12
(Marküh 2.23-28; Lükah 6.1-5)
1 I vei käh hjou ham ktia Booi Jeishüh jah akläke sun Pangsiim ngam püi mhnüüp üng kyung saang khoe jah kkaan lü sit ktie. Akläke ei noh jah khyoot ei lolüta ah nih seh shoa dü pah lü mnooi ei lü ah nih ei u.
2 Pharishe-e noh asun hmu ulü Booi Jeishüh üng “Nanga akläke hin jah büka. Pangsiim ngam püi mhnüüpa thuum lüüm kkaan lü poh ve-u” ah nih ti u.
3 Booi Jeishüh noh “Ahlaan üng shang phuhlang Davit jah ah püie noh ei noh ah jah kkhyoot ei üng i poh ktie ati sun Sangsiim üng nah nih hmukhoi ktie, am ni bä.
4 Davit Pangsiima jih shung müüpa k'uma lut lü Pangsiima kkhaai kpeh sun ah pät jah ah püie mah mah ah nih ei u. Asuna kkhaai kpeh sun khotu ngsiime däk noh ni ah nih ei vaia thuum ave kyo.
5 Pangsiim ngam püi mhnüüp tä lü khotu ngsiime noh hjok khah im nua Pangsiim ngam püi mhnüüpa thuum lüüm kkaan lü poh mshah ktie. Lüphi mkhye mshoh ktie am ni laang. Asuna mong Mosheia thuum sa up üng am nah nih hmukhoi ktie bä.
6 Kah ning jah mtheh kkhai. Hjok khah im nua kthaka däm duh kti mat ahia vek kti.
7 Sangsiim üng vek kti kkhyü ta ‘Khah naaka kkhyüng kshei kei noh am hlü ei ngü. Kkhyaang jah mpyeen ei naaka mlung kko ni kah hlü ei’ tilü Pangsiim noh ah pyen ni, tia ng'yuk kti. Ahina kkhyü nglung noh i ati hlü sun nah nih kshing u ta ah mkhye am vek kti sun nah nih jah kbäü ei kkhaie am ni.
8 Kei, Kkhyaang Sa noh Pangsiim ngam püi mhnüüpa up kti Booi Pa kah thoon kti” tilü ah jah mtheh.
(Marküh 3.1-6; Lükah 6.6-11)
9 Asuna kkhyüh Booi Jeishüh shot lü Sangsiim ngthei naak kyonga lut kti.
10 Asua ah kut kthi kkhyaang mat vek kti. Sangsiim ktheeme jah Pharishe-e noh “Pangsiim ngam püi mhnüüp üng kkhyaange jah mdo be vaia thuum üng ngkäih kti mä” tilü Booi Jeishüh ah nih kbäü ei naaka mkot ave vaia ah nih kthäh u.
11 Asun üng Booi Jeishüh noh “Nang nih-e üng mat mat noh Pangsiim ngam püi mhnüüp üng nah nih to sän khuui üng ah kyaak yot ta käh kshet be lü nah nih vek kkhaieo.
12 Toa kthaka kkhyaanga phu küüi kkhüt kti ni. Asuna thoon lü Pangsiim ngam püi mhnüüp üng akdo poh vaia ngkäih kti ni” tilü ah jah mshak be.
13 Kona ah kut vaang kthi üng “Nah kut shänga” tilü ah mtheh. Ah kut shäng lüta ah kut kthi sun vaang da ah kut kdoa kba do-in be kti.
14 Pharishe-e noh ta “Jeishüh i hokba poh vai ni” tilü ah nih seng u.
15 Booi Jeishüh noh asuna mong kshing lolüta asuna kkhyüh shot kti. Kkhyaang kho hah pa noh Jeishüh läk ulü am khyaih ktie phi ah jah mdo be.
16 Asune noh kkhyaange üng ah nih-a mong käh ah nih jah mtheh bing bing vaia ah jah msääi.
17 Asun üng shahma ngsiim Hei Shajah-a malam pyen küm seei lok kti.
18 “Ahia kah msoon kah xüh shoh vek kti. Ah nih sun kah kphya naak ni. Ah nih-a phäh kah mkhüh hnip kti. Ah nih üng kah Mkhyangsiim kah pek kkhai. Kah ngpyuun naaka mong kkhyaang mjü kse abäng üng kpyaü hü kkhai.
