1 Kkhaan khoa däm duh kti mün sam kshe ngshing ngte naak pou lok kti. Asun sun nghnu mi mat noh jih ah ngvaih-a kba kho nghngi ngvaih lü mah khya-a kkhaana ngleh ei lü ah lu kkhaana aai shi xalei nghngih kop kti lu ngbün khuh kti ngdang lok kti. 2 Asuna nghnu mi sun mpyaai lü sa lohlü hnüh lüta ah kkhyüng ksooi noh mshou ei lü ngkou kti. 3 Kona kkhaan khoa ngshing ngte naak akse mat pou lobe tü kti. Kkhyü mshim mnaka shen angbaü nu ngdang lok kti. Kkhyüh lu nalü xa kki nak kti. Ah lu kkhaana Booi lu ngbün kkhyüh khuh kti. 4 Ah ngmei üng kkhaan khoa kkhyüh aai shi päm kthum üng päm mat ah jah phaih kkhyaak-in. Aai shi sun kho mdek kkhaana ah jah kkhyaak-in. Asuna mnaka sun sa hlü kti nghnu mia ma-a ngdüüi kyet lü hnashen ah hmi lo jah ei kkhaia ngshääm kyet kti. 5 Nghnu mi sun noh sa ngpyang sa na-lok kti. Ah sa kpa sun noh pe naküt mthi mtup üng up kkhaia kyak kti. Pangsiim noh asuna sa kpa sun lou lü ah Booi ngoh naak säpa ah jäh ni. 6 Nghnu mi sun mkyaanga sen lü Pangsiim noh ah nih-a phäh ah piit pyaana hnüna ah nih sun kho mhnüüp thoong mat phya nghngih jah kkhyuk kip ah jah büh ten mbei mbook shak ni. 7 Kona kkhaan khoa ngtu-lok ktie. Kkhaan kho ngshäea pä khong Mikha Elah jah ah kkhaan kho ngshäe noh kkhyü mshim mnaka sun ah nih tuk u. Kkhyü mshim mnaka noh phi ah ngshäe mah mah jah tu-be ktie. 8 Lüphi ah nih-e noh kkhyü mshim jah ah ngshäe sun jah nääng ulüta kkhaan khoa am veyah ti u. 9 Ah nih nih-e noh kkhyü mshim sun ah nih kkhyaak-in lo u. Ah nih hin Shatan yaai pa-a ngshui kti kphyu kphyaai kphyüm ni. Ah nih noh kho mdek kkhyaang abäng lam jah hmü shak khoi kti. Ah pät jah ah ngshäe kho mdek kkhaana kyalok ktie. 10 Kona kkhaan khoa ka kthai akdäm noh “Tuh-a ta nih Pangsiima thoong khyah naak phalo hnüh ve. Tuh ta Pangsiim noh ah pe hiit üng up hnüh kti. Khritoa aana ngshing ngte lohnüh kti. I lüni ti ta nih be nae jah kbäü ei kti Shatan yaai pa sun kkhaan khoa kkhyüh ah nih kshät hnüh ni. Amhnüüp mthan nghläia Pangsiima ma-a ngdüüi lü nih be nae jah kbäü ei khoi kti ni. 11 Ah nih nih-e noh Shatan yaai pa sun To Sa-a thi jah ah nih shak shi naak üng ah nih nääng u ni. Ah nih shak am ah nih kpaam eia phäh thih vai phi am kyüh u. 12 Asuna thoon lü kkhaan khoa vek ktieo, je kyai ubä. Lüphi kho mdek jah mpang laia vek ktieo, nang nih-ea phäh kyüh shek kti jeih nghnah kshe phalok kkhai ni. I lüni ti ta Shatan yaai pa nang nih-ea veei kyum lok kti ni. Ah nih-a ksüün phi am veti ati sun kshing ei lüta thüi shei tong kti” tilü ah pyen. 13 Kkhyü mshim noh kho mdeka ah nih kkhyaak-in sun hmu-ei lolüta sa kpa sa na pääng kti nghnu mi sun ktäm hü kti. 14 Pangsiim noh nghnu mi üng laang tah-a ngphya-a mäi ah ngphya akdäm nu nghngih ah jah pyaan peet. Asun ta mkyaanga ah nih-a phäh ah nih pyaan peeta hnüna ah joon naak khoh vai ni. Asuna hnün sua kphyu kphyaai noh nghnu mi läk vaai lü am ng'yah. Pangsiim noh ah nih sun kho kum kthum jah kum phe jah tu mbei shak kkhai. 15 Asun üng ta kphyu kphyaai noh ah mpyonga kkhyüh tui nu msha lolü mlik tui nua kba nghnu mia hnua loong vaai lü tui shooi noh ah seh-in vaia ah mkhüh naak ni. 16 Lüphi kho mdek noh nghnu mi kuum ei kti. Kho mdek noh hala lü kkhyü mshim noh ah mshaak lo mlik tui nu sun ah mjo päih-in ni. 17 Asun üng kkhyü mshim noh nghnu mi thüi shei ei lonak nak lü ah sa na akse-e jah ngshun püi kkhaia ngpyaih xat kti. 18 Asune ta Pangsiima pyena kba ve soh ulü Khritoa mong shak shi ktie ni.