1 Booi Jeishüh noh akläke xalei nghngih asun kba ah jah msuh mtheh kona asuna kkhyüh shot lü yeli ksäh pi ngnama jah msuuk mtheh hü kkhaia sit kti. 2 Khupa k'uma ah nih pheh u Patiso Johaan noh Booi Jeishüh Khritoa poh mshah-a mong ngja-lüta ah päta akläke Booi Jeishüh-a veei ah jah tüih. 3 Ah nih-e noh “Angvaaio, Patiso Johaana malam pyena kba lok kkhai hin nang mä. Am ani üng akse mat mat kah nih mtät ham kkhaie mä” tilü ah nih kthäh u. 4 Booi Jeishüh noh “Sit be ua. Nah nih hmuh ngjaak naküt Johaan üng mtheh vaai be ua. 5 I lüni ti ta ah mik müe ah nih mik vaai be ktie. Ah kho kthie sit hü be ktie. Mneh kshe mneh kti do be ktie. Ah nghnga kpangea hnga nglang be kti. Thipääng ktie phi ah jah mthoh be ni. Ampyeen kshe-e noh thang kdo kkya ngja-hü hnüh ktie. 6 Up lat naak mlung käh vek ktia nah jum ei ktia phäh do kya naak vek kti ni” tilü ah jah mtheh. 7 Patiso Johaana akläke ah nih seh be k'um üng Booi Jeishüh noh kkhyaang pä nu üng Patiso Johaana mong hin kba ah jah mtheh. “Mkyaanga vek kti Johaana veei nah nih seh u üng i hmuk kkhaia nah nih sit ktie ni. Kho khia mhnook hü kyaai si dung bük kkhaia nah nih sit ktieo. 8 I hmuk kkhaia nah nih sit ktie ni. Shui hnip shak kshen aphu kküüi bilou kti bük vaai kkhai nah nih sit ktieo. Asuna shui shak bilou ktie ta booia ima ni ah nih ve u. 9 Asuna athoon üng i hmuk kkhaia nah nih sit ktie ni. Shahma ngsiim mat nah nih hmuhlük ktie mä. Kah ning jah mtheh kkhai. Asun aksang ni. Shahma ngsiima kthaka däm duh bok kti sun nah nih hmuh yah u ni. 10 Ah nih-a mong Sangsiim üng ng'yuk kti ta ‘Bük ngngaaia, kah ngshä sun nah ma-a kah tüüi kkhai ni. Ah nih noh nah seh naak vaia lam ning pyaan peet kkhai ni’ ah ti. 11 Ngngaai ua, kah pyen ma kkhai. Nghnu mi üng hmi lo naküt kti üng Patiso Johaana kthaka däm duh kti am ve. Lüphi Pangsiima upa pe üng shääng ei ktia akdiik bok ta Johaana kthaka däm duh bok kti. 12 Patiso Johaan noh Pangsiima kkhyü ah kpyaü hü ah sut eia kkhyüh tuh vei säpa ah nih nih-e noh Pangsiima pe shong shak vaia ah nih ngjung ktha jah hiit üng mtun ei kkhüt ktie. Ngjung ktha mah kti kkhyaang kse-e noh phi ah nih vaan vaia mtun ei kkhüt ktie. 13 Patiso Johaana kha säpa shahma ngsiim abänge jah Mosheia thuume noh Pangsiima pea mong anapyen ktie ni. 14 Ah nih-ea malam pyen jum naak hlüa mlung nang nih-e üng ave kuung ta Eilijah lobe tü kkhaia ah nih pyen u hin Patiso Johaan ti naak hlü ni. 15 Ah nghnga khuui kti noh ngngaai she. 16 Tuh-a kha üng kkhyaange hin i üng jah msäp mshuui vai ni. Ah nih-e hin ngnam kshuunga lü ei kti hnashene üng täng ktie ni. 17 Hnashene noh mat jah mat üng leng la tum mah mah u ngüshe kboh phyung kboop lü am jah nglaam püi u kti. ‘Kyah ng'äi kah nih msuh u üng phi am jah kyah lopüi u kti’ tilü ah nih pyen u. 18 I lüni ti ta Patiso Johaan ah lo üng ei jeih lü ngbom tui phi am o-laang. Ah nih nih-e noh ta ‘Ah nih hin kho yaaia vaan naak ni’ tilü ah nih pyen ei u. 19 Kei Kkhyaang Sa kah lo üng ta aeia phi kah ei kti. Aooka phi kah ok kti. Kkhyaang naküt noh ta ‘Ahina kkhyaang hin bük ma ua. Ei o kolaih kti. Ktaai ktum ni. Khoon to k'hlooke jah mkhye mshoh ktie üng ngpüi kti ni’ tilü ah nih nah pyen ei u. Lüphi Pangsiima theem naak sun ah poh mshah üng ngshing ngte lok kti ni” tilü ah jah mtheh.

