21
Jerusalem An Neh Ding Ti Simsungnak
1 Judah siangpahrang Zedekiah in Malkhiah fapa Pashhur le Maaseiah fapa puithiam Zefaniah cu ka hnenah a rak thlah ih hitiin, in dil,
2 “Kan ai ah Bawipa ih hnenah in òongsak aw. Ziangahtile Babilon siangpahrang Nebuchadnezzar in a ralkap pawl thawn kan khuapi an kulh òheh a si. Bawipa in a hlanih a rak tuah òheu vekin mangbangza thil pakhatkhat tuah tahrat in Nebuchadnezzar cu dungah a kirter tla a si thei men,” tiah a ti.Ref 21.2 2 Siang 25.1-11; 2 San 36:17-21;
3 Cule Bawipa ih òong cu ka hnenah a thleng ih Zedekiah ih mi a rak thlahmi hnen ahcun,
4 Bawipa, Israel Pathian ih òong cu Zedekiah va sim dingin ka phuan. Bawipa in, “Zedekiah, Babilon siangpahrang le a ralkap pawl a dotu na ralkap pawl cu keimah in ka do dingih ka neh ding. Na ralkap ih hriamnam pawl cu khuapi laifangah ka peng òheh ding.
5 Nangmah cu ka ban thacahnak hmuahhmuah le ka thinhennak le ka ai-thoknak hmuahhmuah thawn ka lo do ding.
6 Hi khuapi sungih a ummi hmuahhmuah ka that òheh ding. Milai siseh, ramsa siseh, natsia in an thi ding.
7 Asinan nangmah le na kuthnuai bawi pawl cu, raldonak, paamnak le natnak ihsin a luattu mipi pawl thawn nangmah thah a lo duhtu siangpahrang Nebuchadnezzar le na ral pawl ka lo kaiter dingih Nebuchadnezzar in a lo that ding. Zohman a lo zuah lo ding. Zangfahnak le zawnruahnak zianghman nan parah a nei lo ding. Keimah Bawipa in ka sim zo,” tiah a ti.
8 Cule mipi hnenih sim dingah Bawipa in i fial, “Ngai uh, keimah Bawipa in hril dingmi pahnih ka lo pe: Nunnak lamzin le thihnak lamzin an si.
9 Hi khuapi sungah a ummi cu raldonak ah an thi ding. Asilole rawl lo in le natnak in an thi ding. Asinan hi khuapi a do rerotu Babilon mi hnenah feh tahrat in kan sung tiih a va pe awtu cu an lo that lo ding; a nunnak tal cu a luat ding a si.
10 Hi khuapi cu zuah lo dingah ka ruatcat zo; ka siatsuah ding a si. Babilon siangpahrang hnenah pek a si dingih ciamko in a ur ding. Keimah Bawipa in ka sim zo,” tiah a ti.
Judah Siangpahrang Innsang Hrang Ralrinnak
11-12 Bawipa in David tesinfa Judah siangpahrang ih innsang ah va sim dingin hitiin i sim: “Keimah Bawipa ih ka simmi hi ngai hnik uh! Nitinte thudik in thu rel uh. An bum ih an namnuai rero mipa cu a namnuaitu kut ihsin hum uh. Cutiih nan tuah lo a si ahcun thilsual nan tuahmi hin ka thinhennak cu meisa bangin a alhter dingih zohman in an hmit thei lo ding.
13 Jerusalem, nang cu phairawn tlun hmun sang ah na to, hmunrawn lakih a saangmi lungto bangin. Asinan nangmah ka lo do ding. ‘Zohman in, in do thei lo dingih òanòhat ka khuarnak hmun ahcun zohman an lut thei lo ding,’ na ti.
14 Sikhalsehla na thil tuahmi ruangah ka lo hrem ding. Na inn òhaòha cu meisa in ka ur dingih a kiangkap ziang hmuahhmuah a kang òheh ding. Keimah Bawipa in ka sim zo,” a ti.