahrang a òuan kum hranak ah ka hnenah thu a sim. Cuih kum cu Nebuchadnezzar Babilon siangpahrang a sinak kum hleiriatnak kum a si ve.Ref 32.1 2 Siang 25:1-7;
2 Cuih kum ah Babilon siangpahrang ralkap pawl in Jerusalem an do ih kei cu siangpahrang inn kiltu pawl khaan pakhat sungah in kharh khum.
3 Siangpahrang Zedekiah in cutawkah thawng ah i thlak ih i thlaknak thu cu ‘ Bawipa ih òongmi na phuan ruangah,’ i ti. Bawipa cun hitiin a sim, “Babilon siangpahrang hi khuapi hi ka lakter dingih,
4 siangpahrang Zedekiah khal a luat lo ding. Babilon siangpahrang kut sungah pek a si ding. Hmaiton in an hmu aw dingih pumpak in an bia aw ding.
5 Zedekiah cu Babilon ah hruaihlo a si dingih a thu ka rel hlan lo cutawkah a um ding. Babilon mi pawl a do khalle a hlawhtling lo ding. Keimah Bawipa in ka sim zo,” tiah a ti.
6 Bawipa in thu i sim ih,
7 ka paseu Shallum ih fapa Hanamel cu ka hnenah a ra dingih Benjamin ramsung Anathoth khua ih a lo cu keimah lei dingah i ra tong ding; ziangahtile a sungte lakah a nai bik ka si ih keimah ih hrangah a lei theitu ding ka si.
8 Cule Bawipa ih i sim òheh ve tein Hanamel cu ka umnak khaan sungah a ra ih lo lei dingah i ra fial. Curuangah Bawipa in ka hnenih a òongmi hi a dik a si, ti ka thei.
9 Hanamel hnen ihsin lo cu ka lei ih tangka cu a cuai kan thlai. A man cu ngun tangka in hleisarih man a si.
10 Lungkimnak cakhen kan tuah ih ka hmin ka ngan. Thu theihpitu kan ko ih tangka cu cuai in kan thlai.
11 Lo leinak cakhen cu pahnih in kan tuah. Pakhat cu tacik khenmi a si ih a dang pakhat cu tacik khen lomi a si. Keimah ih hrangah a pahnih in ka lak ih,
12 Maiseiah ih fa sin Neriah fapa Baruk hnenah ka pek. Hanamel mithmuh ah le lo leinak hmin ngantu le thutheitu pawl le cuih khaan sungih a tomi pawl mithmuh ah Baruk hnen ahcun ka pek.
13 An zate hmaiah Baruk hnen ahcun,
14 “Cungnungbik Bawipa, Israel ih Pathian in hi lo leinak cakhen hi kum reipi tiang hlolote ih a umnak dingah tacik khenmi siseh, khen lomi khal siseh, kum reipi siat lo dingin tlak beel sungah òha teih ret dingah thu a lo pek a si.
15 Cungnungbik Bawipa, Israel ih Pathian in inn le lo le sabit hmuan pawl tla hi ram sungah leisal a si ding,” tiah a ti.
Jeremiah Thlacamnak
16 Lo leinak cakhen cu Baruk hnenih ka pek hnuah thla ka cam:
17 “A lian bik Bawipa, lei le van hi na cahnak le na huham in na tuah. Na hrangah a har tukmi zianghman a um lo.
18 Minung siar cawk lo parah a hmunmi na duhdawtnak na langter zo, asinain an nu le an pa sualnak ruangah mi na hrem fawn. Nang cu a maksakmi le a nasa zetmi Pathian na si; nang cu Cungnungbik Bawipa na si.
19 Nang cu thil ruat thiamtu, mangbang za thil tuahtu na si. Minung tuahmi hmuahhmuah na hmu òheh ih an hnaòuan vekin laksawng na pek.
20 Kum reipi lai ah Izipt ram ah thil khawruahhar le thil mangbangza na tuah ih tuih sun tiangin Israel mi lakah siseh, mi phundang dang lakah siseh, na tuah ringring lai. Curuangah khuazakip ah na hmin a thang.
21 Thil khawruah har le thil mangbangza na tuahmi in kan ral pawl a òihter ih na huham le na cahnak hmang in Israel mi pawl cu Izipt ram ihsin na suah a si.
22 Hi ram cawhnawi le khuaitizu a luannak ram hi an pupa pawl hnenih na kam cia vekin an hnenah na pek.
23 Sikhalsehla hi ramsung an thlen ih an luah tikah na thukham an thlun lo; na thuzirhmi vekin an nung fawn lo. An tuah dingih na thupekmi hmuahhmuah zianghman an tuah lo. Curuangah hibangtuk siatsuahnak cu an parah na thlenter.
