14
(Marküh 6.14-29; Lükah 9.7-9)
1 Asuna ksüün üng Kalile hne up kti shang phuhlang Herot noh Booi Jeishüh-a mong ah ngjaak lo.
2 “Ah nih hin Patiso Johaan thih naak üng thou be kti va ni khüng vai. Asuna thoon lü mün sam kshe ah poh naak khoh ah hiit vek kti” tilü ah xüh shoh-e üng ah jah mtheh.
3 Shang phuhlang Herot noh Patiso Johaan man lü khit lü khupa k'uma asun hlaan sa-a ah jah khyum shak khoi. I lüni ti ta shang phuhlang Herot noh ah na Philipa kkhyu Herotiah ah kkhyu naak.
4 Asun sun Patiso Johaan noh shang phuhlang Herot üng “Nah na-a kkhyu nah huh hin thuum üng am ngkäk” tilü ah pyen.
5 Herot noh Patiso Johaan hnim vai tääng kyo lüphi kkhyaange ah jah kyüh. I lüni ti ta ah nih-e noh Patiso Johaan hin shahma ngsiima ah nih ngngaih u.
6 Herot noh ah hmi shüüm naak pooi ah poh sun üng Herotiah-a sa nghnu mi sa sun Herot jah ah kkhinea ma-a nglaam kti. Asun üng Herot noh ah xe naak kkhüt.
7 Asuna thoon lü nghnu mi sa üng “Nah hlü ei a i phi nah tong eia. Kah ning pek kkhai ni” tilü ng'yün ngse lü kkhyü taam ah peet.
8 Nghnu mi sa noh ta ah nu noh ah mtheh-a kba “Patiso Johaana lu puum kpäi lung üng tuh kuunga nah nah peet vai kah hlü ei ni” tilü ah pyen be.
9 Shang phuhlang ta puk shelok kti. Lüphi ah kkhinea ma-a ng'yün ngse lü kkhyü ah taama phäh üng nghnu mi sa-a hlü ei sun ah nih poh vaia ah mkhyah ni.
10 Khupa k'uma vek kti Patiso Johaana lu kkyük vaai kkhaia kkhyaang ah jah tüih.
11 Ah lu sun kbe lung üng lo püi ulü nghnu mi sa üng ah nih peet u. Nghnu mi sa noh ah nu üng ah peet.
12 Patiso Johaan sun akläke noh ah yook kkot vaai ulü ah nih mkhyüh vaai u. Kona Booi Jeishüh-a veei sit ulü asuna mong ah nih mtheh u.
(Marküh 6.30-44; Lükah 9.10-17; Johaan 6.1-14)
13 Asuna thoon ve sun Booi Jeishüh noh ah ngjaak kona mhlüüi üng kkhyaanga nghi naaka sit kti. Lüphi kkhyaang pä nu noh asun ngja-ulü mlüh naküt üng kae noh kkong lam üng ah nih läk u.
14 Booi Jeishüh noh kkong ah pha vaai sun üng kkhyaang pä nu ta ah jah hmuh. Kkhyaange jah mpyeen ei tong lü ah nih-e üng am khyaih ktie sun ah jah mdo be.
15 Kho kyaak shoa ta akläke Booi Jeishüh-a veei lo ulü “Ahia ta kkhyaang phi nghi kti, kho phi mthan lo hnüh kkhai. Kkhyaang päe hin nih pi pei mlüh ngnamea sit hü hnüh u-she. Ah nih ei ook vai kkhyäi ei vaai u-she” ah nih ti u.
16 Booi Jeishüh noh ta “Ah nih seh vai am hlü. Nang nih-e noh jah mbei ua” ah ti.
17 Akläke noh “Kah nih veeia kkhaai kpeh beei mhma jah nga kkeih nghngih sa thak ni ah ve” tilü ah nih mshak be u.
18 Booi Jeishüh noh “Asun kah veeia jah lo püi ua” tilü ah jah mtheh.
19 Kona kkhyaange mphyoa kkhaana ah jah ngshut shak. Booi Jeishüh noh kkhaai kpeh beei mhma jah nga kkeih nglung nghngih sun jah dou ma lü kkhaan kho da mang lü Pangsiim ah je ei. Kkhaai kpeh kphyüt lü nga phi keek lü kkhaai kpeh jah nga kkhyaange üng ah nih jah peet vaia akläke üng ah jah peet.
20 Abäng noh phü ktie. Ak'hleei lo ngphyüt ngshek kti kkhaai kpeh jah nga sun akläke noh hooi be ulü sä xalei nghngih lok kti.
21 Asuna ei ei ktie üng ka kpa mi thoong mhma lok ktie. Nghnu mi hnashene phi ngpüi ktie.
(Marküh 6.45-52; Johaan 6.15-21)
22 Kona Jeishüh noh akläke akjaanga mhlüüi üng jah kaai shak lü tui li saye da ah jah tüih ma. Ah pät vehüt ma lü kkhyaang päe ah jah hläh be.
23 Kkhyaange ah nih seh be kona Booi Jeishüh tä sham kkhaia ah pät däk msuunga kaai kti. Khoa mthan lo üng ah pät däk asua vek kti.
24 Asun k'um üng akläke mhlüüi üng tui li nglung phalo hnüh ktie. Kho khi kshe khi lolü tui mkhyung ngnook lolü mhlüüi sun ngkhääi hü kkhüt kti.
25 Aai khoon ksük üng ta Booi Jeishüh tuia kkhaana sit lü ah nih veeia lok kti.
26 Akläke noh ta Booi Jeishüh tuia kkhaana ah seh sun hmu-ulüta kyüh ei tong ulü “Mkhya ni” tilü ngpyaang ktie.
27 Booi jeishüh noh ta “Kei ni, käh sääi ua, käh kyüh ei ti ua” tilü ahunata ah jah mtheh.
28 Peta noh “Booi Pao, nang ah ni ksang ta kei phi nah veeia tuia kkhaana nah seh shaka” tilü ah pyen.
29 Booi Jeishüh noh “Loa” ah ti. Asun üng Peta mhlüüi üng kyum lü Booi Jeishüh-a veei tuia kkhaana sit kti.
30 Lüphi kho khi kshe hmuh lolüta kyüh ei lolü tui üng ngsum lo sho sho hnüh kti. “Booi Pao, nah kuum kyana” tilü ngpyaang pyei kti.
31 Booi Jeishüh noh angshenga ah kut shäng lü Peta ah man. “Nah jum ei naak ngseek ve. I lü nah mlung üp lat kti ni” ah ti.
32 Ah nih xooi mhlüüi üng ah nih kaai lo kona kho khi kshe hüp be kti.
33 Asun üng mhlüüi üng ngpüi kti abäng noh Booi Jeishüh hjok khah ulü “Nang hin Pangsiima ning sa ni” ah nih ti u.
34 Tui li kkaan ma ulü Kene Sharet khyong phavaai ktie.
35 Asuna khyonga kae noh Booi Jeishüh kshing lobe tü ulüta ah nih pi pei naküta thang ah nih kpyaü hü u. Kkhyaange noh am shi khyaih kti abäng Booi Jeishüh-a veei ah nih jah lo püi u.
36 Am shi khyaih ktie noh ah ksu phyanga pyaai hngoh ah nih hneh yah vai ua. Booi Jeishüh ah nih nghui naak u. Hne naküt kti do be kti.