13
(Marküh 4.1-9; Lükah 8.4-8)
1 Asuna mhnüüp üng Booi Jeishüh ima kkhyüh sit lü tui li peia ngshut kti. Ah veeia ngkhääm lok kti kkhyaang pä nung kolaih lü Booi Jeishüh mhlüüi mat üng kaai lü ngshut kti.
2 Kkhyaang pä nu abäng tui li peia ngdüüi ktie.
3 Booi Jeishüh noh pum üng msäp lü kkhyaang kho hah pa jah msuuk mtheh kti. Ah nih noh “Msi phuh kti mat msi phuh kkhaia sit kti.
4 Msi ah phuh sun msi ui akhäk lama kyalü asua kkhae lo-ulü ah nih koh ei u.
5 Msi akhäk ta lung kphaka ngphah naak mdeka kkhaana kyak kti. Asua mdek api ni ave. Asuna thoon lü msi ui ta akjaanga sot lokyo kti. I lüni ti ta mdek sun am shah pyei.
6 Lüphi kho pyaang lolüta kho kshou noh uui lüta ah pya am ve pyei ham lü msi ksota ngjaai lü thi-ei be kti.
7 Msi ui akhäk ta nghling phungea hnüna kyak kti. Nghling phunge däm lo kshet ulüta msi dunge jah khüm-in lü msi dunge am däm duh lo khoh ti.
8 Msi ui akhäk ta mdek kdo üng kyalü hluui paai lolü msi ui sä mat sun sä üng phya mata shot be kti ni. Msi ui sä mat sun sä üng kkhyuk kipa shot be kti ni. Msi ui sä mat sun sä üng kthum kipa shot be kti ni.
9 Ah nghnga khuui kti noh ngja-she” tilü ah jah mtheh.
(Marküh 4.10-12; Lükah 8.9-10)
10 Kona akläke Booi Jeishüh-a veei lo-u lü “Kkhyaange üng nah jah msuh mtheh üng i lü pum üng msäp lü nah jah msuh mtheh ni” tilü ah nih kthäh u.
11 Ah nih noh “Kkhyaangea am kshing khoh Pangsiima upa pea mong ngthup kti theem ngvaai naak nang nih-e däk üng ni Pangsiim noh ah ning jah kshing shak.
12 Pangsiima mong ngja-kya lü mseei lü ksang nak ktia kkhyaang üng Pangsiim noh sha lü ah ngjaak kya vaia pum ngyam pe-bok kkhai. Ah nih ta Pangsiima pum ngyam üng be bang kkhai ni. Pangsiima kkhyü mseei lü am su ngngaai ktia kkhyaang ta Pangsiima pea mong ah hmuh ngjaak khoi api sa hngoh phi Pangsiim noh mkhyüh peet be kkhai ni.
13 Asuna thoon lü kkhyaange üng pum üng msäp lü kah jah mtheh yah ni. Ah nih-e noh bük lü am hmuh u. Ngja-kyo ulü phi am ngngaai ulü am ngja-kya u.
14 Shahma ngsiim Hei Shajah-a malam pyena kba ah nih-e üng küm seei lok kti ni. Ng'yuk kti ta ‘Ngngaai ulü ngja-ulü käh ngja-kya kkhaie. Bük ulü bük ulü käh hmuk kkhaie.
15 I lüni ti ta asune hin mlung kka ngngaih ka ktia thoon lok ktie. Ah nih nghnga pang lok kti. Ah nih mik mphiing-in shak ktie. Am ani ta mik üng hmu-ulü nghnga üng ngjak kkhaie kyo. Asun üng ah nih mlung üng ngja-kya ulü kah veeia nglat lo be ulü kah jah mdo be vai shü kyo’ tilü vek kti.
16 Nang nih-e ta nah nih nghnga nglang lü nah nih mik noh ahmuh khoh-a phäh Pangsiim noh do kya naak ah ning jah peet ni.
17 Ngngaai ua, kei kah pyen ma kkhai ni. Nang nih-e noh nah nih jah hmuh-e hin shahma ngsiim jah Pangsiim lei shong kti kkhyaang kho hah-e noh hmuhlü kyo ulü phi am hmuhüt yah u. Nang nih-e noh nah nih jah ngjaake hin ngja-hlü kyo ulü phi am ngja-hüt u.
(Marküh 4.13-20; Lükah 8.11-15)
18 Ngngaai ua, pum msäpa mong ti hlü ta hin kba ni.
19 Mat mat noh Pangsiima pea mong ah ngjaak kyo käh ngja-kya lü Shatan yaai pa lolü ah nih-a mlung kkyoonga ka Pangsiima kkhyü sun ah loh be. Asun hin lama kyak kti msi ui ni.
