21
(Marküh 12.41-44)
1 Booi Jeishüh noh va mdei lüta booi ei ktie noh khoh pe-ulü ngui bung üng ah nih xon u ah hmuh.
2 Kona hmeei nu mpyeen kshe mat noh ta mpyüm thek mata phu tangka nghngih ah xon lo sun Booi Jeishüh noh ah hmuh.
3 Booi Jeishüh noh “Ngngaai ua. Kei kah pyen ma kkhai ni. Hina hmeei nu mpyeen kshea xon lo ta kkhyaang abängea peeta kthaka Pangsiima hmuh-a nung bok kti ni.
4 I a thoon lüni ti ta booie noh ta ah nih taak ei kho hah pa üng ka ah nih xon lo sa u ni. Hmeei nu mpyeen kshe noh ta mpyeen shemah mah lü ah ei hlü mhlä ah taak ei naküt ah xon lo päih ni” tilü ah jah mtheh.
(Mate 24.1-2; Marküh 13.1-2)
5 Kkhyaang akhäk noh hjok khah im nu sun ngtou kti lung kdoe üng ngsha-ei lü khoh ah nih peet üng phi ah nih piit pyaang be ua mong ah nih pyen u.
6 Booi Jeishüh noh ta “Tuh-a nah nih hmuh ngtou ngtaai kti im nu hin mhnüüp mat üng ta lung mata kkhaana mat käh ngtaih ti kti onga sim pyak päih kkhai ni” tilü ah pyen.
(Mate 24.3-14; Marküh 13.3-13)
7 Asune noh Booi Jeishüh üng “Angvaaio, asun bange i tüh-a thoon lok kkhai ni. Asuna thoon lo hnüh vai üng i hok kba ngshing ngte velok kkhai ni” tilü ah nih kthäh u.
8 Booi Jeishüh noh “U noh phi lam käh ah ning jah hmü shak vaia mseei ei ubä. ‘Kei Khrito ni. Aksüün suum lohnüh kti’ tilü keia ngming ngming nalü kho hah pou lok kkhaie ni. Asune käh jah läk ubä.
9 Ngshun ulü, üng-phou ulü nah nih ngjaak üng käh sääi ubä. Asun bange thoon loma yah kkhaie ni. Lüphi akpäih naaka mhnüüp ta ahunata am pha-ham.
10 Kkhyaang mjü mat jah mat ngtuk kkhai xooi. Teng pe mat jah mat ngtuk kkhai xooi ni.
11 Teng pe naküta ngkhyü ngshüün kshe kkhai ni. Kho jo kkhai ni. Kyok nu mneh kshe vek kkhai ni. Kyüh shepyei ktia athoon ve jah kkhaan khoa ngshing ngte naake ampyü kshe nah nih jah hmuk kkhaie ni.
12 Lüphi asun kba athoon ve hlaana kkhyaange noh ning man ulü ning mkhuh mhlih kkhaie. Sangsiim ngthei naak kyonga ning kaih ulü khup üng ning khyum kkhaie ni. Keia hmaaia phäh shang phuhlange jah aso-yah booiea ma-a nah nih ngdüüi yah kkhaie.
13 Asun üng ta nang nih-e noh keia mong nah nih shak shi naaka ksüüna thoon kkhai ni.
14 ‘I hok kba jah mshak be vai atia’ käh nah nih sääi sing vaia nah nih mlung üng anamkhyah ei ua.
15 I lüni ti ta nah nih ye-e noh käh ning kpet käh ning mshak be khoh ktiea pyen naak theia theem naak kei noh kah nih ning pek kkhai.
16 Nah nih nu pa be nae jah nah nih mjü mjoonge jah nah nih looi püie hngoh noh phi nang nih-e ning ap kkhaie. Akhäk ning jah hnim kkhaie ni.
17 Kah hmaaia phäh kkhyaang naküt noh ning sok ei kkhaie.
18 Lüphi nah nih lu sham thek mat hngoh phi am khyük yah.
19 Akpäih naak säpa kkhyü shing lü nah nih ve u ta xün naak ksang nah nih yah kkhaie ni.
(Mate 24.15-21; Marküh 13.14-19)
20 Ngtuk kpoh ye pä nue noh Jeirüh Shalem mlüh ah nih vai kyet nah nih hmuh lo u üng ta Jeirüh Shalem mlüh sim pyak lohnüh kkhai atia kshing ei ubä.
