20
(Mate 21.23-27; Marküh 11.27-33)
1 Mhnüüp mat üng ta hjok khah im nua Booi Jeishüh noh kkhyaange jah msuuk mtheh lü thang kdo kkya kpyaü kti. Asun üng khotu ngsiim kdäme, Sangsiim ktheeme jah khong mange ah veeia lok ktie.
2 Asune noh Booi Jeishüh üng “Jah mtheh-a. U a hmaai üng ahin kba nah poh ni. U noh ah ning xüh laang ni” tilü ah nih kthäh u.
3-4 Booi Jeishüh noh ta “Kei noh phi i mä kah ning jah kthäh ma kkhai. Johaan sän patiso jah pek kkhaia Pangsiima tüih lo mä. Kkhyaanga tüih lo mä. Nah mtheh ua” tilü ah jah kthäh.
5 Asune noh mat jah mat ngthäh ngkhyah ulü “‘Pangsiima tüih lo ni’ nih ti u ta ‘Asun kba ani ta a i a am nah nih jum ei ktie ni’ tihlük kba.
6 ‘Kkhyaangea tüih lo ni’ nih ti u ta kkhyaang abäng noh lung üng jah khoong hlütong kbak u. I a thoon lüni ti ta Johaan sun shahma ngsiim ksang ni atia ah nih jum ei u ni” tilü ngsi ngjaang ktie.
7 Asun üng ta “Am kshing u ngü” tilü Booi Jeishüh ah nih mshak be u.
8 Booi Jeishüh noh “Asun kba ani ta ahine hin u a hmaai üng kah poh atia kei noh phi am ning mtheh u ngü” tilü ah jah mtheh be.
(Mate 21.33-46; Marküh 12.1-12)
9 Booi Jeishüh noh kkhyaange sun pum üng msäp lü ah jah mtheh. “Kkhyaang mat noh ngbom dung nglin lü ngvoong poh kti. Kona kkhyaange üng jah kkhah lü kho vei pa khyük kkhaia pe ksea sit kti.
10 Ahmin lo ksüüna ta ngvoong mah noh ah xüh shoh mat sun ah jah kkhah-ea veei tüih lü ngbom tui akhäk ah laak ei vaai shak. Lüphi ah kkhah-e noh ta ah xüh shoh sun i phi käh pelü ah nih kshät be u.
11 Ah xüh shoh akse mat ah nih veeia ah tüih be tü. Asun phi te lü hmaai msheet lü i phi käh pe-laang lü ah nih kshät be u.
12 Akthum naaka ngvoong mah noh ah xüh shoh akse mat ah tüih be tü. Asun phi nghma pyei ktia te ulü ah nih mshot u.
13 Ngbom ngvoong mah noh ta ‘I hok kba kah poh vai ni. Kah mhlä kphya naak kah sa kpa hin kah tüih kkhai. Ahin ta asune noh lei shong kkhaie ni’ tilü ah pät noh ah pyen ei mjoh.
14 Ngvoong ngvat ei ktie noh ta ah sa kpa sun ah nih hmuh üng ‘Ahin ta khang ka nak kkhai khoh kbi ni. Ngpyaih xat ua. Nih hnim vai u. Asun üng ah khoh nih yah ei kkhaie ni’ tilü ngthäh ngkhyah mjoh ktie.
15 Ngvoong mah-a sa sun ngvoong thea kaih lü ah nih hnim mjoh u. Asun üng ngvoong mah noh ngvat ei ktie sun i hok kba jah poh kkhai ni.
16 Ah nih noh sit lü ngvoong ngvat ei ktie jah hnim päih kkhai. Kona kkhyaang kse-e üng jah kkhah-in kkhai ni” tilü Booi Jeishüh noh ah pyen.
Kkhyaange noh asun ah nih ngjaak üng “Asun kba käh thoon kkei suih u-she” ah nih ti u.
17 Booi Jeishüh noh asune jah bük lü ah nih nih üng “Sangsiim üng i hok kba ng'yuk kti ja. ‘Ut im kshae noh käh hlü ei lü ah nih hoih ma ua lung sun akpäih naaka ta im ngkhääng na-bok ktia lunga thoon lobe kti ni’ tilü vek kti ni.
18 Asuna lung üng ngshuk ei kti ta lunga kkhaan su kyulü byen-in kti. Asuna lung sun mat mata kkhaana ah kyaak ta ah nih sun anghnüüia ve-in kkhai ni” tilü ah jah mtheh.
(Mate 22.15-22; Marküh 12.13-17)
19 Booi Jeishüh noh ah nih nih-e jah büün lü pum üng msäp lä ah pyen sun Sangsiim ktheeme jah khotu ngsiim kdäme noh kshing ei ulü Booi Jeishüh sun ahunata man vaia ah nih ktha naak kyo u. Lüphi kkhyaang pä ah nih jah kyüh.
20 Asuna thoon lü ah nih büh kyet u. Booi Jeishüh-a veei sit lü ah jah msuh mtheh sun kshing hlük ktia hana ngsom kkhaia kkhyaange ngui pelü ah nih jah tüih. Booi Jeishüh noh i mä ah pyen mkhye üng ah nih man naak vaia mkot shui ktie. Asune noh Booi Jeishüh sun aso-yah booia mkha kkea phalü mtaam khaam ei kkhaia ah nih ap hlü pyei u.
