7
(Lükah 6.37-38, 41-42)
1 Kkhyaang käh jah si jaang ei ubä. Asun üng ni Pangsiim noh nang nih-e am ah nih jah si jaang kom.
2 Kkhyaang nah si jaanga kba Pangsiim noh nang phi ning si jaang kkhai. Kkhyaang nah säp eia kba Pangsiim noh phi ning säp ei kkhai.
3 Nah nih püia mik beng ta hmu-u kti lü nah nih mik üng vek kti thing thu ta am nah nih hmuh ei u ni.
4 I a thoon lü nah püi üng “Kah püio, nah mik beng hin ning loh peet ma vang” tilü nah pyen kti ni. Nah päta mik üng thing thu vekyo kti va.
5 Kkhyaang kdoa hana nah som ktio. Aksüka nah mik üng ka thing thu lou ei ma-a. Asun üng ta nah mik vaai lolü nah püia mik beng phi nah loh peet khoh kkhai.
6 Ui üng täng ktia kkhyaange üng Pangsiima ngsiim ngsaih kti kkhyü käh jah mtheia. Asune nglat lolü ning jah mkhuh mhlih kkhaie. Nang nih-ea phäh muti ngmoua kba aphu küüi ktia ngkho vok üng täng ktia kkhyaange ma-a käh kpyaai ua. Nanga phäh aphu kküüi ah nih kho üng lüüi kaai ei nak kkhaie ni. Kona nglat lolü ning jah mkhuh mhlih kkhai.
(Lükah 11.9-13)
7 Tä shama. Pangsiim noh ning pek kkhai. Shuia. Nah hmuk kkhai. Kshoh kkhoka. Pangsiim noh ning nghmong kkhai.
8 I lüni ti ta tä sham naküt kti noh yah kkhai. Shui hjap naküt kti noh hmuk kkhai. Kshoh kkhok naküt ktia phäh kshoh nghmon peet kkhai.
9 Nang nih-e üng ah pa-a thoon kti noh nah nih sa noh kkhaai kpeh ah tä ta lung nah nih pek kkhaie mä.
10 Nah nih sa noh nga ah tä ei ta kphyu kphyaai nah nih pek kkhaie laang mä.
11 Nang nih-e hin mkhye mshoh ktia thoon kyo u kti lüphi nah nih sa üng akdo ni nah nih peet u. Asun kba ni kkhaan khoa vek kti nih Pa Pangsiim noh phi akdo ning jah pek kkhai.
12 Kkhyaange noh ah nih ning poh peet vai nah nih yü naaka kba kkhyaange üng jah poh peet ua. Mosheia thuum jah shahma ngsiimea msuh mtheh naak noh ahin ni ah nih ti pyen hlü.
(Lükah 13.24)
13 Mkot akdiik üng Pangsiima pea vaan vaia mtun ei ua. I lüni ti ta Mulai pe da seh naak mkot jaü lü lam phi akdäm nu akdo nua thoon kti. Asuna lam üng sit kti kho hah pa ni.
14 Angshääia xün naak da seh naaka mkot ta akdiik sa ni. Lam phi akshe nu ni. Asuna lam sun hmulü sit kti phi alääm sa ni.
(Lükah 6.43-44)
15 Pangsiima kkhyü pyen ktia hana som kti shahmae jah mseei ei ua. Nah nih veeia ah nih lo u üng toa kba hnip hnooi ve u tia nah nih jah ngngaai to kkhaie. Aksanga ta ah nih mlung kko üng jah suui tong kti mhnge pi üng täng ktie ni.
16 Ah nih ve soh poh mshah üng nah nih jah kshing lok kkhaie. Ngbom ktheih sun nghling kpyüüma am nih kphyüt ei khoi. Kthei ktheih phi nghling dunga am nih kphyüt ei khoi.
17 Adung kdo thing dung noh aktheih kdo ktheih nak kti. Adung kshe thing dung ta am she aai ktia ngthei kti.
18 Adung kdo thing dung noh am she aai kti aktheih am ktheih na-khoi. Asuna ng'yüia adung am do kti thing dung noh phi aktheih kdo am ktheih na-khoi.
19 Aktheih am do kti thing dung naküt sun kkhyaange noh khyu teeng-in lü mei üng shi ktie.
20 Asuna tänga thing dung phi aktheih üng nih kshinga kba shahma ngsiima hana som ktie phi ah nih ve soh poh mshah üng nih jah kshing khoh kti.
(Lükah 13.25-27)
21 ‘Booi Pao, Booi Pao’ tilü nah khü kti naküt Pangsiima pea vaang yah kkhai am ni. Kkhaan khoa vek kti kah Pa Pangsiima hlü ei poh mshah kti va vaang yah kkhai.
22 Si jaang naaka mhnüüp üng kkhaan khoa kkhyaang kho hah noh ‘Booi Pao, Booi Pao! Nah ngming shum ei lü Pangsiima kkhyü kah nih kpyaü ktie ni. Nah ngming shum ei lü kho yaaie jah mshot lü mün sam kshe kho hah pa kah nih poh ktie ni’ tilü nah nih nah mtheh kkhaie.
23 Kei noh ta ‘Nang nih am ning jah kshing khoi ngü. Shot ua. Pangsiima thuum lüüm kkaan lü nah nih poh ktie ni’ tilü kah ning jah mtheh be kkhai.
(Lükah 6.47-49)
24 Kah ti pyen su ngngaai lü nah ksang nak kti kkhyaang naküt hin ngyam mah kti im ksha üng täng kti ni. Ah nih noh doua mdeka säm naaka im shak kti.
25 Kho k'a lo kkhüt lü tui long däm lolü tui kaai lok kti. Kho khi kshe noh phi im sun asut kkhüt. Lüphi asuna im sun doua mdeka säm naaka ah nih shaka thoon lü am kyu-laang.
26 Keia pyen ngjalü am nah ksang nak ktia kkhyaang ta angyam am vek kti im ksha üng täng kti ni. Asun noh mdih heena kkhaana im shak kti.
27 Kho k'a lo kkhüt lü tui long däm lolü tui kaai lok kti. Kho khi kshe noh phi im sun asut kkhüt. Asun üng ta im kyuk kti. Asuna ima kyuk sun kyüh ei shek kti. Im abänga sim pyak päih kti ni.
28 Booi Jeishüh noh ahin kba ah jah msuh mtheh angpääng lo üng kkhyaange mün sam tong ktie.
29 Ah nih-ea Sangsiim ktheemea jah mthei üng am lang lang. Ahiit mah-a ah jah mtheia kyak kti.