33
Ruahsannak Thukamnak Dang
1 Siangpahrang inn kiltu pawl khaan sungih thawng ka tlak lai ahcun Bawipa ih thu cu a vei hnihnak ka hnenah a thlengsal.
2 Leilung a siamtu, a tuahtu le a umnak hmun ih a dintu Bawipa in ka hnenah a sim. A hmin ah Bawipa a simi cun,
3 “I ko awla ka lo let ding. Na theih lomi thil khawruahhar le mangbangza ka lo sim ding.
4 Bawipa keimah, Israel ih Pathian in Jerusalem inn pawl le Judah ram siangpahrang inn cu ral in an kulh ih an do ciamco ruangah a cim òheh ding tiah ka sim.
5 Mihrek cun Babilon mi pawl cu an do ve ding; asinain annih in ka thinhennak le ka ai thawhnak in ka siatsuah tummi pawl ih ruak thawn inn pawl cu an khahter ding. Himi pawl in thilsual an tuah ruangah hi khuapi cu ka dungtun zo a si.
6 Sikhalsehla hi khuapi le a minung pawl cu ka damtersal dingih ka harh ververter ding. An hnenah hnangamnak le daihnak tlamtling in ka thlenter ding.
7 Judah le Israel cu ka òhansoter dingih a hlan vekin ka dintersal ding.
8 An sualnak le ka parih an mawhnak pawl cu ka kholhfai dingih an sualnak le ral an thawhnak cu ka ngaithiam ding.
9 Jerusalem cu ka hrangah lungawinak, hmaihngalnak le uannak hrampi a si ding. Jerusalem mi pawl hrangah thil òha ka tuahmi le hi khuapi hrangih òhansonak ka thlentermi cu leilungtlun miphun pawl in an theih tikah an òih dingih an khur rero ding,” tiah a ti.
10 Bawipa in, “Mi in hi hmun cu nelrawn ram vek a si, milai siseh, ramsa siseh, an um lo tiah an ti. A si, an dik a si. Judah khua pawl le Jerusalem khuasung lamzin pawl cu an òhing reprep ngai a si. Minung le ramsa zianghman an um lo. Sikhalsehla hi hmun pawl ahhin,
11 lungawi aipuannak thawng le mocan puai ih awn au thawmvang nan theisal ding. Mi pawl in ka Biakinn ah lungawi thawinak pe dingah hlasak phah ih an rat nan thei ding. Annih in,
‘Cungnungbik Bawipa ih hnenah
lungawinak pe uh,
Ziangahtile amah cu a òha;
a duhdawtnak cu kumkhua in a hmun,’
an ti ding.Ref 33.11 1 San 16:34; 2 San 5:13; 7:3; Ezr 3:11; Saam 100:5; 106:1; 107:1; 118:1; 136:1;
Hi ram cu a hlan vekin ka òhansoter ding. Keimah Bawipa in ka sim zo,” tiah a ti.
12 Cungnungbik Bawipa in, “Hi ram nelrawn a bangmi le minung le ramsa an um lonak ram hi òilva tlannak ram a cangsal dingih cunah tuukhal pawl in an tuu an khal ding.
13 Tlangpar ram ih khua pawl, tlanghram ram le Judah ram thlanglam ah, Benjamin ramsung le Jerusalem kiangkap khawfate teah le Judah ram khua pawl ah tuukhal pawl in an tuu an siar ciamcosal ding. Keimah Bawipa in ka sim zo,” tiah a ti.
14 Bawipa in, “Israel le Judah mi hnenih ka thukammi ka kimternak tikcu a ra thleng ding.
15 Cutikah an siangpahrang ah David ih tesinfa mifel pakhat ka hril ding. Cuih siangpahrang in hi ram sungah hin thil dik le thil ding a tuah ding.
16 Judah mi le Jerusalem mi pawl cu runsuak an si dingih hnangam zet in an um ding. Hi khuapi cu, ‘ Bawipa kan Rundamnak,’ ti a si ding.Ref 33.14-16 Jer 23:5, 6;
17 Israel siangpahrang cu David tesinfa a si ringring dingih,Ref 33.17 2 Sam 7:12-16; 2 Siang 2:4; 1 San 17:11-14;
18 Keimah riantu le mei-ur thawinak petu le sangphut le thawinak dangdang petu dingah Levi phun sungin puithiam an òuan ringring ding, tiah keimah Bawipa in thu ka kam a si,” a ti.Ref 33.18 Mipum 3:5-10;
19 Bawipa in ka hnenah,
20 “Sun le zan cu anmah tikcute ih um ringring dingah anmah thawn thukamnak ka tuah zo. Cuih thukamnak cu bal theih a si nawnlo ding.
21 Cuvek thotho in a tesinfa pawl in siangpahrang òuan ringring dingin ka salpa David thawn thukamnak ka tuah ih keimah riantu si ringring dingin Levi phun puithiam pawl thawn thukamnak ka tuah zo; hi thukamnak pawl cu bal theih a si nawn lo ding.
22 Ka salpa David ih tesinfa pawl le Levi phun puithiam pawl cu ka karhzaiter ciamco dingih, van ih arsi le tifinriat kap vunnel siar cawk lo an si bangin siar cawk lo an si ve ding,” tiah a ti.
23 Bawipa in ka hnenah,
24 “Hi mi pawl in ka hril cia mi innsang pahnih Israel le Judah hi a hnong zo a si, tiah an rel rero hi na thei zo maw? Cule ka minung Israel le Judah mi pawl cu an nautat ih miphun hmanah an siar nawn lo.
25 Asinan keimah Bawipa in sun le zan thawn thukamnak ka tuah ih lei le van an um zia uktu dingah daan khal ka tuah a si.
26 Hi thil pawl a tuahtu ka si vekin Jakob ih tesinfa pawl le i riantu David thawn ka tuahmi thukamnak cu ka hmunter ding. Abraham, Isaak le Jakob ih tesinfa pawl uktu ah David ih tesinfa pakhatkhat ka hril ding. Ka minung pawl parah zangfahnak ka nei dingih mi neinung zet ka sitersal hai ding,” tiah a ti.