1 Kkhyü mshim ta mpang laia peia ngdüüi kti. Kkhyüng kshei kshou mat mpang laia kkhyüh lut lok kti kah hmuh. Ah nih noh xa jah kki nalü kkhyüh jah lu nak kti. Ah kki üng lu ngbün xa jah khuh kti. Ah lu kkhyüh-a kkhaan sua Pangsiim thang msheet ktia ngming ng'yuk kti. 2 Kah hmuh-a kkhyüng kshei kshou sun meng kea mäi lok kti. Ah kho ta kkhoma khoa mäi, ah mpyong ta hleeng shih-a mpyonga mäi ni. Kona kkhyü mshim noh kkhyüng kshei kshou üng ah phun kam, ah booi ngoh naak jah däm duh kti hiit ah peet. 3 Asuna kkhyüng kshei kshoua lu mat ta ah thih naak mkäih-a leem ei khoi ktia mäi ni. Lüphi asuna ah leem ei sun do be hnüh kti. Asuna thoon lü kho mdek kkhyaang naküt mün sam tong ulü kkhyüng kshei kshou sun läk ktie. 4 Kkhyü mshim noh kkhyüng kshei kshou üng ah phun kam ah peeta thoon lü kkhyaange noh kkhyü mshim sun hjok khah ktie. Ah nih-e noh kkhyüng kshei kshou phi hjok khah ulü “Kkhyüng kshei kshoua kba däm duh kti u vek kti ni. Kkhyüng kshei kshou sun u noh ngshun püi lü nääng khoh kkhai ni” tilü ah nih pyen u. 5 Kkhyüng kshei kshou sun sam sah nglük ngtek lü Pangsiim thang msheet kti. Ah hiit ah shum ei naak khang vaia Pangsiim noh khya kphyü kip jah nghngih aksüün ah peet ni. 6 Kkhyüng kshei kshou sun noh ah mka ah kpäh tä lü Pangsiim thang msheet kti. Pangsiima ngming, Pangsiima ve naak jah kkhaan khoa vek ktiea mong sok sek nak kti. 7 Ngsiim ngsaih kti kkhyaange ah jah ngshun naak püi vai ah jah nääng naak khoh vaia hiit yah kti. Koon shaang naküt, kkhyaang mjü naküt, läk amjü kküm pyen naküt ktie, teng pe naküta kkhaana ah hiit vek kti. 8 Kho mdek kkhaana vek kti naküt noh kkhyüng kshei kshou sun hjok khah kkhaie. Pyen hlü ta ahina kho mdek ah mhnün mseng hlaana To Sa-a shak sa up üng ah ngming am ng'yuk kti kkhyaange däk noh ni kkhyüng kshei kshou sun ah nih hjok khah kom u. Asuna shak sa up ta ah nih hnim khoi To Sa noh ka nak kti ni. 9 Ah nghnga khuui kti noh ngja-ushe. 10 “Man khaam ei kkhaia kah jah mphyäih naküt ta jah man kkhaie ni. Ksim kshaaü üng hnim vai kah jah mphyäih phi ksim kshaaü üng jah hnim kkhaie. Pangsiima ngsiim ngsaih kti ah kkhyaange sun ah nih mlung ah nih mshaaü vai jah ah nih jum ei naak angkhääng vai hlü kti” ah ti.

11 Kona kei noh kkhyüng kshei kshou akse mdek k'uma kkhyüh lut lok kti kah hmuh. Ah nih sun noh To Sa-a kba nghngih jah kki nak kti. Lüphi kkhyü mshima kba kkhyü kkou kti. 12 Ah nih noh aksüka kkhyüng kshei kshoua hiit abäng shum ei kti. Kho mdeka kkhaana vek kti kkhyaang naküt üng ah thih naak ngkäih-a leem lü do lobe ktia kkhyüng kshei kshou aksük jah hjok khah shak kti. 13 Ah nih noh däm duh kti mün sam naak vai ngshing ngte naake jah poh kti. Kkhyaangea hmaai ma-a kkhaan khoa kkhyüh kho mdek kkhaana mei kkhyalok kti. 14 Ah nih noh aksüka kkhyüng kshei kshoua ksah-a ngshing ngte naak poh vaia hiit ah yah üng kho mdek kkhyaange abäng jah mhleei mhlak kti. Ah nih noh ksim kshaaü üng leem lü do lobe kti kkhyüng kshei kshoua lup kkhyaange üng jah msom shak kti. 15 Kkhyüng kshei kshou ksüka lup sun xün naak shak khoh-a hiit yah kti ni. Asuna thoon lü kkhyüng kshei kshoua lup kkhyü kkou lokhoh kti. Asuna lup am hjok khah hlü kti kkhyaang naküt sun jah hnim shak kti. 16 Ah nih noh akdiik akdäm, booi maang kti jah mpyeen she kti, kkhyaang klät jah mpyae abäng naküt üng ah nih kkheet kut üng am ani üng ah nih msa yü üng mshing naak anäänga jah poh shak kti. 17 Asuna mshing naak am yah ktia kkhyaang noh ta i phi am kkhyäi ei yah. Am jooi ei yah. Asuna mshing naak ta kkhyüng kshei kshoua ngming am ani üng ah ngming täh naak ni. 18 Ahina phäh theem ngvaai naak hlü kti. Ah pum ngyam vek kti noh ta kkhyüng kshei kshoua ngming täh naak sun kkhe she. I a thoon lüni ti ta ahina täh naak hin kkhyaang täh naak ni. Ah ngming täh naak ta 666 ni.