8
1 To Sa noh akkhyüh naak mshing naak ah phyeet kona ta kkhaan khoa ve naküt kti abäng shei k'am ook bang käh sik sik lü vek ktie.
2 Kona Pangsiima ma-a ngdüüi kti kkhaan kho ngshä kkhyüh kah jah hmuh. Asune noh kpuung kkhyüh yah ktie.
3 Ang'uui mkhih naak xüi phäih bik kti kkhaan kho ngshä mat lai lobe tü lü khah naak lung päma hlonga ngdüüi kti. Ah nih üng Pangsiima ngsiim ngsaih kti kkhyaangea tä sham naak mah mah ayüma khah naak vaia ang'uui kho hah ah nih peet shih u. Asun sun üng Pangsiima Booi ngoh naaka ma-a vek kti ang'uui shi naak xüi kooi kkhaana khah kti.
4 Kkhaan kho ngshäa kut üng ka mei üng mkhih ang'uuia akkhu sun Pangsiima kkhyaangea tä sham naaka dä ayüma Pangsiima veei kaai lok kti.
5 Kona kkhaan kho ngshä noh ang'uui shi naak xüi kooi üng ka mei k'eh sun lou lü xüi phäih sun kbe nalü kho mdek kkhaana ah kpyaai-in. Asun üng kho nghmüüm lok kti, siing vyeeng kthai pou lok kti, kho phi mlaih lolü ngkhyü ngshüün lok kti.
6 Kpuung khyüh bik kti kkhaan kho ngshä kkhyüh-e phi kpuung tum kkhaia ngpyaih xat ktie.
7 Aksük kkhaan kho ngshä noh ah kpuung ah tum. Asun üng ahunata thi üng ngso kti yeyoh jah mei kho mdeka kyalok kti. Kho mdek päm kthum üng päm mat sun mei noh ah uih päih. Thing dung päm kthum üng päm mat phi mei üng ngkhiit lü mphyo phi abänga ah uih päih ni.
8 Kona anghngih naak kkhaan kho ngshä noh ah kpuung ah tum. Meia dääi kti kho msuung nua mäi mpang lai tuia ah nih kkhyaak-in lo.
9 Asun üng mpang lai tui päm kthum üng päm mat thia thoon lok kti. Mpang laia vek kti nga jah ki kook k'aai päm kthum üng päm mat thik ktie. Mhlüüi kdäm nue phi päm kthum üng päm mat pyak ktie.
10 Kona akthum naak kkhaan kho ngshä noh ah kpuung ah tum. Mei kshooia mäi aai shi nu kkhaan khoa kkhyüh mlik tui jah tui ksaai päm kthum üng päm mata kkhaana kyak kti.
11 Asuna aai shia ngming ta “Kkhyu dung” ni. Tui päm kthum üng päm mat kha lolü asuna tui ok kti kkhyaang kho hah thik ktie.
12 Akphyü naak kkhaan kho ngshä noh ah kpuung ah tum. Kho mik päm kthum üng päm mat, mah khya päm kthum üng päm mat, aai shi päm kthum üng päm mat ah nih jah tuk aka kba sim pyak ktie. Asun üng ah nih kvaai päm kthum üng päm mat nghmüp lok kti. Asuna thoon lü mhnüüpa päm kthum üng päm mat kho nghngi käh vaai lü mthan päm kthum üng päm mat mah khya aai shi am vaai ti.
13 Bük ngüshe xüi laang tah kho mdek kkhaana ak'hlüng nua joong hü lü akthai kdäma ngpyaang kti kah ngjaak. “Nghaai kti ni eei! Khye kti ni eei! Tum hlü hnüh kti kkhaan kho ngshä kthum noh ah nih kpuung ah nih tum be tü ta kho mdeka vek kti kkhyaangea phäh i hlooka kyüh shek kkhai ni” tilü ah pyen.