21 Ah nih jah tüih-e noh “Anghläia aksang nah pyen kti atia kah ning kshing ktie ni. Kkhyaanga hmaai büh naak am ve. Pangsiima thuuma kba aksanga nah jah mthei kti ni.
22 Kesha shang phuhlang üng booi khoon ngui peet vai Pangsiima thuum üng ngkäih kti mä” tilü ah nih kthäh tuhan u.
23 Booi Jeishüh noh ta ah nih lim ma sun ah jah kshing ei.
24 Asune üng “Ngui tangka mat nah mhnüh lo-ua. Ahin üng ka hin u a lup ni. U a ngming ni” tilü ah jah kthäh. Asune noh “Kesha shang phuhlang ni” ah nih ti u.
25 Booi Jeishüh noh “Kesha shang phuhlang üng shääng kti ta Kesha shang phuhlang üng pe-ua. Pangsiim üng shääng kti ta Pangsiim üng pe-ua” tilü ah jah mtheh.
26 Asune noh kkhyaangea ma-a ah pyen kshake üng khye lok kti am hmu-u. Ah jah mshak be sun üng mün nalü msik phi am ti u.
(Mate 22.23-33; Marküh 12.18-27)
27 Asun üng thih kona xün be am ve atia jum ei kti Satüke-e sun Booi Jeishüh-a veei lo-ulü ah nih kthäh kkhyah u.
28 Asune noh “Angvaaio, ‘Mat mata be be noh sa na käh khyüi sho ham lü ah kkhyu thih tak kkhai. Ah na noh ah bea mshuui käh dut kkhaia asuna hmeei nu shääm be lü ah be bea phäh hnashen phi jah khyüi sho nih she’ tilü Moshei noh Sangsiim üng ah jah yuk hüt peet.
29 Ngbe ngna kkhyüh ve mjoh ktie. Ah nih be kdäm noh ah kkhyu la-ma lü sa na käh khyüi sho ham nih lü thi-be kti.
30-31 Asuna kke üng ka noh ah po sun ah shääm be kyo. Ah nih phi sa na käh khyüi sho ham lü thi-be tü mjoh kti. Asuna kke be tü üng ka phi asun kba thoon kti. Asun kba su ah nih kkhyüh bäng noh asuna nghnu mi üng hnashen am ta-hüt u.
32 Hnua ta nghnu mi sun phi thik kti.
33 Thih naaka kkhyüh thoh be üng asuna nghnu mi u a kkhyua thoon kkhai ni. Kho mdeka ta ah nih sun ngbe ngna kkhyüh-a kkhyua thoon kti ta” tilü ah nih pyen tuhan u.
34 Booi Jeishüh noh “Hina kho mdeka kkhyaang sae noh ah nih kkhyu la-ei ktie. Ah nih sa nghnu phi jah pe-ei ktie.
35 Lüphi thih naaka kkhyüh thou be lü Pangsiima pe üng vaang ngkäih ktie ta am ngkhyu ngla ti u.
36 Kkhaan kho ngshäa kba ve-ulü am thi-ti u. Ah nih nih-e sun thih naaka kkhyüh ah jah thoh shak bea thoon lü Pangsiima sa nae ni.
37 Thipääng ktie Pangsiim noh jah mthou be kti ati sun Mosheia yuk Sangsiim noh phi ngshing ngte shak kti. Moshei noh nghling kpyüüma Pangsiim ah hmuh üng Booi Pa üng ‘Apyahama Pangsiim, Isaka Pangsiim, Jakopa Pangsiim’ tilü ngshui kti ni.
38 Pangsiim hin akthiea Pangsiim am ni. I lüni ti ta abäng sun ah nih-a phäh-a xüng ktie ni” tilü ah jah mtheh.
39 Sangsiim ktheem akhäk noh “Angvaaio, nah pyen hin aksang ni” ah nih ti u.
40 Asun üng ta ah nih nih-e noh am kthäh kkhyah dat ti u.
(Mate 22.41-46; Marküh 12.35-37)
41 Booi Jeishüh noh kkhyaange üng “‘Khrito hin shang phuhlang Davita tu kpa ni’ tilü ihok kba ah nih jah mtheh khoh vai u ni.
42-43 Shalaan ng'äi sa up üng shang phuhlang Davit noh,
‘Pangsiim Booi Pa noh kah Booi Pa üng “Nah kho pha kkea nah ye-e kah jah taak säpa kah kkheet lam da ngshut ei ma” tilü ah pyen ni.’
44 Asun kba ani ta Davit noh Khrito üng ‘Kah Booi Pa’ am ti shü. Asun kba ta Khrito hin Davita tu kpa-a ihok kba thoon thei kkhai ja” tilü ah pyen.
(Mate 23.1-36; Marküh 12.38-40)
45-46 Kkhyaang pä abänga ngjaak päih vaia Booi Jeishüh noh akläke üng “Sangsiim ktheeme mseei lü jah mphen ei ua. Akkyu nua shui shalü sit hü hlük ktie. Sangsiim ngthei naak kyonga akdo bok ngshut naak üng ngshut hlük ktie. Pooi ima booia ei naak üng ei hlük ktie ni.
47 Hmeei nuea im lou khoh hat naküt jah mhleei mhlak lü ah nih jah loh ei peet. Käh apou vaia ah nih msih naaka kho vei pa tä sham tuhan ktie. Asune sun Pangsiim noh kshehleen bok ktia mtaam jah pek kkhai ni” tilü ah pyen.