8
(Marküh 1.40-45; Lükah 5.12-16)
1 Booi Jeishüh msuunga kkhyüh ah kyum lo be üng kkhyaang pä nu noh ah nih läk u.
2 Asun üng mneh kshe mneh kti mat Booi Jeishüh-a veei lolü ah mkhuuk üng ngdääng lü lei shong lü “Booi Pao, nah nah mkhyüh hlü peet ta kah mneh kshe hin nah nah mkhyüh peet khoh kti ni” tilü ah nghui naak.
3 Booi Jeishüh noh ah kut shäng lü ah hneh. “Nah mneh kshe kah ning mkhyüh hlüpeet kti ni. Nah mneh kshe khyük be she” tilü ah pyen. Ahunata ah mneh kshe khyük be kti.
4 Jeishüh noh “Ahin u üng phi käh mtheh bing bing bä. Khotu ngsiim üng ta nah puum sha mhnüh vaaia. Kkhyaanga ma-a nah ngshing ngte naak vai Mosheia thuuma kba khah naak üng hjok khah-a” ah ti.
(Lükah 7.1-10)
5 Booi Jeishüh Kapanom mlüh k'uma ah luh vaai be üng Romah ngtuk kpoh pä khong mat ah veeia lok kti.
6 “Booi Pao, kah xüh shoh ei kshe hleen kti ni. Mshou mhleei ei kkhüt lü käh koot laat khoh ti lü ah ih phaka kkhaana ngko-in kti ni” tilü ah mtheh.
7 Jeishüh noh “Sit ngüshe kah mya shak be kkhai ni” ah ti.
8 Lüphi Romah ngtuk kpoh pä khong noh ta “Booi Pao, kah ima nah kaai lo vaia kei hin am looi ngkäih ngü. Kkhyü mkhap mat pyen kti lü kah xüh ei mdo be tua.
9 Kei nah mkhyah mtaang peet khoh kti kah kkhaana khong akdäm poh kti phi vek kti ni. Kah päta kut k'uma phi ngtuk kpoh-e vek ktie. Kei noh mat üng ‘Sita’ kah ti üng sit kti. Mat be tü üng ‘Loa’ kah ti üng lok kti. Kah mpya üng ‘Hin poh-a’ kah ti üng phi ahin poh kti ni” ah ti.
10 Booi Jeishüh noh asun ah ngjaak üng mün tong kti. Läk lok kti kkhyaang pä üng “Ngngaai ua, kei kah pyen ma kkhai. Isare kkhyaange üng phi ahin kba däm duh ktia jum ei naak am hmukhoi ham ngü.
11 Ngngaai ua, kei kah pyen ma kkhai. Nghngi lo da ka jah kho kyaak da ka kho hah lo-ulü Pangsiima pea Apyaham, Isak, Jakop mah mah ngshut yüm kkhaie.
12 Pangsiima pe shääng van nak ktie ta Pangsiim noh kho kpunga jah mshot lü kho nghmüp naak siima ve ulü ah nih ha kkhyüüt lü mbooi kyap ei kkhaie ni” tilü ah jah mtheh.
13 Ngtuk kpoh pä khong üng Booi Jeishüh noh “Nah ima sit bea. Nah jum eia kba kah ning poh peet ni” tilü ah mtheh. Ah xüh shoh ei phi asuna ksüün üng do-in be kti.
(Marküh 1.29-34; Lükah 4.38-41)
14 Booi Jeishüh sun Peta-a ima lut vaai kti. Ah pi mhnat ei lü ngko-in kti ah hmuh vaai.
15 Booi Jeishüh noh ah kut hne lüta ah mhnat ei khyük-in be kti. Peta-a pi thou lo kshet lü jah kkhin nak kti.
16 Mü lam kho kyaak shoa kkhyaange noh kho yaaia vaan naak kho hah kuung Booi Jeishüh-a veei ah nih jah lo püi u. Booi Jeishüh noh ah kkhyü mkhap üng kho yaaie ah jah mshot. Am khyaih kti abäng ah jah mdo be.
