28
Òaiar Siangpahrang Parih Profet Òong
1 Bawipa in ka hnenah,
2 “Milaipa, Òaiar uktu bawi hnenah Cungnungbik Bawipa keimah ih ka òongmi hi sim aw: Na zum aw tuk ih khawzing ka si na ti. Khawzing ka si ih siangpahrang tohkham parah ka to ih tifinriat in i kulh òheh, khawzing ka si ko, na ti. Nangmah le nangmah cu khawzing tluk ah na ruat ngaingai aw ding nain khawzing cu na si lo, milai lawng na si.
3 Daniel hnakin ka fim sawn, ka hnen ihsin thuh theimi thuthup a um lo, tiah na ruat.
4 Na fimnak le na thil thiamnak in sui le ngun thawn a lo lianter ngai.
5 Sumtuah cu na thiam zet ih a miat tampi na ngah. Na len ruangah na puarthau ngaingai.
6 “Atu ah Cungnungbik Bawipa keimah ih ka òongmi cu hitiin a si: Khawzing tluk in ka fim tiih na ruahawk ruangah,
7 nangmah do dingah, zianghman mizawn ruat lo ral pawl, ka rak hruai ding. Na fimnak le na thil thiamnak thawngin thil mawi zet tampi na khawl zomi pawl cu an siatsuah òheh ding.
8 Nangmah an lo that dingih a ciarmi thlan ah an lo phum ding.
9 Nangmah that dingih an rat tikah khawzing sokhaw ka si na ti thotho ding maw? Nangmah a lo thattu pawl thawn nan ton awk tikah cun khawzing si lo in milai lawng na si ko ding.
10 Pathian thei lo ramdangmi kut ah uico bangin na thi ding. Cungnungbik Bawipa keimah in thu ka pek zo,” a ti.
Òaiar Siangpahrang A Tla
11 Bawipa cu ka hnenah a òongsal.
12 “Milaipa, Òaiar siangpahrang ih a tuar dingmi hi ruat in riahsia in um aw. A hnenah Cungnungbik Bawipa keimah ih ka òongmi hi sim aw: Mi famkim na rak si ih zohòhim tlak na rak si. Ziangtluk mifim le mipiang so na rak si?
13 Pathian hmuan, Eden ah na rak um ih lungmankhung a phunphun na rak hruk: Ruby le daimon lungmankhung, a aihre lungmankhung, a sen karnelian le jasper lungmankhung, safaira, emerald le garnet lungmankhung pawl na hruk. Sui hlawnthil tampi na nei. Cupawl cu semsuah na si ni ih na hrangih tuahmi pawl an si.
14 A sunglawi vancungmi cherub cu nangmah kiltu dingah ka ret. Ka tlang thianghlim ah na um ih a tle zohzomi lungmankhung lakah na feh.
15 Semsuah na si ni in thil òha lo tuah na thok ni tiang na nuncan cu soisel ding zianghman a um lo.
16 Thil na lei na zuar ih na buai ih cin le daan nei lo in sualnak ah na thleng a si. Curuangah ka tlang thianghlim in ka lo dawi ih a lo kiltu vancungmi in a tleumi lungmankhung pawl lakin a lo dawihlo a si.
17 Mipiang na si ruangah na hngal ih na hminthannak in mi-aa ah a lo canter. Curuangah leilung ah ka lo hlon ih siangpahrang dangdang ih ralrinnak dingah ka lo tlansan.
18 Thil na lei ih na zuarnak ah a baalmi tampi na tuah ruangah na biakinn hmun pawl tla na borhhlawhter òheh. Curuangah khuapi cu meisa in ka ur ih leilung ah a ciam zo. A lo zohtu hmuahhmuah in vutcam ih na can kha an lo hmu.
19 Na van a duai, na cem tariai; a lo theitu miphun hmuahhmuah cu an tuk a sum; nangmah vekah kan cang pang ding, ti an phang,” a ti.
Sidon Parih Profet Òong
20 Bawipa in ka hnenah,
21 “Milaipa, Sidon khuapi òhatlonak hi rel aw:
22 An hnenah Cungnungbik Bawipa keimah ih ka òongmi hi sim aw: Maw Sidon, keimah hi na ral ka si. Na parih thil ka tuahmi ruangah mi in, in thangòhat ding. Na sungih a ummi pawl ka hrem tikah ziangtluk a thianghlim mi ka si, ti kha ka langternak a si ih cutiin Bawipa ka si hi in thei ding.
23 Natsia ka run thlengter dingih na lamzin ah thisen a luang ding. A kiil ih kip in an lo do dingih na minung pawl an that ding. Cule Bawipa ka si hi in thei ding,” tiah a ti.
Israel In Malsawm A Dong Ding
24 Bawipa in, “Ramhnen pawl, Israel a hmuhsuamtu le a tisiatu pawl cu pakhat hman Israel hrangah hling le so vek an si thei nawn lo ding. Cule keimah hi Bawipa ka si kha in thei ding,” a ti.
25 Cungnungbik Bawipa in, “Israel mi pawl cu ka òhekdarhnak ram pawl ihsin ka kirtersal dingih cuticun miphun hmuahhmuah in a thianghlim mi ka si kha in thei ding. Israel mi pawl cu anmah ih ram, ka siahhlawh Jakob hnenih ka rak pekmi ram ah an um ding.
26 Cutawkah daihnak thawn an um ding. Inn an sak dingih sabit hmuan an tuah ding. Anmah a hmuhsuamtu le a tisiatu an kiangkap ram pawl cu ka hrem dingih Israel cu thlangam tein a um ding. Cule keimah hi Bawipa an Pathian ka si kha in thei ding,” tiah a ti.Ref 28.20-26 Joe 3:4-8; Zek 9:1, 2; Mat 11:21, 22; Luk 10:13, 14;