22
Judah Siangpahrang Inn Hrang Thucahmi
1-2 Bawipa in David tesinfa Judah siangpahrang ih inn ah va feh in siangpahrang le a kuthnuai bawi pawl le Jerusalem mi pawl hnenah a thu simmi ngai dingin va sim aw, i ti. Bawipa in,
3 Keimah Bawipa in thu ka lo pek a si: Thil nan tuahmi hi dingthluk lairelnak le diknak thawn tuah uh. An bum reromi cu a bumtu kut ihsin hum uh. Ramdangmi siseh, farah ngakòah le nuhmei pawl tisiat hlah uh. Hi hmun thianghlim ahhin mawh nei lo milai that hlah uh.
4 Ka thupekmi vekih nan tuah ngaingai a si ahcun David tesinfa pawl siangpahrang an si ringring ko ding. Annih cu an kuthnuai bawi pawl le an minung pawl thawn hi siangpahrang inn ih kotta sungin rang le rangleng thawn an suak an lut ko ding.
5 Asinan ka thupekmi nan thlun lo a si ahcun, siatserh in ka lo kam, hi siangpahrang inn cu innrop ah a cang ding. Keimah Bawipa in ka sim zo.Ref 22:5: Mat 23:38; Luk 13:35;
6 Ka hrangah Judah siangpahrang ih inn cu Gilead ram le Lebanon Tlang bangin a mawi a si. Sikhalsehla zohman um duh lonak hmunòhing ah ka tuah ding.
7 A siatsuahtu dingah mi ka thlah. An hreitlung an keng ih a mawi zetmi sidar òhuam pawl cu an hau dingih meisa sungah an paih ding.
8 “Neh hnuah ramdangmi tampi hilam an rat tikah ziangahso Bawipa in hi a nasa zetmi khuapi parah hivek in a tuah? tiah an sut ding.
9 Cutikah an Pathian thawn an tuahmi thukamnak an dungtun ih khawzing dangdang an rian ruangah a si, tiah an ti ding,” a ti.
Joahaz Thuhla Jeremiah Ih Simmi
10 Judah mi pawl,
siangpahrang Josiah cu òah hlah uh.
A thih ruangah nan riahsia hlah uh.
Asinan a fapa Joahaz hrangah
napi in òap uh.
Amah cu an hruaihlo dingih
a kir nawn lo ding.
A suahnak ram a hmu nawn lo ding.
11 Bawipa in Judah siangpahrang a cangtu, a pa Josiah ai a awhtu Joahaz thu ah hitin a sim, “Anih cu hitawk ihsin a feh zo ih a ra kirsal nawn lo ding.Ref 22:11: 2 Siang 23:31, 34; 2 San 36:1, 4;
12 An hruainak ram ah a thi dingih hi ram cu a hmu nawn lo ding,” a ti.
Jehoiakim Thuhla Jeremiah Ih Simmi
13 Dinglonak in a inn a saktu le,
Nawhthuh einak in a inn a kauh sintu,
Zianghman pek lo in
a ram minung hna a òuantertu le
Hlawhman zianghman a pe lotu cu
a lamzin a pit a si.
14 “Inn òha zet ka sak dingih,
Tlunta khan ahkhan tum zetzet
ka tuah ding,” a titu cu an lamzin a pit a si.
Cutiin sangkate a tuah ih a sung thuah cu
sidar thing in a tuah.
Cuih hnuah sisen a hnih.
15 Siangpahrang òha deuh na si cuang maw?
Sidar thing in inn na sa ih,
midang inn hnakin a òhatdeuh hmanah.
Na pa cu mi sanòha zet a si.
Miding le midik a si.
A tuahmi hmuahhmuah ah a hlawhtling.
16 Mifarah ih thu khal dik tein a rel sak.
A lamzin a tluang a si.
Bawipa theih ti cu cumi cu a si.
17 Asinan nang cun nangmah ih
hlawknak lawng na hmu.
Mawh nei lo milai na that ih,
na minung pawl nasa zet in na hrem a si.
Bawipa in a sim zo.
18 Curuangah Bawipa in
Judah siangpahrang Josiah ih fapa
Jehoiakim thu cu hitin a òong, Ref 22:18: 2 Siang 23:36, 24:6; 2 San 36:5, 7;
“A thih ah zohman an òap lo ding;
‘Maw ka u, maw ka nau,’ tiah
zohman an òap lo ding.
‘Maw ka Bawipa, ka siangpahrang,’
tiah zohman mitthli tla in an òap lo ding.
19 Laak a thih ih an phum tluk fang a si ding.
A ruak cu an hnuk dingih,
Jerusalem kotka lengah
an va hlon ding,” a ti.
Jerusalem Thuhla Jeremiah Simmi
20 Maw Jerusalem mi pawl,
Lebanon ram ah feh uhla au uh;
Bashan ram ah feh uhla ai uh,
Moab ram tlangpar ihsin ko uh;
Ziangahtile a lo òanpitu le a lo duhtu
ram hmuahhmuah, ral an sung òheh zo.
21 Mi neinung nan si lai ah,
Bawipa in thu a lo sim;
Asinan nan rak ngai duh lo.
Nan nunsung cuti ringring nan si.
Bawipa ih thu cu
nan thlun duh dah lo.
22 Nan hotu pawl cu thlipi in a sem hlo ding.
A lo òanpitu pawl cu
ral kaihmi an si òheh ding.
Nan khuapi ningzak le mualpho in a um ding;
nan thil sual tuahmi ruangah.
23 Lebanon ihsin a rami sidar thing lakah
thlangam zet in na cawl.
Asinan nunau nau nei nat tuar bangin
na hrangah a na zet ding,
zangfakza na si ding,
Natnak ih a lo tlak tik ahcun!
Jehoiakhin Parih Pathian Thuòhennak
24 Bawipa in Judah siangpahrang Jehoiakim ih fapa siangpahrang Jehoiakhin hnenah, “A nungmi Pathian ka si vekin ka vorhlam ih hminkhennak zunghruk na si hmanah ka lo phuak dingih,Ref 22:24: 2 Siang 24:8, 15; 2 San 36:9, 10;
25 nangmah thah a lo duhtu, na òih zetmi pawl hnenah ka lo pe ding. Babilon siangpahrang Nebukhadnezzer le a ralkap pawl hnenah ka lo pe ding.
26 Saltannak ram ah nangmah cu na nu thawn ka lo dawi hlo ding. Nan suahnak ram a si lomi ah nan nufa in nan feh dingih cutawkah nan pahnih in nan thi ding.
27 Hi ram hi na ngai zet ding, asinan na kir nawn lo ding,” a ti.
28 Kei in, “Siangpahrang Jehoiakhin cu a kuaimi beel, zohman ih an duh nawn lomi beel vekah maw a cang zo? Curuangah maw amah le a faate pawl an theih dah lomi saltannak ram ah hruaihlo an si?” ka ti.
29 Maw leilung, leilung, leilung,
Bawipa ih òongmi hi ngai hnik!
30 “Hipa cu a faate pawl
hloral dingih ruahcia mi a si.
Ziangtik hmanah hlawhtling lo dingmi a si.
A tesinfa pawl sungin David ai awhtu le,
Judah ram a uktu ah
zohman an um lo ding.
Keimah Bawipa in ka sim zo,” a ti.