18
Korin Khua Ah
1 Cuih hnuah Paul cu Athens ihsin a feh ih Korin khua a thleng.
2 Cutawkah Pontus ram ih a suakmi Judah mi Aquila a tong. Aquila cu a nupi Prisilla thawn Italy ihsin a ra tlanmi an si. Ziangahtile Rom siangpahrang Klaudius in Judah mi hmuahhmuah cu Rom khua ihsin a dawi ruangah an tlan. Paul cun a va tong hai ih,
3 an hnenah a cam ih anmah thawn hna a òuan. Aquila le Prisilla cu puanthlam tuah in pumcawmmi an si ih anmah vekin Paul khal puanthlam tuah in a pum a cawm aw ve.
4 Sabbath nitin tein sinakok ah Judah mi le Grik mi pawl an thinlung fiangter dingah thu an ruah aw, an el aw òheu.
5 Masidonia ihsin Silas le Timote an ra thlen tikah Paul cu a tikcu neihmi hmuahhmuah in Pathian thusimnak ah a hmang ih Jesuh cu Messiah taktak a si tiah Judah mi hnenah a sim ciamco.
6 Annih in Paul cu an engtai ih òong siava tla in an leh tikah Paul in a lungkimlonak langternak ah a hnipuan ih leivut kha a thinta ih, “Nan hloral a si ahcun nanmah ih mawh a si ding! Kei i mawhthluk hlah uh! Atu ihsin Zentail mi hnenah ka feh ding!” tiah a ti.
7 Curuangah a feh ih Zentail mi Titias Jastas an timi pa inn ah a um; Titias Jastas cu Pathian a betu a si ih a inn cu sinakok kiangte ah a um.
8 Sinakok uktu upa bik Krispas khal a sungkhat pawl thawn Bawipa an zum; cule Korin khuami tampi tla in Pathian thu cu an thei ih an zum ruangah baptisma an lak.
9 Zankhat ah Paul in langnak a hmu ih cuih sung ihsin Bawipa in, “Paul, òih hlah! Sim rero ko aw, na bei dong hlah!
10 Na hnenah ka um a si. Zohman in harnak an lo pe thei lo ding, ziangahtile hi khuasung ih mi tampi cu ka minung an si,” tiah a ti.
11 Curuangah Paul cu kum khat le a hrek sung a um ih mipi hnenah Pathian thu a zirh ringring.
12 Gallio in Akhaia ram uktu Rom Mangki a òuan lai ah Judah mi pawl an tongkhawm aw ih Paul cu an kai ih zungah an suahpi.
13 “Hi pa hin mi tampi hnenah kan daan thawn a kaih aw lomi Pathian biakdan a zirh a si,” tiah an ti.
14 Paul a hung òong zik zawng ah Gallio in Judah mi hnenah, “Thil òha lo le thil sual pakhatkhat tuah ruangah a si ahcun Judah mi pawl nan parah thinlung sau zet in ka um ding.
15 Sikhalsehla atu cu nan biaknak ih òong fang le hmin le nan daan ruangih thu el aw nan si ruangah nanmah tein va relcat uh! Cubangtuk thu ahcun thuòhentu ka si thei lo ding,” tiah a ti.
16 Cule a zung ihsin Judah mi pawl cu a dawi òheh.
17 Sinakok inn uktu Sosthenes kha an zate in an kai ih zung hmai rori ah an vuak. Asinan Gallio cun zianghman ah a siarsak lo.
Antiok Ah A Kirsal
18 Paul cu Korin khua ih zumtu pawl thawn ni tampi sung an um hnuah Prisilla le Aquila thawn lawng in Siria ah an feh. Kenkhria ihsin lawng in an feh hlanah thutiamkamnak a rak tuah zo bangtukin Paul cu a lu a met.r 18:18 A lu a met ti tikah Judah daan ahcun thu tiamkamnak ka thlun ti langternak ah an lu an metdan a si.Ref 18.18 Mipum 6:18;
19 Efesa khua an thleng ih cutawkah Prisilla le Aquila cu a taan. Sinakok ah a lut ih Judah mi pawl thawn thu an ruah aw.
20 Rei deuh um dingin an sawm nain a lung a kim lo.
21 A feh zawng ah thu a cahta ih, “Pathian lungkimnak a si ahcun nan hnenah ka rasal leh ding,” tiah a ti. Cule Efesa ihsin lawng in a feh.
22 Sisaria a thlen tikah Jerusalem khua ah a lan ih cutawkih kawhhran kha a tongta ih Antiok ah a hung fehsal.
23 Cutawkah tawkfang sung a um hnuah a poksal ih Kalatia le Fri zia ram a tlawng ih zumtu hmuahhmuah an thazang a cakter.
Efesa Le Korin Ah Apollos
24 Culai ah Alexandria khua ih suak, Apollos timi Judah pa cu Efesa khua ah a ra thleng. Amah cu òong a thiam zet ih Ca Thianghlim tla a thei ngaingaimi a si.
25 Bawipa ih Lamzin thuhla ah zirh zomi a si ih, thinlung tho zet le fel zet in Jesuh ih thuhla cu a sim ih a zirh. Asinan a theihmi cu Johan ih baptisma thu lawnglawng a si.
26 Ralòha zet in sinakok ah thu a sim. A thusimmi cu Prisilla le Aquila in an theih tikah an inn ah an sawm ih Pathian Lamzin thuhla kha felfai deuh in an sim.
27 Cule Apollos cu Akhaia peng ih feh a tum ruangah Efesa khua ih zumtu pawl in an bawm ih Akhaia khua ih dungthluntu pawl hnenah Apollos an rak mikhual theinak dingah ca an ngansak. Akhaia khua a thlen tikah Pathian zangfahnak thawngin zumtu a rak simi pawl hrangah bawmtu òha zet ah a cang.
28 Ziangahtile mi thu el a thiam zet ih Jesuh cu Messiah taktak a si, tiah Ca Thianghlim sung ihsin la tahrat in a fiangter ih cuticun zapi hmaiih thu elawknak ah Judah mi pawl kha a neh thei ringring.