20 Lung kphaka ngphah naak mdeka kkhaana kyak kti msi ui ta Pangsiima kkhyü ngjaak naak üng je kyai lü dou daang ktia kkhyaange sun pyen hlü ni.
21 Lüphi ah nih mlung kkyoonga Pangsiima kkhyü am phung pya ma lü noong vei sa däk ni ah nih jum ei u. Pangsiima kkhyüa phäh khui kha mkhuh mhlih ah nih shoong toh ei lo üng ta nglat-in be ktie.
22 Nghling phung hnünea kyak kti msi ui ta Pangsiima kkhyü ngjak ktia kkhyaang pyen hlü ni. Lüphi ngthiim khoa phäh kking sääi siing naak jah booi ei daaü ngü tilü kpoon ei naak noh Pangsiima kkhyü sun ah nih khüm-in lo ni. Asuna thoon lü Pangsiima kkhyü ah nih mlung kkyoonga am ngthei paai khoh.
23 Mdek kdo üng kyak kti msi ui ta Pangsiima kkhyü sun ngja-kya lü ksang nak ktia kkhyaang sun pyen hlü ni. Pangsiima kkhyü ah nih-a mlung kkyoonga sä mat üng sä phya mat, sä mat üng sä kkhyuk kip, sä mat üng sä kthum kipa ngthei paai kti” ah ti.
24 Booi Jeishüh noh ah nih-e üng pum üng msäp lü ah jah mtheh be tü. “Kkhyaang mat noh ah loua msi ui kdo sun ah phuh ni. Pangsiima upa pe hin ahin üng täng kti ni.
25 Mthan mat üng ta kkhyaange ah nih ih k'um üng ah ye noh lolü kyung msi kdoa kshuung kkeh-a mphyo ui msi sun phuh lü sit be kti.
26 Kyung msi däm lolü vui paai lolüta mphyo msi phi sot lok kti.
27 Lou mah-a xüh shoh-e ah veeia lo-ulü ‘Angvaaio, nah lou ma sä msi kdo nah phuh am ni bä. Asun kba ani ta mphyo i lü sot lok kti ni’ tilü ah nih kthäh u.
28 Lou mah noh ‘Ye mat noh ah poh ni’ tilü ah pyen be. Ah xüh shoh-e noh ‘Sit u ngüshe mphyo sun kah nih phuk-in vaio’ tilü ah nih kthäh u.
29 Lou mah noh ‘Am ni. Mphyo nah nih phuk u ta kyung dung apya nghloom lok kkhai ni.
30 Kyung aah lo veia kyung mah mah ayüma däm ei nishe. Asuna ksüün üng kyung aat ktie üng hin kba kah jah mtheh kkhai. Aksüka mphyo phuma u kti lü shom lü mei üng shi-in ua. Kona kyung aat u kti lü kkheia süm kom u kti’” tilü ah jah mtheh.
(Marküh 4.30-32; Lükah 13.18-19)
31 Booi Jeishüh noh pum msäp mat ah pyen be tü “Pangsiima upa pe hin Isare an ne ui üng täng kti ni. Kkhyaang mat noh an ne ui ah lou ma-a ah phuh ei.
32 Msi mna ui naküt üng an ne ui hin diik bok kyolüphi msi ui phuh lü ah däm lo kona ta kum mat üng ahun däm lolü thi-be ktia dung naküte üng akdäm boka thoon lok kti. Thing dunga kba däm lok kti. Kkhae lo-ulü angbaan üng ngbu tu-ei lok ktie” ah ti.
(Lükah 13.20-21)
33 Jeishüh noh pum msäpa mong mat ah pyen be tü. “Pangsiima upa pe hin kkhaai phoom üng täng kti ni. Nghnu mi mat noh kkhaai kkhui sit mat sun kkhaai phoom api sa üng kso lü abäng sun phoom lok kti” tilü ah pyen.
34 Jeishüh noh kkhyaang päe üng ta pum üng msäp lü ni ah jah msuh mtheh. Pum am msäp lü i phi am jah mtheh.
35 Asun üng shahma ngsiima malam pyena kba küm seei lok kti. Shahma ngsiima pyen ta “Kah ning jah ngthuh ei püi üng pum msäp lü ni kah pyen. Ahina kho mdek mhnün msenga kkhyüh ngthup ktie kah jah mtheh kkhai” tilü vek kti.
36 Kkhyaang pä nu jah ta-hüt lü im k'uma lut kti. Akläke Booi Jeishüh-a veeia lo ulü “Lou mphyo üng pum msäp ta - i ti hlü ni. Jah mtheh bea” ah nih ti u.