19 Nghai ngbak am poh. Am vu ngpyaang. Ngnam kshuung lama akthai kdäma ah pyen u noh phi am ngja.
20 Ngkuun-in kti kyaai thing phi khep bät-in kkhai am ni. Mei phäih üng ka mdu hmi hnüh kti mei shuui phi mthi-in kkhai am ni. Pangsiima ngpyuun naak angnääng veia mtun ei lü poh kkhai.
21 Kkhyaang mjü abäng noh ah nih sun üm nalü ääp ei kkhaie ni” tilü vek kti.
(Marküh 3.20-30; Lükah 11.14-23)
22 Kona ah mik mü käh shi hlo thei kti kho yaaia vaan naak kkhyaang mat Booi Jeishüh-a veei ah nih lo püi u. Asuna kkhyaang shi hlo be thei lü ah mik vaai ktia Booi Jeishüh noh ah mdo be.
23 Kkhyaang abäng mün sam tong lü “Ahina kkhyaang hin Davita tu kpa-a thoon to kkhai mä” tilü ngthäh ngkhyah ktie.
24 Pharishe-e noh ahina mong ngja-ulüta ah nih-e noh “Ah nih noh Bese Bu kho yaaia hiit üng kho yaaie ah jah mshot ni” tilü ah nih pyen u.
25 Booi Jeishüh noh asunea su ngngaih kshing lolüta “Teng pe mat angkhoi ngkhya ta sim pyak kkhai. Mlüh mat, kkyoong long mat, phi angkhoi ngkhya ta am veyüm khoh u.
26 Asun kba ni Shatan yaai pa noh ah pät noh ah pät akshät ei ta Shatan yaai pa-a pe phi ngkhoi ngkhya lü sim pyak kkhai ni.
27 Avai shüa kei noh Bese Bu kho yaai pa-a hiit üng kho yaaie kah jah kshäta athoon üng nang nih-ea akläke noh ta ua hiit üng kho yaai jah kshät ktie ja. Nah nih nah ngngaih mkhye u atia asune shak shi kkhaie ni.
28 Lüphi kei noh Pangsiima Mkhyangsiima hiit üng kho yaaie kah jah kshäta athoon üng Pangsiima upa pe nang nih-e üng säh lok kti ni.
29 Angjung ktha mah pa sun am ah khun yai ma ta ah im k'uma lut lü ah külak ngui xüi käh seh ei khoh kkhai. Asun kba poh üng va ah im k'um su mpyu ei khoh kkhai.
30 Kei da am ngpüi kti noh aksanga ta nah kpet mjak kti ni. Kah hlonga am ngdüüi lok kti ta ah nih noh jah ngpyeen-in hü shak kti ni.
31 Ngngaai ua, kei kah pyen ma kkhai. Kkhyaange noh Pangsiim ah nih kshe naak naküt phi, ah nih mkhye naak naküt phi Pangsiim noh jah mhlät kkhai ni. Lüphi Mkhyangsiim thang msheet ktia kkhyaang ta i tüh-a phi Pangsiim noh ah mkhye am mhlät khoh.
32 Mat mat noh kei Kkhyaang Sa ah nah she sham ta ah mkhye mhlät kkhai ni. Lüphi mat mat noh Mkhyangsiim ah she sham ta tuh-a kha üng phi ngooi kho naküt üng phi ah mkhye am mhlät laang.
(Lükah 6.43-45)
33 Nah veeia adung kdo thing dung ave üng va aktheih kdo nah yah ei kkhai. Nah veeia adung kdo am ave ta aktheih kdo phi am yah ei kti. Aktheih büh naak üng ia mäi dung nak kti tia nih kshing khoh kti.
34 Nang nih-e hin kphyu kphyaai ha shik mah-a ah ning jah hnuun püi mshing ni. Nang nih akshe-e noh i hokba akdo nah nih pyen thei kkhaie ni. Mlung k'uma ka ni mpyong üng ah luh lo.
35 Kkhyaang kdo ta ah su ngngaih do ktia thoon lü ah poh mshah pyen kshak phi do kti. Kkhyaang kshe ta ah su ngngaih phi am do ktia thoon lü ah poh mshah pyen kshak phi akshe ni.
36 Kah ning jah mtheh kkhai. Pangsiima si jaang naaka mhnüüp üng kkhyaang naküt noh i a am mkyak ktia ah pyen kshak naküta phäh kshü kset naak khaam ei yah kkhai.