17 Shahma ngsiim Hei Shajah-a malam pyen ta “Ah pät kuung noh am nih shi khyaih naak khaam ei lü am nih mya shat naak sun ah seh püi pääng ni” tilü vek kti. Jeishüh-a poh mshah naak üng ahina malam pyen küm seei lok kti.
(Lükah 9.57-62)
18 Booi Jeishüh noh ah nih ngvoong-in kti kkhyaang pä nu sun jah hmu-lolü ta Kalile tui li saye da mhlüüi üng peh vaia akläke üng ah jah mtheh.
19 Asun k'um üng Sangsiim ktheem mat Booi Jeishüh-a veei lolü “Angvaaio, nah seh naak hü naküta kah ning läk kkhai ni” ah ti.
20 Booi Jeishüh noh ta “Sha ui ta ah khuui vek kti. Kkha phi ah ngbu vek kti. Kei, Kkhyaang Sa ta kah ngkoh naak vai hngoh phi am ve” ah ti be.
21 Khritoa akläka thoon kti mat be tü noh ta “Booi Pao, kah pa-a yook, yook nalü mkhyüh vaai ma vang” tilü ah mtheh.
22 Booi Jeishüh noh “Kei nah läka. Kkhyaang kthie noh ah nih püi kkhyaang kthi yook nalü mkhyüh u-she” ah ti be.
(Marküh 4.35-41; Lükah 8.22-25)
23 Booi Jeishüh mhlüüia kkhaana kaai kti. Akläke phi ah hlonga sit ktie.
24 Ahunata kho khi kshe nu khi lolü tui mkhyung phi ngkhup lolü mhlüüi üng tui phi vaang lok kti. Booi Jeishüh ta ip ei kti.
25 Akläke noh sit ulü ah nih mthoh u. “Booi Pao, jah kuum kyana, nih ngsum hnüh ve u!” tilü ah nih mtheh.
26 Booi Jeishüh noh “A ia nah nih kyüh ei kkhüt ktie ni. Am nah nih nah üm nak ktie mä” tilü ah jah mshak be. Kona thou lolü kho khi kshe jah tui vai ah nih hüp be vaia ah mkhyah. Asun üng ta tui li sun ve-ei na-lo phya-pyei kti.
27 Akläke abäng mün sam tong lü “Ahin ta ia kkhyaang pi pi vai ni. Kho khi kshe jah tui ngkhup hngoh noh phi ah nih ksang naak ta” tilü mat jah mat mship mhjop ktie.
(Marküh 5.1-20; Lükah 8.26-39)
28 Asun üng Kata Reneh khyong da pek vaai ktie. Asuna khyong sun Kalile hnea nghngi lo lam tui li yea vek kti. Asua lung khuui msüm hnüna kkhyüh lut lo nilü kho yaaia vaan naak nghngih Jeishüh-a veei ahunata phalok kti xooi. Asuna kkhyaang xooi sun kyüh kshea shou shat nilü ah nih ve naak da u phi am sit hü dat u.
29 Booi Jeishüh ah nih hmuh lo jah ngpyaang pyei nilü “Pangsiima sa kpao, kah nih ning püi am ni. Aksüün am pha ham ktia jah mshou ei kkhaia nah lok ktio” tilü ngpyaang kti xooi.
30 Ah nih pei su msuung kpema vok pä nue ngshui ei ktie.
31 Kho yaaie noh “Kkhyaang xooi üng nah jah mshot ta vokea k'uma kah nih vaan vaia jah khyah-a” tilü ah nih nghui naak u.
32 Booi Jeishüh noh “Sit ua” ah ti. Asun üng kho yaaie sun kkhyaang xooi üng shot ulü voke üng vaang ktie. Voke sun kdang nu üng dong lü tui lia kyalü ngsum päih ktie.
33 Vok kshääme sen lü mlüh k'uma athoon ve abäng sun ah nih pyen hü u.
34 Asun üng ta mlüh k'um üng ka kkhyaang naküt noh Booi Jeishüh hmuk kkhaia lok ktie. Booi Jeishüh ah nih tui khyonga kkhyüh ah shot vaia ah nih nghui naak u.