1 Kona kei noh bük ngüshe To Sa Shion msuunga ngdüüi kti kah hmuh. Ah nih mah mah kkhyaang 144,000, ting mat toong kphyü jah thoong kphyü vek ktie. Ah nih nih-e üng To Sa-a ngming jah ah Pa Pangsiima ngming ah nih msa yüa ng'yuk kti. 2 Kei noh kkhaan khoa kkhyüh tui long nua loon kthaia mäi kah ngjaak. Kho nghmüüm kthaia mäi phi lok kti. Kah ngjaaka kthai sun khing khong nu kkhyaang kho hah noh ah nih tuma kthaia mäi phi lok kti. 3 Asune noh Pangsiima Booi ngoh naak jah kkhyüng kshei kphyü jah asangea ma-a ng'äi kthaai msuuk ktie. Kkhyaang 144,000 ea thea u noh phi asuna ng'äi am msuuk thei u. Ah nih-e hin Pangsiim noh kho mdeka kkhyüh ah jah yung mhläte ni. 4 Ah nih-e hin nghnu mia ma-a khän ta-ei ulü am boh bah u. Angsiim ngsaih-a vek ktie. To Sa-a seh naak naküta läk hü ktie. Pangsiim noh kho mdek kkhyaangea kshuunga ah nih nih-e sun ah jah thoong kkhya be ni. Ah nih nih-e hin Pangsiim jah To Sa däk üng shääng ei ulü akuung ktheih aktheih ksüka mäia ni. 5 Ah nih nih-e noh hleei hlak am poh laang u. Jah kbäü ei naak vai phi am ve ngtu.

6 Kona kkhaan kho ngshä akse kho li va-a joong hü lü kah hmuh. Ah nih noh angshääia thang kdo kkya vek kti. Asuna thang kdo kkya sun kho mdeka akve naküt, kkhyaang mjü naküt, koon shaang naküt, läk mjü naküt pyen kti kkhyaangea veei kpyaü hü vaia thoon kti. 7 Ah nih noh akthai kdäma ngpyaang lü “Pangsiim lei shong ua. Ah däm duh naak mküüi mtou ua. I lüni ti ta Pangsiim noh kho mdek kkhyaange abäng ah jah si jaang naaka ksüün phalo hnüh kti. Kkhaan kho, kho mdek, mpang lai jah tui longe naküt jah mhnün mseng kti Pangsiim hjok khah ua!” tilü ngpyaang kti. 8 Kona anghngih naak kkhaan kho ngshä noh läk lolü “Mkhye mshoh naak üng be kti Papu Lung mlüh nu pyak lo hnüh ve. Thäü thäüa sim pyak päih hnüh ve. Ah nih noh ju shü ok kkhaia mhlon msook ktia kba teng pe naküt sun boh bah mkhye mshoh shak kkhüt kti” tilü ah pyen. 9-10 Kona akthum naak kkhaan kho ngshä noh ah nih xooi jah läk lolü akthai kdäma “Kkhyüng kshei kshoua lup hjok khah kti naküt, mshing naak ah nih msa yüa am ani üng ah nih kut kkhaana dou kti kkhyaang naküt noh Pangsiima ju tui o-yah kkhaie ni. Pangsiima ju tui ti hlü ta Pangsiima thüi shei naak bok bok ni. Asuna ju tui shü sun tui üng käh kso lü mtaam peet naaka phäih üng ah kkäih ni. Asuna kkhyaange sun ngsiim ngsaih kti kkhaan kho ngshäe jah To Sa-a hmaai ma-a meia dääi ktia kaat noh jah uui lü khui kha khaam ei yah kkhaie. 11 Ah nih-e anghläia jah mkhuh mhlih lü mei noh jah uui lü mei khu ngshääi ei ktia khu kti. Kkhyüng kshei kshou jah ah lup hjok khah ktie jah ah ngminga mshing naak dou ktie ta amhnüüp mthan nghläia am hüi ei yah u” tilü ngpyaang kti. 12 Pangsiima kkhyü pyen ksang nalü Booi Jeishüh-a kkhaana kkhyü shing üng vek kti ngsiim ngsaih kti kkhyaange ta mlung mshaaü lü ngkhääng ngpaang naak hlü kti ni. 13 Kona kkhaan khoa ka kthai noh “Yuka. Tuh-a kkhyüh Booi Pa üng nglooi ei lü thik ktia kkhyaange ta ah nih phäh-a do naaka thoon kti ni” ah ti kah ngjaak. Mkhyangsiim noh “Sang ve, ah nih-e hin ah nih khüüi khoom khui kha naaka kkhyüh hüi ei kkhaie ni. Ah nih khüüi kheen noh jah läk kkhai ni” ah ti.

14 Bük ngüshe ta kah hmaai ma-a kho ngmei book kah hmuh. Ngmei booka kkhaana Kkhyaang Sa-a mäi mat ngshut kti. Ah lu kkhaana xüi lu ngbün mat ngbüng kti. Ah kut üng xaat khüt kti vin kooi phi bik kti. 15 Kona kkhaan kho hjok khah im nua ka kkhaan kho ngshä akse lut lolü akthai kdäma ngmei kkhaana ngshut kti sun ngthuh ei püi kti. “Nah vin kooi bi kti lü aat hnüh-a. I lüni ti ta aah vaia ksüün phalo hnüh kti. Kho mdeka saang hmin hnüh kti” tilü ah pyen. 16 Asuna thoon lü kho ngmeia ngshut kti noh ah vin kooi sun kho mdeka ah vääi hü. Kho mdek saang aat kti. 17 Kkhaan kho ngshä kse kkhaan kho hjok khah im nua kkhyüh lut lobetü lü ah nih noh phi vin kooi kxaat nu bi ei kti. 18 Kona kkhaan kho ngshä mat be tü khah naak lung päma kkhyüh lok kti. Pangsiim noh ah nih üng khah naaka mei ah shääm shak. Ah nih noh ah kthai kdäm üng vin kooi bi kti kkhaan kho ngshä üng “Nah vin kooi kxaat lou lü kho mdeka ngbom nghjuun üng ka ngbom ktheih shaat kkhyalü süm hnüh-a. I lüni ti ta ngbom ktheih hmin hnüh kti ni” tilü ngpyaang kti. 19 Kkhaan kho ngshä noh kho mdeka vin kooi vääi hü lü ngbom ktheih ah shah. Mkhääm lü ngbom ktheih leh naaka ah püüp vaai. Asuna ngbom ktheih leh naaka hnün hin Pangsiima thüi shei naaka hnün ni. 20 Mlüh kho kpunga vek kti ngbom ktheih leh naaka ngbom ktheih sun ah nih leh u. Ngbom ktheih leh naaka kkhyüh thi loong lok kti. Asuna thi loong kti sun noh ngshea mpyong säpa ngli lü määng phya nghngih bang loong kti.