37 Ah nih noh “Msi ui kdo phuh kti ta kkhyaang sa ni.
38 Lou ta kho mdek ti hlü ni. Msi ui kdo ta Pangsiima pe üng shääng ei kti kkhyaange ni. Mphyo hin Shatan yaai pa üng shääng ei kti kkhyaange ni.
39 Mphyo msi phuh kti ye ta Shatan yaai pa ni. Kyung aah ksüün ta akpäih naaka ksüün ni. Kyung aat ktie ta kkhaan kho ngshäe ni.
40 Aat ktie noh mphyo sun phu-ulü mei üng ah nih shi-ina kba akpäih naaka kha üng asun kba vek kkhai.
41 Kkhyaang Sa noh ah kkhaan kho ngshäe jah tüüi lolü ah upa pe üng jah mkhye mshoh shak ktie jah bäü hma kti abäng sun mphyoa kba jah phuk kkhaie ni.
42 Kkhaan kho ngshäe noh mei üng jah kphuum-in kkhaie. Kyap lü ah nih ha kkhyüüt kkhaie.
43 Pangsiima kkhyü ksang nak ktie ta ah nih Pa Pangsiima upa pea kho nghngia kba lik lik jaaü jaaü kkhaie. Ah nghnga khuui kti noh ngja-she.
44 Pangsiima upa pe hin lou ma kho hmün k'uma ah nih thupa khoh kkhyam üng täng kti. Kkhyaang mat noh asuna khoh khyam hmuyot lü mdek üng ah vuih be. Je kyai tong lü sit be lü akve naküt ah joih päih. Kona asuna kho hmün sun ah kkhyäih.
45 Pangsiima upa pe hin aphu kküüi muti ngmou üng kun pan poh kti üng täng kti.
46 Ah nih noh aphu kküüi pi pi muti ngmou hmulüta akve naküt jooi lü asuna muti ngmou sun ah kkhyäih.
47 Pangsiima upa pe hin tui lia ngvaai vooi kti üng täng kti. Ngvaai ah nih voih üng nga mjü küm ng'ook kti.
48 Ngvaai üng nga be lüta nga kshuie noh ngvaai sun kkonga ah nih kaih u. Kona ngshut lü nga kdo sun peem üng ah nih xon u. Am do kti nga ta ah nih kpyaai-in u.
49 Akpäih naaka ksüün üng ahin kba thoon kkhai ni. Kkhaan kho ngshäe lo-ulü Pangsiima kkhyü ksang nak kti jah Pangsiim kpet mjak ktie sun jah phyäi te kkhaie.
50 Pangsiim kpet mjak ktie sun mei k'uma jah kkhya-in kkhaie. Asun üng kyap lü ah nih ha kkhyüüt kkhaie.
51 Nang nih-e noh ta ahina mong abäng nah nih ngja-kya ktie mä” tilü Booi Jeishüh noh ah jah kthäh. “Ä, kah nih ngja-kya ktie ni” ah nih ti u.
52 Booi Jeishüh noh “Pangsiima upa pea mong ngjalo kya lü Pangsiima thuum jah mthei kti naküt hin im mah pa üng täng kti ni. Ah nih noh külak akphyüm phi akthaai phi hlü kti kän ksuuma ka ah kkyoong üng jah kshet peet kti” tilü ah pyen.
(Marküh 6.1-6; Lükah 4.16-30)
53 Booi Jeishüh asuna pum msäpe ah jah mtheh kona asua kkhyüh shot kti.
54 Ah päta mlüh-a phalo be lü Pangsiima kkhyü ah jah mtheh lo. Kkhyaange mün sam ktie. “Ahina kkhyaang noh ta ahin kba theem ngvaai naak ta hoa ah yah ni. Mün sam kshe poh naak hiit phi i hok kba ah yah ni” tilü ngthäh ngkhyah ktie.
55 “Ah nih hin im ksha-a sa va, am nishü. Ah nu phi Marih-a ah nih shui u, am ni bä. Ah nae Jakop, Joshep, Shimon jah Jüdah-e sän va am ni bä.
56 Ah na nghnu mie phi abänga nih hlonga vek ktie, am ni bä. Asuna athoon üng ahina su ngngaih naake ta hoa ah yah hü ni” tilü mat jah mat ngthäh ktie.
57 Asuna kyalü ah nih sun am je na-u. Asun üng Booi Jeishüh noh “Shahma ngsiim aksea ta ah nih lei shong kyo u. Ah tui khyonga ta, ah koon shaang üng ta, ah ima ta am lei shong u” ah ti.
58 Am ah nih jum eia phäh mün sam kshe kho hah am ah poh ni.