1 Kona hiit mah kti kkhaan kho ngshä akse kkhaan khoa kkhyüh kyum lolü kah hmuh. Ah nih sun kho ngmei noh ah hloop kyet. Ah lu kkhaana japi phi ngkooi kti. Ah hmaai ta kho mika mäia vaai kti. Ah kho xooi phi meia dääi kti ktunga mäi ni. 2 Ah kut üng ngphyang kti sa ktoom kdiik sa bi kti. Ah kkheet kho üng mpang lai tuia ngleh ei kyet lü ah ksong kho üng kkong khoa ngleh ei kyet kti. 3 Hleeng shih-a huuka kba akthai kdäma ngpyaang kti. Ah ngpyaan üng kho nghmüüm kthai kkhyüh sun ng'yüng be ktie. 4 Kho nghmüüm kthai kkhyüh-a ng'yün sun sa üng kah yuk hlü kyo. Lüphi kkhaan khoa ka kthai noh “Kho nghmüüm kkhyüh-a pyen hin thuh bä, käh yuka” tilü ah pyen. 5 Kona mpang lai jah kkonga ngdüüi kti kkhaan kho ngshä noh ah kkheet kut kkhaan kho da ah shäng kah hmuh. 6 Ah nih noh kkhaan kho, kho mdek, mpang lai tui jah asue üng akve naküt jah mhnün mseng lü angshääia xüng kti Pangsiima ngming khü lü se kti. “Käh mhjook ti vai, aksüün päih hnüh kti ni. 7 Akkhyüh naak kkhaan kho ngshä noh kpuung ah tum lo ta Pangsiim noh ah thupa nüt yaan küm seei shak kkhai. Ah xüh shoh-a thoon kti shahma ngsiime üng ah jah namtheh khoia kba poh kkhai ni” ah ti. 8 Kona kkhaan khoa kkhyüh nah ngthuh ei püi khoi ktia kthai noh nah kkhyü püi be tü kti. “Sita, mpang lai jah kkonga ngdüüi kti kkhaan kho ngshäa kut üng vek kti ngphyang kti sa ktoom kdiik sa lou vaaia” tilü ah nah mtheh. 9 Kei ta kkhaan kho ngshäa veei sit lü sa ktoom kdiik sa ah nah peet vaia kah tong. Ah nih noh “Ahina sa ktoom kdiik sa lou lü eia. Nah kkhon k'uma ta kha vaai kkhai ni. Nah mka khuuia ta khooi tuia kba tui kkhai” tilü ah pyen. 10 Kkhaan kho ngshäa kut üng sa ktoom kdiik sa lou lü kah ei. Kah mka khuuia ta khooi tuia kba tui kti. Lüphi kdeh ei ngüshe kah kkhon k'uma ta kha lok kti. 11 Kona “Nang noh kkhyaang mjü kküm, pe abäng, läk amjü mjü, jah shang phuhlangea mong Pangsiim noh ah pyen sun nah shahma yah kkhai ni” ah ti.