20 Kona mün sam kshe jah ngshing ngte naak ah poh mshah naak bok mlüh jah pi ngnama kae am ah nih vuuk be ua phäh ah jah him. 21 “Kora Sing mlüh mah-eo, khui kha kshe nu nah nih shoong ei kkhaie ni. Pet Shai Tah mlüh mah-eo, khui kha kshe nu nah nih shoong ei kkhaie ni. I lüni ti ta nang nih-e üng kah nih poh mshah mün sam kshe jah ngshing ngte naake sän Türah jah Shiton mlüh-a kah nih poh vai shüa athoon ta ah nih nih-e ahlaan nu üng ba vuuk be vai u-shü. Ah nih mkhyea phäh ah nih puk ksheeta ngshing ngte naaka kphih jih shui shalü mtap mput üng ba ngshut vai u-shü. 22 Pangsiima mkhyah mtaanga mhnüüp üng ta Türah jah Shiton mlüh-a kthaka phi kshe hleen ktia mtaam ning jah pek kkhai ati sun kah ning jah mtheh kti ni. 23 Kapanom mlüh pi ngnam mah-eo, kkhaan kho säpa Pangsiim noh ning mhlün mtaai kkhaiea nah nih ngngaih u mä. Am ni. Mo Pi khoa ning jah pha shak kkhai ni. I lüni ti ta nang nih-ea veeia kah poh mshah-a mün sam kshe hin Sotom mlüh-a kah poh vai shüa athoon üng Sotom mlüh tuh vei säpa veham kkhai shü. 24 Kah ning jah mtheh kkhai. Pangsiima mkhyah mtaanga mhnüüp üng ta Sotom mlüh-a kthaka kshe hleen ktia mtaam ning jah pek kkhai” ah ti.

25 Asuna ksüün üng Booi Jeishüh noh “Kah Pao, kkhaan kho jah kho mdeka Booi Pao, kah ning je ei pi pi ni. I lüni ti ta nang Pangsiima mkhüh ktüüm sun angvaaie jah aktheeme noh käh ah nih kshing vaia nah thuh ni. Lüphi hnashenea kba velü am theem ktie üng ta nah jah ngshing ngte shak ni. 26 Ä, kah Pao, ahin nanga hlü eia thoon kti ni” tilü tä sham kti. 27 “Kah Pa Pangsiim noh akve naküt kah kut k'uma ah nah ap pääng ni. Ah sa kpa sun u noh am kshing kyo. Ah pa mat däk noh ta ah sa kpa sun aksanga kshing kti. Asun kba ni ah Pa sun phi u noh am kshing kyo. Ah sa kpa mat däk jah ah sa kpa noh ah jah kshing hlü shak hlüe noh ni aksanga ah nih kshin u. 28 Ngnoi ngsai pyang ma ktie, kah veeia lo-ua. Kah ning jah ngxü ngkou ei shak kkhai ni. 29 Nih phüüi kkot yüm vai u. Kah kkoh nglong nah kphyeen püi ua. Kei nah hju tuih ua. I lüni ti ta hnip hnooi ngüshe mlung kah mhneem kti ni. Asun üng diim deih naak nah nih yah kkhaie. 30 Keia kkoh nglong hin am jah mshou ei. Kah phüih phi am yüh nu” tilü ah jah mtheh.