11
Lazaras A Thi
1 Bethani khua ih a ummi Lazaras an timi pa cu a na. Bethani cu Mari le a u Martha an umnak khua a si.Ref 11.1 Luk 10:38-39;
2 Hi Mari cu Bawipa ih ke ah zihmui a toih ih a sam in a hnawttu nu kha a si. A na mi Lazaras cu a òa a si.Ref 11.2 Joh 12:3;
3 An unau in Jesuh hnenah, “ Bawipa, na duhdawtmi na rualpa a na a si,” tiah thu an hei cah.
4 Cumi cu Jesuh in a theih tikah, “Hi natnak cu Lazaras ih thihnak ding natnak a si lo. Hi natnak cu Pathian sunlawinak langter dingah le Pathian Fapa in sunlawinak a ngahnak ding khalah a si,” tiah a ti.
5 Jesuh in Martha le a naunu le Lazaras cu a duhdawt zet.
6 Asinan Lazaras a na ti thu a theih hnuah cuih a umnak ahcun a hlei in ni hnih a cam ta.
7 Cule a dungthluntu pawl hnenah, “Judea ah va fehsal uh si,” tiah a ti.
8 Dungthluntu pawl cun, “Sayapa, kan dung rei lo teah mipi in cutawkah lungto in den an lo tum zo; atu na va fehsal ding maw?” tiah an ti.
9 Jesuh in, “Nikhat ah nazi hleihnih a um a si lo maw? Zokhal sun vangih a fehtu cu a bah dah lo, ziangahtile leilung ih a ummi tleunak a hmu.
10 Sikhalsehla khawthim sungih a feh ahcun a bah, ziangahtile tleunak a nei lo a si,” tiah a ti.
11 Cumi a sim òheh in Jesuh cun, “Kan rual Lazaras cu a itthat zo; asinain ka feh dingih ka va òhang ding,” tiah a ti.
12 Dungthluntu pawl in, “ Bawipa, a it a si ahcun a dam ko ding,” an ti.
13 Jesuh ih sim duhmi cu Lazaras a thi, tinak kha a si ih dungthluntu pawl cun itthat menmen a ti si hmang, tiah an ruat.
14 Curuangah Jesuh in fiang tein a sim ih, “Lazaras cu a thi zo;
15 asinain nan hrangah nan zum theinak dingah a hnenih ka rak um lo cu ka lung a awi a si; tho uhla a hnenah kan feh pei,” tiah a ti.
16 Thomas (Faphir an timi pa) in dungthluntu a rualpi pawl hnenah, “Sayapa thawn thi tlang dingah feh uh si,” tiah a ti.
Jesuh Cu Thawhsalnak Le Nunnak A Si
17 Jesuh a va thlen tikah Lazaras an phumnak ni li a si zo.
18 Bethani cu Jerusalem ihsin peng hnih kim deuh lo a si ih,
19 Judah mi tampi cu an òapa ih thih sanmi Martha le Mari topi dingah an ra.
20 Jesuh a ra lai rero ti kha Martha in a theih tikah amah hmuak dingah a feh, asinain Mari cu inn ah a um.
21 Martha cun Jesuh hnenah, “ Bawipa, hinah rak um ta cila ka òapa cu a thi lo ding nain!
22 Sikhalsehla atu hmanah hin Pathian in na dilmi cu a lo pe ko ding ti ka thei,” tiah a ti.
23 Jesuh in, “Na òapa cu a nungsal ding,” tiah Martha cu a ti.
24 Martha in, “A si, ni netabik ahcun a thosal leh ding ti cu ka thei,” tiah a let.
25 Jesuh in a hnenah, “Kei cu thawhsalnak le nunnak ka si. Zokhal keimah i zumtu cu thi hmansehla an nung ding.
26 Zokhal keimah sungah a nungmi le i zumtu cu an thi nawn lo ding. Himi hi na zum maw?” tiah a sut.
27 Martha in, “A si Bawipa, nang cu leilung ah a ra dingmi Pathian ih Fapa Messiah na si, ti ka lo zum,” tiah a ti.
Jesuh A Òap
28 Cutiih a sim hnuah Martha cu a vungkir ih a thup tein a nau Mari kha a ko. “Sayapa hinah a um ih a lo hlam a si,” tiah a ti.
29 Cumi cu Mari in a theih tikah a pok ih hmuak dingah zamrang in a va feh.
30 Jesuh cu khuasung ah a ra thleng hrih lo; Martha ih a tonnak hmun ahkhan a um lai hrih.
31 Mari a topitu le a hnemtu pawl cu Mari a pok ih zamrang in a feh kha an hmuh tikah amah cu an thlun ve. Thlan ah a va òap hmang ding tiah an ruat.