24 “Babilon mi pawl in an khuapi la dingah a lenglam ihsin leilung an khahsilh ih an do ciamco. Raldonak le paamnak le natnak in hi khuapi cu an kut sungah a thlenter ding. Na òongmi hmuahhmuah a kim thluh a si, ti cu na hmu òheh ko.
25 Asinan, Maw Cungnungbik Bawipa, Babilon mi pawl in hi khuapi an lak zik thlang nain thu theihpitu pawl hmuhhngan ah lo lei dingah thu i pek fawn,” tiah ka ti.
26 Cutikah Bawipa in ka hnenah,
27 “Keimah cu Bawipa ka si, mi hmuahhmuah ih Pathian ka si. Ka hrangah zianghman a harmi a um lo.
28 Hi khuapi cu Babilon siangpahrang Nebuchadnezzar le a ralkap pawl kut ah ka pe ding; an lak dingih,Ref 32.28 2 Siang 25:1-11; 2 San 36:17-21;
29 meisa in an ur ding. Himi pawl in an inn parah Baal khawzing hnenah rimhmui an ur ih khawvang dangdang hnenah sabitti an pek ih an toih ruangah ka thin in hengter. Hi mi pawl cu an inn pawl thawn ciam ko in an ur òheh ding.
30 An thuanthu hramthok pek ihsin Israel mi le Judah mi pawl in ka thin in tok ih an thil tuahmi hmuahhmuah in ka thin in hengter zo a si.
31 Hi khuapi sung mi pawl in hi khuapi an din thok ni ihsin ka thin in hengter. Siatsuah dingah ka ruat cat zo.
32 Ziangahtile Judah mi le Jerusalem mi pawl in an siangpahrang le an hotu pawl, an puithiam le an profet pawl thawn thil sualral an tuah a si.
33 An dung in tun ih ka zirh rero hai nain zianghman an ngai lo, a zir khal an zir duh lo.
34 Fihnungza a simi an milem pawl hman cu keimah biaknak hrangih sakmi Biakinn sungah an ret ih an balter zo a si.Ref 32.34 2 Siang 23:10; Jer 7:30, 31; 19:1-6;
35 An fanu le an fapa pawl Molek khawzing hnenih raithawinak ih pe dingah Baal khawzing hnenah Hinnom phairawn ah biakòheng an dawl. Cuvek ih tuah dingah thu ka pek lo; cuvekin an tuah dingih Judah mi pawl an sualter ding ti cu a ruah hman ka ruah dah lomi a si,” tiah i ti.Ref 32.35 Pui 18:21; 2 Siang 23:10; Jer 7:31;
Ruahsannak Thukam
36 Bawipa Israel ih Pathian in ka hnenah, “Jeremiah, raldonak le paamnak le natnak in hi khuapi cu Babilon siangpahrang kut ah a thlengter ding, tiah hi mi pawl in an ti. Atu ih ka òong dingmi hi ngai hrihhnik!
37 Ka thinhennak le ka ai thawhnak ruangih ram tampi ih ka òhekdarhnak ihsin anmah cu ka finkhawm hai ding; hi ram ahhin ka kirtersal dingih hnangam tein an um ding.
38 Annih cu ka minung an si dingih kei hi an Pathian ka si ding.
39 An nunnak ah tumtahmi thil pakhat lawng ka pe ding: Anmah òhatnak le an tesinfa pawl òhatnak hrangah kumkhua in keimah cu upatnak in pe ding.
40 Anmah thawn kumkhua hrang in thukamnak ka tuah ding. An hrangih thil òha tuah cu ka bansan dah lo ding; an thinlung zate thawn keimah in òihzah dingah ka tuah dingih cuticun ka hnen ihsin an pial nawn lo ding.
41 An hrangih thil òha tuah cu nuam ka ti dingih hi ram ahhin kumkhua in ka hmunter hai ding.
42 “An parah thil poimawh ka thlenter zo bangin an hnenih thil òha ka kam cia mi pawl cu ka thlenter vivo ding.
43 Mi pawl in hi ram cu nelrawn bangtuk, minung le ramsa um lonak ram ah a cang dingih Babilon mi pawl ih kut ah pek a si ding tiah an sim. Sikhalsehla hi ram ah lo le leiram pawl leisal ciamco an si ding.
44 Mi pawl in lo an lei ding, an leiawknak cakhen cu hmin an ngan ding, tacik an khen dingih thu theihpitu khal an um ding. Hibangtuk cu Benjamin ram sungah le Jerusalem kiangkap khuate pawl ah, Judah ram khuasung ah le tlangpar ram khua pawl ah, tlanghram ram ah le Judah ram thlanglam ramsung khalah an tuah ding. Mi pawl cu an ram sungah ka umtersal ding. Keimah Bawipa in ka sim zo,” tiah a ti.