12
Jesuh Cu Zihmui An Culh
(Mat 26:6-13; Mar 14:3-9)
1 Lantak Puai hlan ni ruk ah Jesuh cu Bethani ah thihnak ihsin a thawhtersal mi Lazaras teih inn ahkhan a va feh.
2 Cutawkah a hrangah zanriah an suang ih Martha in rawl pek a bawm. Jesuh thawn cabuai ih rawl a eitu lakah Lazaras cu a tel ve.
3 Cule Mari in a phun a òha zet le a man a khung zetmi zihmui thawl khat a lak ih Jesuh ih ke ah a toih hnuah a sam in a hnawt sak. Cuih zihmui rim cu inn sung a khat òheh.
4 Jesuh dungthluntu lakih pakhat, Jesuh a zuartu ding Judas Iskariot in,
5 “Ziangahso hi zihmui cu tangka zathum ah zuar in cuih tangka cu mifarah an òhen sawn lo?” tiah a ti.
6 Hitiih a sim tikah mifarah pawl zawn a ruah ruangah a si lo; rukru a si ruangah a si sawn. Tangka bawm kha amah in a keng ih cuih tangka cu amah hrangah a hmang òheu.
7 Sikhalsehla Jesuh in, “Hi nu hi mawhthluk hlah uh! Ka ruak phum ni hrangih a tuah dingmi cu tuah ko seh.
8 Mifarah cu nan lakah an um ringring ko ding; asinain kei cu nan lakah ka um ringring lo ding,” tiah a ti.Ref 12.8 Daan 15:11;
Lazaras Thah An Tum
9 Judah mi tampi in Bethani ah Jesuh a um ti an theih tikah cutawkah cun an feh. Jesuh hmuh duh lawngah si lo in Jesuh in thlan ihsin a thawhtersalmi Lazaras hmuh duh hrimhrim ah an feh.
10 Curuangah puithiam upa pawl in Lazaras khal that ve dingah thu an ruat.
11 Ziangahtile Judah mi tampi in Lazaras ruangah hin anmah puithiam upa pawl cu hnon an tong ih Jesuh sawn kha an zum ruangah a si.
Sunglawi Zet Ih Jerusalem Luhnak
(Mat 21:1-11; Mar 11:1-11; Luk 19:28-40)
12 A thai sun ah Lantak Puai ih a rami miburpi in Jesuh cu Jerusalem ah a ra ding, ti kha an thei.
13 Cuhrangah tuum hnah an lak ih amah hmuak dingah feh phahin,
“Pathian cu thangòhat uh!
Bawipa ih hmin in a ratu cu
Pathian in thluasuahnak pe hram seh!
Pathian in Israel Siangpahrang cu
malsawm hram seh!”
tiah an au ciamco.Ref 12.13 Saam 118:25, 26;
14 Jesuh in laak note pakhat a hmu ih a parah a to; Ca Thianghlim in:
15 “Maw Zion khuapi,
Na thinphang hlah;
Na Siangpahrang cu
laak note parah to in a ra lai a si,” Ref 12:15: Zek 9:9;
tiah a ti bangtukin a kim a si.
16 A dungthluntu pawl in culai ahcun hi thu ih tican hi an rak thei lo. Asinan Jesuh kha sunlawinak ih thawhtersal a si tikah amah thu ahhin Ca Thianghlim in hibangtuk in a rak sim ih amah hrangah hibangtuk in an tuah a si, ti kha an vun mangsal.
17 Jesuh in Lazaras kha thlan ihsin a ko suak ih thihnak ihsin a thawhter lai ih a rak hmu vetu mi tampi in cuih thu cu midang tampi an sim sin.
18 Cubangtuk hmuhsaknak a tuah a si, ti kha an theih ruangah miburpi in an rak hmuahnak a si.
19 Cutikah Farasi pawl cun, “Kan ti tho lo maw; kan kham thei nawn lo hi! Zoh hnik uh, leilung pumpi in a thlun zo hi!” tiah pakhat le pakhat an ti aw.
Grik Mi In Jesuh An Hawl
20 Cuih puai ih Pathian bia dingah Jerusalem ih a hung fehtu mi tampi lakah cun Grik mi tla an tel ve.
21 Filip hnenah an feh ih, “Sayapa, Jesuh hmuh kan duh,” tiah an va ti. Filip cu Galilee peng Bethsaida khuami a si.
22 Filip cu Andru hnenah a feh ih a va sim; cule an pahnih in Jesuh hnenah an va feh ih an va sim.
23 Jesuh in an hnenah, “Milai Fapa in sunlawinak a ngahnak caan a ra thleng zo.
24 Thungaite in ka lo sim: Sangvut ci fangkhat cu leilung sungah tuh ih a thihta lo ahcun amah kel in a tang ringring. A thihta hnu lawngah ci tampi a suahter.
25 Cubangtuk in zokhal amah ih nunnak a duhtu cun a nunnak cu a sung ding; asinain zokhal hi leilung ah amah ih nunnak a huatu cun kumkhua hrangin a nunnak cu a neita ding.Ref 12.25 Mat 10:39, 16:25; Mar 8:35; Luk 9:24, 17:33;
26 Zokhal keimah i rian duhtu cun i thlun hrimhrim a òul dingih ka umnak ah a um ve ding. Cule zokhal keimah i riantu cu ka Pa in upatnak a pe ding,” tiah a ti.
