27
Òaiar Khuapi Phumnak Òahhla
1 Bawipa in ka hnenah,
2 “Milaipa, tipikap ah a um ih miphun dangdang tipikap ih a um vemi thawn pursum leilawn a tuahtu,
3 Òaiar khuapi hrangah mithi phumnak hla sak aw. Hihi Cungnungbik Bawipa ih simmi a si tiin sim aw:
Maw Òaiar, ‘Mawinak lam ahcun
ka kim a si,’ na ti.
4 Na inn cu tifinriat a si;
A lo dinsuahtu pawl in lawng
mawi zet vekah an lo tuah.
5 Na thing ah Hermon Tlang ih
farthing an hmang;
A lo dinsuahtu pawl cun.
Lebanon ihsin sidar thing an lak,
Na puan thlainak dingah.
6 Bashan ram in òhil thing an lak,
Na lawng hlaunak dingah.
Saipras ih farthing in
na zial pawl cu an tuah,
Saiho in an khuh ih an mawiter.
7 Na puanzar cu pat femte in an tah,
Izipt ram ih òelhmi coihcinmawi puan a si.
Lam hlapi in theih a theih;
Na parih thlahliap puanzar cu,
Puan òha bik pawl an si.
Saipras tikulh ih puan sendup an si.
8 A lo hlautu pawl cu
Sidon le Arvad khuami an si.
Na mithiam pawl cu lawng kiltu an si.
9 Hi lawng tuahtu pawl cu
Byblos ih a zirfeltu an si.
Na sumdawr tuahnak ahcun,
Tipi parih lawng kiltu hmuahhmuah in
sum an tuah a si.
10 Persia, Lidia le Libia ram ih ralkap pawl in na ralkap an òuan. An ralphaw le an lukhuh pawl cu na ralkap inn ah an thlai. Na hrangih hminthannak a ngahtu pawl cu anmah an si.
11 Arvad ralkap pawl in na ralhruang pawl an kil ih Gamad ralkap pawl in na ralvennak donhleisang pawl an veng. An ralphaw pawl cu na phar parah an thlai. A lo mawitertu cu anmah an si.
12 “Spain ram ah sum na tuah ih na thilri tampi ngun, thir, rangva, le suan thawn na thleng.
13 Grik ram, Tabul le Meshek ram khalah sum na tuah ih na thilri dar ih tuahmi thilri le sal pawl thawn na thleng.
14 Na thilri dangdang thawn hnaòuantu rang pawl, raldonak rang pawl le laak pawl cu Beth Togarmah ihsin na thleng.
15 Rhodes mi pawl thawn khal pursum leilawnnak na tuah. Tipi kapih a ummi ram pawl in na thilri cu saiho le thingdum mankhung in an lo thleng.
16 Na zuarmi thilri pawl le na òuansuahmi thilri pawl cu Siria mi in an lo lei. Lung hring mankhung, puan sen, coihcinmawi puan, pat femte ih tahmi hnipuan, tipi sung ihsin lakmi kep le ruby lungmankhung pawl cu na thilri ai ah an lo pek.
17 Judah le Israel in na thilri ai ah sangvut, khuaitizu, olif hriak le rimhmui pawl an lo pek.
18-19 Damaskas mi pawl in na zuarmi thilri le na òuansuahmi pawl an lo lei ih cuih ai ah Helbon ihsin sabitti le Sahar ihsin tuuhmul an lo pek. Na thilri thawn an tuahciami thir le rimhmui nan thleng aw.
20 Dedan mi pawl in na thilri pawl ai ah rangkung dammi puan an lo zorh.
21 Arab mi pawl le Kedar ram uktu pawl in na zuarmi thilri ai ah tuu le tuufaate le me an lo pek.
22 Sheba le Raamah sumtuahtu pawl in na thilri ai ah sui le ngun hlawnthil, sui le rimhmui òha bik pawl an lo pek.
23 Haran, Kanneh le Eden khua pawl, Sheba ih sumtuahtu pawl le Asshur le Kilmad pawl in na hnenah sum an tuah.
24 Na hnenah hnipuan òha le hnipuan mawi, hnipuan sendup, coihcinmawi puan, a tleumi puanpher, òha zet ih an hrual mi hripi le hrite pawl an zuar a si.
25 Na thil zuarmi pawl cu thil phurtu lawng tum bik pawl in a bur a bur in an phur a si.
“Rit zet ih thil phurtu,
Tifinriat ih lawng bangtuk na si.
26 A lo hlautu pawl in tifinriat par
an lo thlenpi tikah,
Nisuahnak lam thlipi in a lo soihsiat;
Leilung thawn a hlatnak hmunah.
27 Na lennak le na thil zuarmi hmuahhmuah,
Long kiltu na minung pawl,
Na lawng parih zungthiam pawl le
sumtuahtu pawl,
Lawng parih ralkap hmuahhmuah,
An zate in tifinriat ah an pil,
Na lawng thli ih a soihsiat tik ahcun.
28 A pil cuahcomi lawng kiltu pawl ih
Au thawm cu tipikap ah a ra thang!
29 “An lawng zate an tlansan òheh,
lawng kiltu hmuahhmuah tikap
an thleng òheh.
30 Nangmah ngai in nasa zet in an òap,
An lu cu leivut an phulh aw ih
Vutcam lakah an lawng ciamco.
31 Nangmah ruat in an sam an met òheh,
Buri hnipuan an hruk òheh.
An thin na in mitthli tla in an òap.
32 Na hrangah mithi phumnak hla an seh:
‘Òaiar cu zo in so a òhim thei ding e,
Tipi sungih a pil zomi Òaiar cu?
33 Na thilri pawl tipi ral a thlen tikah cun,
Mi hmuahhmuah ih haimi na kimter e.
Na thilri man òha zetzet pawl cun,
Siangpahrang pawl na lianter òheh hai e.
34 Atu cu tipi sungah na pilpi zo,
Tipithuanthum taw ah na pilta e.
Na thilri le a lo riantu hmuahhmuah cu,
Nangmah thawn tipi sungah
nan hlota e,’ an ti.
35 Tifinriat kapih a ummi miphun pawl in na parih a thlengmi an hmuh tikah an mang a bang. An siangpahrang pawl hman an tuk a sum ih an mithmai ah òihnak a lang.
36 Nang cu na liam zo, kumkhua in na liamta zo; leilung pumpi ih sumtuahtu pawl cu an tuk a sum, nangmah vek kan cang pang ding, ti an phang,” a ti.Ref 27.25-36 Thup 18:11-19;