21 Asun üng ta Jüdah hne üng ka kkhyaange msuung da sen ei yah kkhaie. Mlüh k'uma vek kti kkhyaang naküt mlüh thea dong ei yah kkhaie. Mlüh-a kho kpunga vek kti kkhyaange mlüh k'uma käh vaang yah kkhaie.
22 I lüni ti ta asun Pangsiima mtaam jah peeta ksüüna kyak kti ni. Shahma ngsiim noh Sangsiim üng ah nayuka kba thoon velo päih kkhai ni.
23 Asuna mhnüüp üng ayünga am vek ktie jah na hmi sih tu ktie ta jah mpyeen ei she pi pi kti ni. I a thoon lüni ti ta Isare teng pe üng khui kha kshe nu velok kkhai. Pangsiim noh Isare kkhyaang mjüe üng mtaam jah pek kkhai ni.
24 Kkhyaang akhäk ngtuk naak üng thik kkhaie. Akhäk ta ngxünga jah man lü teng pe naküta jah seh püi kkhaie. Pangsiim noh ah mkhyah vei kkhyaang mjü kse-e noh Jeirüh Shalem mlüh sun abänga ksi päih kkhaie.
(Mate 24.29-31; Marküh 13.24-27)
25 Kho mik, mah khya, aai shie üng ngshing ngte naak velok kkhai. Mpang lai tui kthou ngkhupa kthai jah tuia däm lo pyeia phäh kho mdek naküt üng kkhyaang abäng sääi siing pyang ma kkhaie ni.
26 Hina kho mdeka thoon velok kkhai khui kha kshe nue sun kkhyaange noh anadang ei yah ulü kyüh ei tong lü thi-khyäü kkhaie. I lüni ti ta kkhaan kho phi ngshüün pyei kkhai ni.
27 Asun kona kei Kkhyaang Sa sun hiit jah däm duh kti hlüng taai naak üng kho ngmei üng kah lo sun kkhyaange noh nah hmuk kkhaie ni.
28 Asun bange sun sut ei lü athoon lo üng hälä lü jäng mdei lo-ubä. I lüni ti ta nah nih phäh-a thoong khyah naak säh hnüh kti ni” tilü ah pyen.
(Mate 24.32-35; Marküh 13.28-31)
29 Asun üng Booi Jeishüh noh pum üng msäp lü kkhyaange üng “Kthei dung jah thing dunge abäng jah bük ua.
30 Asuna dungea hnah hlip ah toot lo üng kho khye lohnüh kkhai atia nah nih pät noh phi nah nih hmat ei ktie.
31 Asuna kba ni tuh-a kei noh kah pyene hin athoon ve lo nah nih hmuh üng ta Pangsiim noh ah upa pe pyaang hnüh kkhai atia kshing ei ubä.
32 Ngngaai ua, kei kah pyen ma kkhai ni. Asune naküta thoon ve hlaana tuh kha üng ka kkhyaange hin am khyük khoh laang u.
33 Kkhaan kho jah kho mdek khyük nih lüphi kah kkhyü am theih laang.
34 Nah nih pät noh nah nih pät mseei ei ubä. Am ani ta vä vang lüni ju mpyüi lüni kho mdeka ve soh vai sääi siing naak däk kking nah nih mlunga vek kkhai ni. Asun kba nah nih ve ei u ta ahunata ngkhap kti mhliin üng kphyu kkha ah ng'oh-a kba kah pha lo be vaia mhnüüp sun nang nih-ea phäh thoon kkhai ni.
35 Asuna mhnüüp sun hina kho mdek kkhaana vek kti kkhyaang sa naküt noh ahunata hmu-ei yah kkhaie ni.
36 Asuna thoon lü aläa yüng lü tä sham ua. Asun üng va nang nih-e sun thoon velok kkhai naküt üng phyong naak vai ngjung ktha velü kei Kkhyaang Sa-a ma-a nah nih ngdüüi kkhaie” tilü ah jah mtheh.
37 Booi Jeishüh noh hjok khah im nua amhnüüp tä kkhyaange jah msuuk mtheh kti. Mthana ta mlüh kho kpung Kshi Dung msuunga sit lü ip vaai kti.
38 Ngooi lam nua kkhyaang naküt sun ah pyen kshak ngngaai kkhaia hjok khah im nua ah veei su lok ktie.