20
Raldo Dingah Israel A Tiar Aw
1 Israel miphun pawl, saklam bik Dan ihsin thlanglam bik ih Beersheba tiang, le nisuahnak lam ih Gilead ram tiangin, an zate in an suak ih thinlung khat pu in Mizpah ah Bawipa ih hmaiah an tongkhawm thluh.
2 Hitiih Pathian minung pawl a khawmmi lakah Israel miphun pawl ih hotu kim tein an tel thluh. Ke ralkap lawnglawng thawng zali an si.
3 Israel miphun pawl hmuahhmuah Mizpah ah an feh thluh ti kha Benjamin mi pawl in an thei.
Cule Israel mi pawl cun, “Na nupisun an thahnak thuhla in sim hnik,” tiah Levi miphun pa cu an ti.
4 Cutikah a nupisun an thah mipa Levi pa cun, “Ka nupisun le keimah cu Benjamin ramsung Gibeah khua ah zan riak dingin kan feh.
5 Gibeah mi pawl cu an ra ih keimah thah tum in kan riahnak inn cu zan ah an kulh òheh. Ka nupisun sawn an sualpi ih a thi.
6 Cutikah a ruak cu ka phur ih ka can thluh ih Israel ram khuazakip ah ka kuat. Hi khua mi pawl in thil òha lo le thil borhbah kan parah an tuah a si.
7 Hitawkih a ra suakmi hi Israel mi hlir kan si. Ziangtinso tuah sehla a òha ding tiah nan ruat?” tiah a ti.
8 Cutikah an zate in hmunkhat ah an ding ih, “Zohman inn ah kan tlung lo pei. Deu sungih a ummi kan si khalle, inn ngaingai sungih a ummi kan si khalle, kan tlung lo pei.
9 Kan tuah dingmi cu hitiin a si pei: Gibeah khua dotu dingah camcawhfung zuk in mi kan hril pei.
10 Israel minung zate ih òhenhra òhenkhat in kan ralkap pawl hrangah rawl kan phur pei. A dang hmuahhmuah cun Israel ram sungih thil borhbah an tuah ruangah Gibeah mi pawl kan hrem pei,” tiah an ti.
11 Cuticun Israel mi hmuahhmuah cu thu khat vua in Gibeah khuapi siim dingah an khawm aw.
12 Israel miphun pawl cun Benjamin miphun ih ramsung khuazakip ah mi an thlah ih, “Ziangtluk thil òha lo so nan tuahmi hi a si?
13 Gibeah khuasung ih mi huatsuak pawl cu kan hnenah rak keng uh; kan that dingih cuticun Israel ram kan thianfaiter ding,” tiah an ti. Sikhalsehla Israel mi pawl ih òongmi cu Benjamin mi pawl in zianghman ah an siar lo.
14 Cule Benjamin ram sungih khuapi hmuahhmuah in mi tampi Israel do dingin Gibeah khua ah an ra.
15 Cuih sun lawnglawng ah an khuapi pawl ihsin ralkap thawng kul hluanruk, ralnam keng fetfet, an ko. Cuih tlunah Gibeah khua mi pawl in a hleice ih hrilmi ralkap za sarih an khawm.
16 Ralkap hizat sung ihsin an hrilce mi kehtlak minung za sarih cu an zate in, lungherhden thiam lam ahcun, samphang pakhat hman òhelh lo ih sai thei pawl an si.
17 Cun Israel mi pawl cun Benjamin mi siar lo in raldo thiam zet nam keng ralkap thawng zali an ko khawm.
Benjamin Mi An Do
18 Israel mi pawl cu Bethel khua ih Pathian biaknak hmun ah an feh ih Pathian hnenah, “Zo hrin in so Benjamin cu a do hmaisa ding?” tiah an ron.
Bawipa in, “Judah hrin in do hmaisa hai seh,” a ti.
19 Curuangah Israel mi pawl cu a thaizing an tho ih Gibeah khua kiangah an riak.
20 Cule Benjamin do dingah an pok ih ralkap pawl cu Gibeah khua ih hmai zawn ah an òang.
21 Benjamin ralkap pawl cu khuasung ihsin an ra suak ih an do aw ih cuih ni ah Israel ralkap thawng kul hluanhnih an that.
22-23 Israel mi pawl cu Bethel ah an hung feh ih Bawipa ih hmaiah zanlam tiang ninghang riahsia in an òap. Cule annih in, “Kan unau Benjamin mi do dingah kan fehsal pei maw?” tiah Bawipa an ronsal.
Cutikah Bawipa in, “Feh uhla dosal uh,” tiah a ti.
Curuangah Israel ralkap pawl cu an tha a thosal ih an ralkap pawl a hmaisa ih an òannak hmun thotho ah an òantersal.
24 Hihi Benjamin do dingah a vei hnihnak an tiarawknak a si.
25 Cule a hmaisa vek thotho in Benjamin ralkap pawl cu Gibeah khuasung ihsin an ra suak ih Israel ralkap raldo thiam zet pawl cu thawng hleiriat an that lala.