Jesuh In A Thihnak Ding Thu A Sim
27 Jesuh in, “Ka thinlung a baang tuk; ziangso ka sim ding? ‘Ka Pa, hi caan hi ka parah thlenter hram hlah aw,’ ka ti ding maw? Asinan hi tuarnak sungih thleng dingah leilungtlun ih ka rat sannak cu hihi a si fawn!
28 Ka Pa, na hmin cu sunloih ko aw,” tiah a ti.
Cule van ihsin aw a rung thang ih, “Ka sunloih zo ih ka sunloihsal hrih ding,” tiah a ti.
29 Cuih aw cu cutawkih a dingmi miburpi in an theih tikah mi òhenkhat in, “Khua a ri,” tiah an ti; a òhen in, “Vancungmi in a run bia a si,” an ti.
30 Sikhalsehla Jesuh in an hnenah, “Hi aw a rung than hi keimah ih hrangah a si lo, nanmah ih hrangah a si sawn.
31 Hi leilung hi thuòhennak a ton caan a kim zo; atu ah hi leilung uktu cu dawi hlo a si ding.
32 Leilung ihsin khai ka si tikah mi hmuahhmuah ka hnenah ka hiip thluh ding,” tiah a ti.
33 Hitiih a ti tikah ziangbangtuk thihnak a tuar ding ti kha a langternak a si.
34 Miburpi in, “Kan Daan in Messiah cu kumkhua in a nung ding, tiah in sim. Cuti asile ziangtinso Milai Fapa cu khai a si ding tiah nang in na ti? Hi Milai Fapa hi zoso a si?” tiah an ti.Ref 12.34 Saam 110:4; Isa 9:7; Ezk 37:25; Dan 7:14;
35 Jesuh in, “Tleunak cu nan hnenah tikcu malte sung a um hrih ding. Tleunak nan neih sungah nan fehnak lamzin ah cun feh hrih ko uh; cuticun thimnak in a lo man lo ding; ziangahtile khawthim sungih a feh pawl cun khuilamah kan feh ti an thei lo.
36 Cuhrangah tleunak nan neih lai ahcun, tleunak ih minung nan si theinak dingah, tleunak cu zum uh,” tiah a ti.
Cutiih Jesuh in a sim hnuah a suak ih an hmuh thei lonak hmun ah a relh.
37 An mithmuh rori ah hmuhsaknak tampi a tuah nain amah cu an zum lo.
38 Cumi cu profet Isaiah in:
“ Bawipa, kan thu simmi cu
zo in so an zum?
Zo hnenah so Bawipa in
a huham a langter?”
tiah a rak timi a kimnak dingah a si.Ref 12.38 Isa 53:1;
Mi In An Zum Lo
39 Cule an zum thei thotho lo, ziangahtile Isaiah thotho in:
40 “Pathian in an mit a cawtter ih,
An thinlung khal a pitter.
Cuti a si lo ahcun an mit in
an hmu pang dingih,
An thinlung in an thei pang ding;
Ka lam an hoi pang dingih,
A dam tla ka damter pang ding,
tiah Pathian in a ti,”Ref 12:40: Isa 6:10;
tiin a rak sim fawn.
41 Isaiah in hiti a simnak cu Jesuh sunlawinak kha a rak hmu cia zo ih a thu khal a rak sim zo ruangah a si.
42 Cutiin a si ruangah Judah mi hotu tampi in Jesuh cu an zum; Sikhalsehla Farasi pawl in sinakok ihsin in suah pang ding ti phan ah Jesuh an zumnak cu langhngan in an sim ngam lo.
43 Pathian hnenih sunlawinak ngah hnakin minung hnenih sunlawinak ngah an duh sawn.
Jesuh Ih Òongkam In Thuòhennak
44 Jesuh cun aw ring zet in, “Zokhal keimah i zumtu cu keimah i zum lawng a si lo, i thlahtu khal a zum a si.
45 Zokhal keimah i hmutu cu i thlahtu khal a hmu a si.
46 Zokhal keimah i zumtu cu khawthim sungih a um lonak dingah hi leilungtlun ahhin tleunak in ka ra zo.
47 Zokhal ka thu simmi a thei ih a thlun lotu cu kei cun a thu ka òhen lo ding. Leilung thuòhen dingah ka ra lo, rundam dingah ka ra.
48 Zokhal i hnongtu le ka thu simmi a pom lotu cu thuòhentu pakhat a nei. Ka òongmi hi ni netabik ni ah a thuòhentu ah a cang ding!
49 Ziangahtile keimah thuneihnak huham ih ka simmi a si lo, i thlahtu ka Pa in ka òong ding le ka sim ding kha thu i pek vekin ka sim a si.
50 Cule a thupekmi cu kumkhua nunnak a si, ti ka thei. Curuangah ka simmi hi ka Pa in sim dingih i fialmi a si,” tiah a ti.