9
(Marküh 2.1-12; Lükah 5.17-26)
1 Booi Jeishüh mhlüüi üng kaai be lü tui li kkaana lobe lü ah päta mlüh-a phalo be kti. Asun üng kkhyaang akhäk noh ah kut kho kthi mat sun kyääp üng kkot lo-ulü Booi Jeishüh-a veei ah nih lo püi u.
2 Booi Jeishüh noh ah nih üm naak u sun hmulüta ah kho kthi üng “Kah püio, käh hela bä. Pangsiim noh nah mkhye ah ning mhlät peet hnüh ni” ah ti.
3 Sangsiim ktheeme akhäk noh ta “Ah mtham hmuh-a ngthu ei lü Pangsiim thang msheet kti” tilü mlung k'uma ah nih ngngaih u.
4 Asun kba ah nih su ngngaih sun Booi Jeishüh noh ah kshing. “I lü am do ktia ta nah nih su ngngaai ktie ni.
5 Ah kho kthi üng ‘Nah mkhye lät hnüh kti’ tilü mpyong thak üng pyen vai mä alooi. Asun am ani üng ‘Ngdüüi lolü sit hnüh-a’ tilü pyen vai mä ajä.
6 Lüphi kei, Kkhyaang Sa noh kah ning jah mtheh kkhai, kei Kkhyaang Sa noh ngthiim khoa phi mkhye mshoh-e kah hläh naak khoh-a kah hiit ave sun kah ning jah mhnüh kkhai” ah ti. Kona ah kho kthi üng “Nang üng phi kah ning mtheh. Ngdüüia, nah kyääp kkot lü nah ima sit bea” ah ti.
7 Asun üng ah kut kho kthi sun ngdüüi lok kshet lü ima sit be kti.
8 Kkhyaang abäng noh hmu-ulü mün sam tong lü Pangsiim noh kkhyaang üng ahin kba onga hiit ah jah peeta phäh Pangsiim mküüi mtou ktie.
(Marküh 2.13-17; Lükah 5.27-32)
9 Kona Booi Jeishüh sun kho kpunga ah seh üng khoon to hlook naaka ngshut kti Mate ngming nak kti khoon to k'hlook ah hmuh. Mate sun üng “Kah hnu nah läka” tilü ah mtheh. Asun üng ngdüüi lolü abäng hoih hüt päih lü Booi Jeishüh ah läk.
10 Booi Jeishüh Matea ima buh pooi üng ah vaan k'um üng khoon to k'hlooke jah Pangsiima thuuma am vek kti kkhyaang kho hah pa noh Booi Jeishüh jah akläkea hlonga ngvai lü ayüma buh ei ktie.
11 Pharishe akhäk noh asun ah nih hmuh üng akläke üng “I a thoon lü nah nih ngvaai noh khoon to k'hlooke jah Pangsiima thuuma kba am vek ktiea dä buh ei dat kti ni” tilü ah nih jah kthäh u.
12 Ah nih pyen u sun Booi Jeishüh noh ngjalü ta “Khyaih ktie noh shei shala am hlü ei u. Am khyaih ktie noh ni shei shala ah nih hlü ei u.
13 Sangsiim üng ng'yuk kti ta ‘Khah naak kkhyüng kshei am hlü ei ngü. Kkhyaang mpyeen msheei ei naak ni kah hlü ei’ tilü vek kti. Asun Pangsiima kkhyü noh i ah ti hlü sun sit lü va su ngngaai ua. Ah nih pät ngpyuun bok ktia ngngaai ei ktie jah khü kkhaia kah lok kti am ni. Ah nih pät noh phi ah nih mkhye shim ei ktie sun ah nih vuuk be vaia jah khü kkhaia kah lok kti ni” ah ti.
(Marküh 2.18-22; Lükah 5.33-39)
14 Patiso Johaana akläke Booi Jeishüh-a veei lo ulü “Kei nih-e jah Pharishe-e noh ta aläa ei kah nih jeih ktie. Nang ning läk ktie noh ta i lü ei am jeih ktie ja” tilü ah nih kthäh u.
15 Booi Jeishüh noh ta “Akläke noh ayüma kah nih ve k'um üng ei am jeih thei u. Kei hin sa kla üng täng ngüshe akläke hin sa laak pooia lok ktie üng täng ktie ni. Ayüma kah nih ve k'um üng pooi poh lü kah nih ei kkhaie. Akläke mah mah kah ngkya naak kho mhnüüp phalok kkhai ni. Asun kona akläke noh ei jeih be hnga kkhaie.
16 Shui shak kpyoon akteek sun shui shak kthaai mooi lü u noh phi am bu khoi. Asun kba bu ta shui shak kthaai khou hlou lolü shui shak kpyoon teek lobok bok kkhai.
