1 Kkhaan khoa däm duh kti mün sam kshe ngshing ngte naak kah hmuh be tü. I lü ni ti ta kkhaan kho ngshä kkhyüh jah akpäih naak yeh yaai kkhyüh kah jah hmuh. Pangsiima thüi shei naak päih lohlü hnüh ktia thoon lü akpäih naaka yeh yaai thoon lohnüh ktie. 2 Mei jah mang üng ah nih kso tui anga mäi kah hmuh. Asuna tui anga peia kkhyüng kshei kshou jah ah lup käh hjok khah lü ah ngming täh naaka mshing naak käh dou lü ngnääng kti kkhyaang pä nu kah jah hmuh. Asuna kkhyaange üng Pangsiim noh khing khong ksing ah jah peet. 3 Ah nih nih-e noh Pangsiima xüh shoh Mosheia ng'äi msuuk ktie. To Sa-a ng'äi phi msuuk ktie. “Abäng khyaih khoh kti Booi Pa Pangsiimo, nah poh mshah-e däm duh ulü mün sam shek ktie ni. Nanga lam mshüüm naak hin sang lü ngpyuun kti ni. Nang hin aksüün tä lü shang phuhlanga nah thoon kti ni. 4 Booi Pao, u noh am ning kyüh lü vekhoh kkhai ja. U noh nang Booi Pa-a ngming am mküüi mtou lü ve khoh kkhai ja. Nang Pangsiim däk nah ngsiim ngsaih kti. Pe naküt üng ka kkhyaang abäng lo ulü nang Pangsiim ning hjok khah kkhaie. I lüni ti ta nang Pangsiima poh mshah-e sang lü do kti ati sun ngshing ngte lok kti” tilü ng'äi ktie. 5 Kona kkhaan khoa vek kti hjok khah im nu nghmong lok kti kah hmuh. Pangsiim vek kti tia shak shi jah mhnüh kti jih shung müüp ngdang lok kti. 6 Hjok khah im nua ka kkhaan kho ngshä kkhyüh sun yeh yaai mjü kkhyüh mah mah lut lok ktie. Asune noh abäng ngsiim ngsaih lü lik lik ei kti jih book jah shui shalü xüi üng ah nih pyaan ksooi süüp üng ngsüüp ei ktie. 7 Kona kkhyüng kshei kphyü üng ka mat noh kkhaan kho ngshä kkhyüh üng xüi phäih kkhyüh ah jah peet. Asuna xüi phäih kkhyüh sun angshääia xüng kti Pangsiima thüi shei naak üng be kti. 8 Pangsiima jou taai jah ah hiit sun mei khua kba hjok khah im nu üng be kti. Kkhaan kho ngshä kkhyüh noh yeh yaai kkhyüh sun am ah nih küm seei shak ham üng u phi hjok khah im nua am lut yah.