9
Bawipa Ih Thu An Ngai Lo
(Suah 32:1-35)
1 “Maw Israel mi pawl, ngai uh! Tuihni ah Jordan tiva nan tan thlang dingih nanmah hnakin a tum deuh le a cak deuhmi miphun pawl ih umnak ram nan luah ding. An khuapi pawl cu an tum zetzet ih an ralhruang pawl cu van an tiang.
2 An minung pawl cu an sang ih an cak zet fawn; Anakim timi mikei vek phun an si ih “Zovek hmanih neh ding rual an si lo,” an ti òheumi cu nan theih zomi a si.
3 Sikhalsehla tuih sun ah nan mithmuh ah Bawipa nan Pathian cu nan hmaiah meisa hlio bangin a feh ding. Hmai ah nan nor deuhdeuh tikah amah in a neh dingih a lo kam cia bangtukin nan ral pawl cu nan dawisuak dingih nan siatsuah òheh ding.
4 “Cutiin Bawipa nan Pathian in a dawisuak tikah, “Miding kan si ruangah hi ram luah dingin in thlenpi a si,” tiah ti hlah uh. Miding nan si ruangah a si lo; hi miphun pawl hi miòha lo tuk an si ruangah Bawipa in a dawisuak a si sawn.
5 Miòha nan si ruangah le thil dik nan tuah ruangah Bawipa in an ram a lo pek a si lo. Hi miphun pawl an òhat lo ruangah le nan pupa Abraham, Isaak le Jakob pawl hnenih thukamnak a tuahmi a kimter tum ruangah a dawisuak ding a si.
6 Pek tlak nan si ruangah hitluk ramòha hi Bawipa in a lo pe ding a si lo, ti cu fiang tein thei uh. Thungai ih ti ahcun nannih cu milungruh phun nan si.
7 “Cule nelrawn ah ziangbangtuk in Bawipa nan Pathian cu a thin nan hengter ti tla hngilh hlah uh. Izipt ram ihsin nan suah ni thokin tuih sun hitawk nan thlen ni tiangah hin Bawipa cu nan dodal ringring.
8 Sinai Tlang hmanah Bawipa cu a thin nan hengter; nanmah siatsuah òheh duh tiangin a thin a heng a si.
9 Bawipa in nanmah thawn thukamnak a tuahmi ngannak lungpheng pawl la dingah tlang parah ka hung feh. Cutawk ahcun ni sawmli le zan sawmli ka um ih zianghman ka in ka ei lo.Ref 9:9 Suah 24:18;
10 Cuih hnuah Bawipa in lungpheng pahnih i pek. Tlang parih nan tonkhawm awk ni ah meisa sungin nan hnenih a òongmi pawl kha amah ih kut rori in hi lungpheng parah a ngan.
11 A si! Ni sawmli le zan sawmli hnuah thukam a ngannak lungpheng pahnih cu Bawipa in i pek a si.
12 “Cule Bawipa in ka hnenah, “Zamrang tein tlangpar ihsin vung òum aw; ziangahtile na minung pawl, Izipt ram in na hruaisuak mi pawl in thil borhbah le thil sual an tuah. An thlun dingmi thu ka pekmi pawl ihsin an pial ih anmah ih hrangah milem an tuah zo a si,” a ti.
13 “Cun Bawipa in ka hnenah, “Milungruh pawl hrimhrim an si, tihi ka thei zo.
14 Curuangah i kham duh hlah. Ka siatsuah thluh hai dingih leilung par ihsin an hmin cu ka phiathlo òheh ding. Cule annih hnakin lian deuh le cak deuh miphun pakhat nangmah ih sung ihsin ka suahter ding a si,” i ti.
15 “Cuticun thukam ngannak lungpheng pahnih keng phahin tlangpar ihsin ka òum. Cule tlangpar cun meisa alhhlio cu a suak zukzo.
16 Cuih caan rei lote sungah Bawipa nan Pathian ih thupekmi cu nan bal ih nan suingun titter tahrat in cawcang lem nanmah ih hrangah nan tuah ih Bawipa ih parah nan sual ngaingai, ti cu ka mit rori in ka hmu.
17 Curuangah nan hmaika ah lungpheng pahnih cu ka deng ih sopòheh ko in ka khuai a si.
18 Cuih hnuah Bawipa ih hmaika ahcun ni sawmli le zan sawmli sung leilung ah ka boksal; Bawipa ih parih nan sual ruangah le a thin nan hengter ruangah cuticun ka um ih rawl khal ka ei lo, tidai khal ka in lo.
19 Nanmah siatsuah thluh tlak in a thin a heng ruangah Bawipa ih thinhennak cu ka òih zet a si; asinain cuih òum khalah Bawipa in ka thu cu i theih sak.Ref 9:19 Heb 12:21;
20 Cuih tlunah Bawipa cu Aaron parah thah duh khop tiangin a thin a heng fawn; curuangah Aaron hrang khalah ka dil ciamco.
21 Cule nan sual mualphonak, nan thilri in nan tuahmi cawcang lem cu ka lak ih meisa sungah ka paih. Ka khuai òheh. Ka rialdip òheh hnuah a vut cu tlangpar ihsin a rung luangmi tivate ah ka hlon.
22 “ Bawipa nan Pathian cu Taberah, Massah le Kibroth Hattaavah ih nan um lai tla ah a thin nan hengter.Ref 9:22 Suah 17:7; Mipum 11:3;
23 Cule Kadesh Barnea nan um lai khalah a lo pek dingmi ram ih va feh dingah le va luah dingah a lo thlah nain a thu nan el ih nan dodal thotho a si; Bawipa cu nan rinsan lo ih a thu khal nan thlun lo.Ref 9:23 Mipum 13:17, 31; Daan 1:21, 26; Heb 3:16;
24 Nanmah ka lo theihtir ihsin Bawipa dodaltu nan si ringring.
25 “Cutiih nanmah siatsuah thluh a tum ruangah cun Bawipa ih hmaiah ni sawmli le zan sawmli sung ka bok.
26 Cule thla ka cam ih, “Maw Bawipa Pathian, na baan thacak le na huham thawn Izipt ram ihsin na suahmi na minung pawl hi siatsuah hram hlah aw.
27 Na salpa Abraham, Isaak le Jakob pawl vun ruat awla hi mi pawl ih lungruhnak, borhhlawhnak le sualnak pawl hi zianghman ah siar aw hlah.
28 Cuti si lo ih na thah thluh hai a si ahcun, a thukam vekin a minung pawl cu Kanaan ram ah a thlenpi thei lo a si, tiah Izipt mi pawl in an lo ti ding. A huat ruangah a suahpi ih nelrawn ah an zate in a that òheh a si tiah Izipt mi pawl in an lo ti ding.
29 Ziangvek an va si khalle hi minung pawl cu nangmah ih miphun si dingah na hril zomi an si ih na baan phar in le na huham thawn Izipt ram ihsin na suahpi zomi an si,” tiah ka ti.”