26 Cutikah Israel mi hmuahhmuah Bethel ah an hung feh ih ninghang riahsia in an òap ciamco. Bawipa ih hmai ahcun zanlam tiang rawl khal ei lo in an to. Cule remnak thawinak le meiur thawinak pawl cu Bawipa ih hnenah an pek.
27 Culai ahcun Pathian Thukam Kuang cu Bethel ah a rak um ih,
28 Eleazar ih fapa Finehas in puithiam a òuan. Eleazar cu Aaron ih fapa a si. Cun Bawipa ih hnenah thu an ronsal ih, “Kan unau Benjamin mi pawl do dingah kan poksal pei maw, asilole kan baang ding so?” tiah an ti.
Cutikah Bawipa in, “Do uh. Thaisun cu anmah nehnak ka lo pe ding a si,” tiah a ti.
29 Curuangah Israel mi pawl cun Gibeah kiangkap ah ralkap hrekkhat a thup tein an bawhter.
30 Cule a ni thumnak ni ah Benjamin do dingah an feh ih a hlan vek thotho in an ralkap pawl cu Gibeah khua ih hmai ahcun an òang.
31 Benjamin ralkap pawl cu a hlan vek thotho in an khuasung ihsin an ra suak ih Israel ralkap hrekkhat pawl Bethel lamzin le Gibeah lamzin le hramlak ah an that. An thahmi cu ralkap sawmthum tluk an si.
32 Benjamin ralkap pawl cun, “A hlan vek thotho in kan neh ding a si hi,” an ti.
Asinan Israel mi pawl cun, “Dunglam ah kan siip vivo pei ih Benjamin ralkap pawl an khua suahsan thluh hai sehla lamzinpi hi run zawh hai seh,” an ti.
33 Curuangah Israel ralkap pawl tam sawn cu dunglam ah an siip ih Baal-tamar ah an khawm aw thluhsal. Cule Gibeah khua kiangih a rak thup aw mi ralkap pawl cu an thuhawknak ihsin an ra suak.
34 Israel mi sung ihsin hrilcemi ralkap thawnghra pawl in Gibeah khua cu an nam ciamco ih nasa zet in an do aw. Asinan Benjamin mi pawl cun kan van a duai thlang ding a si, ti an thei lo.
35 Benjamin ralkap pawl parah nehnak cu Bawipa in Israel mi hnenah a pek zo. Curuangah Israel mi pawl in ni khat sungah Benjamin ralkap thawng kul hluannga le zakhat an that.
36 Cutik lawngah Benjamin mi pawl in kan sung a si, ti an thei.
Israel mi pawl cun Gibeah kiangkap ih a thup aw mi an ralkap hrekkhat pawl kha an rinsan ruangah Benjamin ralkap pawl ih hmai ahcun dunglam ah an siip vivo.
37 Hi a thup aw mi ralkap pawl cu hmakhat teah Gibeah khua sungah an lut ih an òhek aw ih khuasung mi hmuahhmuah cu an that thluh.
38 Israel mi pawl le a thup aw mi an ralkap pawl cu tiamawknak an rak nei. An tiamawknak cu: Gibeah khua sung ihsin meikhu tam zet van ih a kaimi an hmu asile,
39 Israel mi pawl ral an donak ah dunglam siip nawn lo in hmailam ih nor ding an si. Benjamin mi pawl in cutiang ahcun Israel mi sawmthum an that zo ih anmah le anmah cu, “A hlan vek thotho in kan neh a si hi,” an ti aw rero.
40 Cutikah an tiam awk cia vekin Gibeah khuasung ihsin meikhu a suak ngualngo kha an hmu. Benjamin ralkap pawl in an dunglam an hei zoh tikah an khua cu a pum tein a kang rero kha an hmu ih an mang a bang ngaingai.
41 Cuve tein Israel ralkap pawl cu an hersal ih, an nor ciammam ih, Benjamin ralkap pawl cu an lung hmuah a aa thluh; ziangahtile kan ci in hmit thluh thlang ding a si, ti an thei.
42 Curuangah dunglam ah an siip ih hramlak lamah an tlan. Asinan an tlan suak thei lo. Israel ralkap burpi pawl le khuasung ihsin a ra mi ralkap pawl in an ciipton ih an sat that ciamco.
43 Cutiih an ciipton hnuah an dawi ih Gibeah ihsin nisuahnak lam tiang an dawi vivo ih lamzin tluanah an thah phah vivo.
44 Benjamin ralkap òha bik pawl thawng hleiriat an that.
45 A dang pawl cu Rimmon ih Lungpi lamah hramlak ah an tlan. Lam tluanah thawngnga an that. A tanglaimi pawl cu Israel mi pawl in Gidom tiang an dawi ih an sat that phah vivo. Cunah thawnghnih an that.
46 Azate kom ah, Benjamin ralkap ralòha zetzet lawnglawng thawng kul hluannga an that.
Israel Mi In An Neh
47 Asinan minung zaruk cu Rimamon Lungpi lamah hramlak ah an tlan suak ih cutawkah thla li an um.
48 Cule Israel mi pawl cu an kirsal ih khuasung ah an feh ih mipa siseh, nunau siseh, nauhak le òilva tiangin an hmuhmi hmuahhmuah an thah thluh. Cuih kiangkap ih khua hmuahhmuah khal an ur thluh fawn.