1 Kona amhma naak kkhaan kho ngshä noh ah kpuung ah tum. Asun üng ta kkhaan khoa khyüh kho mdeka aai shi kyalolü kah hmuh. Asuna aai shi üng Mulai pea kshoh nghmong naak jah khaih naaka hiit ah nih peet. 2 Ah nih noh Mulai pea kshoh nghmong lüta mei phü nua kkhyüh kaai lok ktia mäi mei khu lopyei kti. Kho kshou jah kho liva phi nghmüp-in lok kti. 3 Mei khua kkhyüh lü kho mdeka khing khi lai lok ktie. Bang kia ha shik ah nih jah peet. 4 Ah nih nih-e noh mphyo, thing dung, yo paai, tooi kkhyüng an kshei käh ei kkhaia ah nih jah ngya u. Pangsiima mshing naak ah nih msa yü üng käh vek ktie sun ah nih jah mkhuh mhlih vaia ah nih jah mtheh u. 5 Kkhyaang ta käh jah hnim lü ah nih jah mkhuh mhlih naak vai aksüün khya mhma ah nih jah peet. Kkhyaang ah nih jah mkhuh mhlih naak ta bang ki noh kkhyaang ah jah suih-a kba jah mshou ei kti. 6 Asuna khya mhma sun üng kkhyaange noh ah nih thih naak vai shui hü kkhaie. Lüphi am thi-khoh u. Thih vai yü tong kyo ulü phi ah nih veeia kkhyüh thih naak sen kkhai ni. 7 Asuna khing khiea lup hin ngtuk kpoh naak vai ah nih jah piit pyaang ngshe üng täng ktie. Ah nih lu kkhaana xüi lu ngbüna mäi ngbüng ktie. Ah nih hmaai ta kkhyaanga hmaaia mäi ni. 8 Ah nih lu sham ta nghnu mia lu shama mäi ni. Ah nih ha ta hleeng shih-a ha-a mäi ni. 9 Ah nih ngkyaang ta mthi üng ah nih pyaan mdi mphua lipa mäi üng nghloop ei kti. Ah nih ngphya ah nih kkhapa kthai ta ngtuk kpoh kkhaia sit kti ngshe hleeng kho hah-a kthaia mäi ni. 10 Ah nih ngmei ta bang kia ngmeia mäi ni. Ah nih ngmei mdonga ta amshet vek kti. Ah nih ngmei üng phi khya mhma-a kduk üng kkhyaang jah mkhuh mhlih vai hiit yah ktie. 11 Asune jah up kti shang phuhlang ta Mulai pea ngshäa kyak kti. Hepye läka Apadon, Kärih läka Apoli Ooma ah nih shui ni. Angming ta ‘Msim kpyak kti’ ti hlü ni. 12 Kyüh shek kti jeih nghnah kshe aksük aläät kona kyüh shek kti jeih nghnah kshe mjü nghngih phalo ham kkhai ni. 13 Kona akkhyuk naak kkhaan kho ngshä noh ah kpuung ah tum. Pangsiima ma-a vek kti ang'uui shi naak xüi kooia akkit kphyüa kkhyüh lü kthai pou lok kti kah ngjaak. 14 Asuna kthai noh akkhyuk naak kkhaan kho ngshä üng “Uphyateh-a ngshui kti mlik tui nua ah nih jah khun phun kam mah kti yaai kshou kphyü jah hläta” ah ti. 15 Pangsiim noh kho kum, khya, kho mhnüüp jah ksüün ah jah miin peet üng jah hläh vaia ah jah shääm kyet ni. Ah nih-e hin kho mdek kkhyaang päm kthum üng päm mat jah hnim kkhaia ah nih jah hläh u. 16 Ngtuk kpoh i hah lok ktie atia ah nih nah mtheh u. Ngshe ngsum kti ngtuk kpoh-e ta 200,000,000 ting xa siim siima phya nghngih lok ktie. 17 Mhnüh mdan kah hmuh sun üng ngshe-e jah ngtuk kpoh-e sun kah jah hmuh. Ngtuk kpoh-ea ah nih ngkyaang shung ta meia kba shen kti. Shaphia ah nih shui aphu küüi kti lunga kba ngkyüng lü kaata kba ng'aai kti phi vek ktie. Ngshe-ea lu ta hleeng shih-a lua mäi ni. Ah nih mpyonga kkhyüh mei, mei khu jah kaat khu lut lok ktie. 18 Kho mdek kkhyaange päm kthum üng päm mat sun yeh yaai kthuma thoon kti mei, mei khu jah kaat khu sun üng thik ktie. 19 Asuna ngshe-e noh kkhyaang ah nih jah mkhuh mhlih naak khoh sun ah nih mpyong jah ah nih ngmei üng vek kti. Ah nih ngmei ta kphyu kphyaaia mäi lolü ah lu phi vek kti. Asun üng kkhyaang jah suui ktie. 20 Asuna yeh yaai üng am thik kti kkhyaange hin am do kti ah nih poh mshah-a kkhyüh am vuuk ham u. Mhläi lü kho yaai hjok khah ei ham ktie. Xüi, ngui, ke jah lung, thing üng ah nih msom mhnama lup phi hjok khah ei lä ktie. Asuna mhnama lupe sun ah nih mik phi am vaai, ah nih nghnga phi am nglang, asita phi am sit hü thei u. 21 Kkhyaange sun nghnim ei naak, shong üng püi yoh ei, boh bah naak, mpyuuk ei naaka kkhyüh phi am vuuk be u.