32 Jesuh umnak ahcun Mari cu a va thleng ih Jesuh a hmuh ve tein a kehram ahcun a khuk a bilh ih, “ Bawipa, hitawkah rak umta cila ka òapa a thi lo ding nain!” tiah a ti.
33 Jesuh in Mari le a topitu mipi pawl tla an òah kha a hmuh tikah a thin a na ih a lung a hno.
34 “Khuitawkah so nan phum?” tiah a sut.
Annih in, “ Bawipa, ra awla ra zoh aw,” tiah an ti.
35 Cule Jesuh cu a òap.
36 Mipi in, “Lazaras cu a va duhdawt lawmmam so!” tiah an ti.
37 Asinan mi òhenkhat in, “Mitcaw pa mit a vangter a si lo maw? Lazaras hi thi lo in ziangahso a tuah ve lo?” tiah an ti.
Lazaras A Nungsal
38 Jesuh cu a ning a hang ngaingai ih thlan ah a va feh. Cuih thlan cu lungkua a si ih a ka cu lungpheng pakhat in an khar.
39 Jesuh in, “Lungpheng hi òhawn uh,” tiah thu a pek.
Mithipa ih farnu Martha in, “ Bawipa, a nam zo ding. Kan phumnak ni li a si zo!” tiah a ti.
40 Jesuh in a hnenah, “Na zum taktak a si ahcun Pathian sunlawinak na hmu ding, tiah ka lo sim zo a si lo maw?” tiah a ti.
41 Cule lungpheng cu an òhawn. Jesuh in tlunlam a hun zoh ih, “Ka Pa, ka simmi i ngai ruangah na parah ka lung a awi.
42 Ka òong i theih sak ringring ti ka thei, asinain hitawkih a ummi pawl hin nangmah thlahmi ka si kha an zum theinak dingah anmah ruangah hitiih ka lo simnak hi a si,” tiah a ti.
43 Cutiih a sim hnuah aw ring zet in, “Lazaras, ra suak aw!” tiah a au.
44 Lazaras cu, a kut le a ke ruaktuamnak puan in an tuam ih a hmai tla an tuam; cutiih an òemnak thawn a ra suak ngaingai. Jesuh in, “Phoih uhla feh seh!” tiah a ti.
Jesuh That Dingin An Phiar
(Mat 26:1-5; Mar 14:1-2; Luk 22:1-2)
45 Mari topi dingih a rami Judah mi tampi in Jesuh ih thil tuahmi cu an hmuh tikah amah cu an zum.
46 Asinan mi òhenkhat cu Farasi pawl hnenah an kir ih Jesuh ih thil tuahmi cu an sim òheh.
47 Curuangah Farasi pawl le puithiam upa pawl cu Khonsil pawl thawn an tong aw ih, “Ziangtinso kan tuah ding? Hi pa ih hmuhsaknak a tuah vivomi hi zoh hnik uh!
48 Hitiih kan zoh men ringring a si ahcun mi hmuahhmuah in amah hi an zum dingih cutikah Rom acozah thuneitu pawl in kan Biakinn le kan miphun an siatsuah òheh ding a si,” tiah an ti.
49 Anmah lakih mi pakhat, Kaiafas an timi, cuih kum ah Puithiam Sang a òuantu in, “Nan va aa so!
50 Mi tampi ai ih mi pakhat thih cu miphun phunkhat a pumpi ih siatral òheh hnak cun a òha deuh a si, ti nan thei lo maw si?” tiah a ti.
51 A ngaingai ti ahcun cutiih a òong cu a palungih òongmi a si lo; cuih kum cu amah Puithiam Sang a si vekin Judah miphun ai ah Jesuh cu a thi ding, tiah profet bangin a rak simsungmi a si.
52 A thihnak ding cu anmah hrang lawngah si lo in hmun kipih a òhekdarh aw mi Pathian minung pawl pumkhat ih finkhawmnak ding khalah a si.
53 Cuih ni thok ihsin Judah mi hotu pawl cun Jesuh that dingah thu an phiar.
54 Curuangah Judea pengah Jesuh cu zapi hmuh in khual a tlawng nawn lo; cutawk ihsin a suak ih ramòhing kiangih a ummi Efraim an timi khua ah a feh ih cunah a dungthluntu pawl thawn an um.
55 Judah mi pawl ih Lantak Puai caan a nai thlang ih mi tampi cu puai tuah hlan thianfaiter awknak tuah dingah an khuate ihsin Jerusalem ah an feh ciamco.
56 Annih in Jesuh cu an hawl; Biakinn sungih an tonkhawm awk tikah pakhat le pakhat, “Ziangtin nan ruat? Puai tuahnak ahcun a ra ngai pei maw?” tiah an sut aw.
57 Puithiam upa le Farasi pawl in, “Jesuh umnak a theitu nan um ahcun kan kaih theinak dingah in sim pei,” tiah thu an than.