37 Nanga nah ti pyena kba Pangsiim noh ‘Ahina kkhyaang ngpyuun kti ni’, am ani üng ‘Ahina kkhyaang mtaam peet vaia ngkäih kti’ tilü mkhyah mtaang kkhai ni.”
(Marküh 8.11-12; Lükah 11.29-32)
38 Kona Sangsiim ktheeme jah akhäke noh “Angvaaio, ngshing ngte naak nah poh kah nih hmuhlük ktie ni” ah nih ti u.
39 Booi Jeishüh noh ta “Tuh-a kha üng ka kkhyaange hin shexu pi pi lü Pangsiim kpet mjak ktie. Ah nih nih-e noh ngshing ngte naak hmuhlük ktie. Lüphi shahma ngsiim Jonah-a ngshing ngte naaka ngkho ni ah nih hmuh kom. Ngshing ngte naak akse am hmuyah u.
40 I lüni ti ta Jonah ta mhnüüp kthum jah mthan kthum nga nua kkhon k'uma ah ve yah-a kba kei, Kkhyaang Sa phi Mo Pi khoa mhnüüp kthum jah mthan kthum kah veyah kkhai.
41 Pangsiima si jaang naak mhnüüp üng Nineveh mlüh-a ka kkhyaange ngdüüi lo-ulü ‘Tuh-a kha üng kkhyaange üng mtaam jah pephya kuung kti ni’ tia pyen mkhyah lok kkhaie. I a thoon lüni ti ta shahma ngsiim Jonah noh Pangsiima kkhyü ah nih veeia kpyaü lüta ah nih mkhye vuuk be ktie. Kah ning jah mtheh kkhai. Ahia shahma ngsiim Jonah-a kthaka däm duh kti mat vek kti.
42 Asum pe da ka nghnu mi shang phuhlang noh Pangsiima jah si jaang lo mhnüüp üng ta ngdüüi lolü ‘Tuh-a kha üng ka kkhyaange hin üng mtaam jah pephyak kti’ tia pyen mkhyah lok kkhai. I lüni ti ta shang phuhlang Sholoh Mong pum ngyam pyen kshak sun ngngaai lok kkhaia asuna nghnu mi shang phuhlang kho mdek kphyüta kkhyüh lok kti. Kah ning jah mtheh kkhai. Ahia shang phuhlang Sholoh Monga kthaka däm duh kti mat vek kti ni.
(Lükah 11.24-26)
43 Kho yaai sän kkhyaanga kkhyüh ah shot üng mkyaanga ngvaak hü hü lü ah ngxü naak vai hjap hü lü am hmu.
44 Asuna thoon lü ah nih noh ‘Kah shot naak loa im kah sit be kkhai’ tilü pyen kti. Ah ve naak khoia ah pha lo be üng ah ve naak khoi im su u phi am ah navelü ngpheih ngkhoih ei lü angsih ngkhäh sa-a vek kti ta ah hmuh vaai.
45 Asun üng ta ah päta kthaka shebok ktie kho yaai kkhyüh jah khü vaai lü asuna kkhyaang üng ah jah vaan püi. Asun üng ta asuna kkhyaanga ve soh sun ahlaana kthaka kshe hleen lobok kkhai. Asun kba ni tuh-a kha üng ka kkhyaang kshe-e üng thoon lok kkhai” tilü ah jah mtheh.
46 Booi Jeishüh noh kkhyaang pä nue ah jah ngthuh ei püi k'um üng ah nu jah ah nae phalok ktie. Ah nih-e noh kho kpunga ngdüüi lü Booi Jeishüh ngsi ngjaang hlü püi ktie.
47 Mat mat noh “Angvaaio, nah nu jah nah nae noh kho kpunga ngdüüi lü ning ngthuh ei hlü püi ktie ni” tilü ah mtheh.
48 Booi Jeishüh noh ta “Keia nu ta - u ni. Keia na ue ni” tilü ah jah kthäh.
49 Ah nih läk ktie jah kkhi hü lü “Büka, hine hin kah nua kba, hine hin kah naea kba ni.
50 Kkhaan khoa vek kti kah Pa Pangsiima hlü eia kba vesoh naküt kti hin keia na, keia si, keia nua kba ni” tilü ah pyen.