17 Meh vun üng pyaan uum kphyüm üng u noh phi ngbom tui shü am thaan khoi. Asun kba thaan ta ngbom tui shü phu lolü uum sun ak kkhai ni. Ngbom tui phi nghuk ngxän päih lü uum sun phi pyak kkhai. Ngbom tui shü ta meh vun uum kthaai üng thaan vai. Asun üng va ah nih nghngih sun kho vei jah taak ei khoh vai.”
(Marküh 5.21-43; Lükah 8.40-56)
18 Jeishüh ah ngthuh ei k'um üng Jüdah khong mang mat Booi Jeishüh-a veei lolü ah mkhuuk üng ngdääng lü Jeishüh üng “Kah sa nghnu mi sa tuh hi ni ah thih. Lüphi kah ima lok kti lü kah sa-a kkhaana nah kut nah mtaan ta xüng lobe kkhai ni” tilü ah nghui naak.
19 Asun üng Booi Jeishüh ngdüüi lolü ah hlonga sit kti. Akläke noh phi ah nih läk u.
20 Kum xalei nghngih athi siim siima ah puum üng ka ngshooi kti nghnu mi nu mat Booi Jeishüh-a veei phalok kti. Nghnu mi sun noh Booi Jeishüh-a hnu da lolü Booi Jeishüh-a shui shak ah hneh.
21 “Booi Jeishüh-a shui shak sa däk kah hneh ta kah do be kkhai” tilü ah pät noh ngngaai ei kti.
22 Booi Jeishüh mang hü lü nghnu mi sun ah hmuh. “Kah sa nghnuo, xe na-a. Nah nah jum eia phäh nah do be kti ni” tilü ah pyen. Ah pyen jah ta mya-in lobe kti.
23 Kona Booi Jeishüh Jüdah khong manga ima sit kti. Asua ta ksing tum moong kkhek lü leeng la tum lü pilim kkhui kshaam lü yook ima lok kti kkhyaang pä ah nambooi kyap ktie ta ah jah hmuh vaai.
24 Booi Jeishüh noh “Nah nih bäng ngheei ua. Ahina hnashen thik kti am ni. Ip kti ni” tilü ah jah mtheh. Asun üng kkhyaange noh Booi Jeishüh ah nih yaih ei u.
25 Kkhyaang pä ah nih jah kshät kona Booi Jeishüh im k'uma lut lü nghnu mi sa-a kut man lü nghnu mi sa thou lobe kti.
26 Ahina thang sun khyong abäng üng ngpyaü hü päih kti.
27 Booi Jeishüh asuna ngnama khyüh ah seh be hnüh üng ah mik mü xooi noh ah nih läk. “Davita tu kpao jah mpyeen eia” tilü ngpyaang kti xooi.
28 Booi Jeishüh im k'uma ah luh üng ah mik mü xooi phi lut vaai kti xooi. Booi Jeishüh noh “Kei noh kah ning jah mdo be khoh kti ati sun nah nih jum ktio” tilü ah jah kthäh. Asun xooi noh “Ä, Booi Pao, kah nih ning jum ei kti ni” ah nih ti be tü.
29 Asun üng Booi Jeishüh noh ah nih mik jah hne sa lü “Nah nih jum eia kba thoon she” ah ti.
30 Asun üng ah nih mik vaai-in lok kti. Booi Jeishüh noh “Ahina mong u üng phi käh jah mtheh bing bing nih bä” tilü ah jah mtheh.
31 Lüphi sit nih lü Booi Jeishüh-a thang khyong abäng üng ah nih kpyaü hü.
32 Asuna kkhyaang xooi ah nih seh be k'um üng kkhyaang akhäk noh am ngthu ei thei kti anghmo mat ah nih lo püi u. Asuna kkhyaang kho yaaia vaan naak ni.
33 Booi Jeishüh noh kho yaai ah mshot jah ta asuna kkhyaang ngthu ei lok kti. Kkhyaang pä nu mün sam tong ulü “Ahi bang ta Isare teng pea am nih hmuh khoi u ni” ah nih ti u.
34 Pharishe-e noh ta “Shatan yaai pa-a hiit üng kho yaaie ah jah kshät ni” tilü ah nih mkhyah u.
35 Asun kba Booi Jeishüh mlüh jah ngnamea ngleng hü kti. Sangsiim ngthei naak kyongea Pangsiima upa pea mong thang kdo kkya jah msuuk mtheh hü kti. Am mya kti kkhyaang naküt jah am shi khyaih kti amjü kküme phi ah jah mdo be.
36 Kkhyaang pä nu ah jah hmuh üng ah jah mpyeen ei lo kkhüt. I lüni ti ta to kshääm am vek kti toea kba pyang ma lü ktha jai ktie.
37 Booi Jeishüh noh akläke üng “Saang k'hmin nu aah vai vepyei kti. Lüphi aat kkhai kkhyaang ngseek kti ni.
38 Asuna thoon lü saang aat kkhai kkhyaang kho hah lou mah pa noh ah jah xüh vaia tä sham ua” tilü ah jah mtheh.