19
1 Kona Booi Jeishüh sun Jeirih Kho mlüh-a phi vaang pah lü sit kti.
2 Asua Shake ngming nak kti khoon to k'hlookea khong mat vek kti. Ah nih sun booi ei pyei kti.
3 Booi Jeishüh sun i a mäi atia hmuhlü pyei kti. Lüphi Booi Jeishüh-a hlonga kkhyaang ah nih nung pyeia phäh jah Shake sun ah düng atooia phäh-a Booi Jeishüh sun am hmu-yah ngtu.
4 Asun üng ah nih noh Booi Jeishüh-a lo naak vai lam su ah nadong lü Booi Jeishüh tou kkhaia thing pama kaai kti.
5 Booi Jeishüh noh asuna thing phung ah pha lo üng hei tou lü Shake üng “Shakeo, angshenga kum loa. Tuh ngooi nah ima kah kaai kkhai ni” tilü ah pyen.
6 Asun üng Shake sun thing pama kkhyüh angshenga kyum lobe lü je kyai xe xok naak üng dou daang lü Booi Jeishüh sun ah ima ah kkhin naak.
7 Kkhyaange noh asun ah nih hmuh u üng “Asan san mkhye mshoh ktia ima kaai kti ni” tilü ah nih mship mhjop ei u.
8 Shake noh ta ngdüüi lü Booi Jeishüh üng “Booi Pao, nah ngngaai ma. Kah khoh hat naküt üng ka ateh teh ampyeen kshe üng kah jah yet vai ni. Amdanga ah nih ngui kah loh ei phi asuna kkhyaange üng kah loh ei kän käna kphyü kah jah thung be kkhai ni” tilü ah mtheh.
9 Booi Jeishüh noh ah nih üng “Tuh ngooi ahina kkhyaang noh kuum kyan naak yah kti ni. I a thoon lüni ti ta ahina kkhyaang phi Apyahama tu kpa ni.
10 Kei Kkhyaang Sa noh ta khyük kti naküt jah shui be lü jah kuum kyan kkhaia kah lok kti ni” tilü ah mtheh.
(Mate 25.14-30)
11 Kkhyaange noh Booi Jeishüh-a pyene sun ah nih su ngngaih k'um üng mhläi lü pum üng msäp lü ah jah mtheh. I lüni ti ta Booi Jeishüh sun Jeirüh Shalem mlüh üng säh lohnüh kti. Asuna thoon lü Booi Jeishüh noh tuh kuung hi Pangsiima upa pe tüüi pyaang hnüh kkhaia kkhyaange noh ah nih ngngaih u.
12 Booi Jeishüh noh “Ah pa kkhui mah mat sun shang phuhlanga ah nih msoon vaia thuuk pyei kti kdunga sit ma yah kti.
13 Ah kdung seh hlaana ah xüh shoh-e üng ka kkhyaang xa ah jah khü. Ah nih noh xüi tangka mat üng mat siim asune üng jah pelü ‘Kah pha lo be vei ahin üng kun pan poh ua’ tilü ah jah mtheh mjoh.
14 Lüphi ah up vaia pe üng ka kkhyaange noh ah nih sun käh hmuhlü ulü ah hnua ngshäe ah nih jah tüih u. Ngshäe sun noh ‘Ahina kkhyaanga jah up vai am hlü ei u ngü’ tilü ah nih pyen vaai vaia ah nih jah sük mjoh u.
15 Ah pa kkhui mah sun shang phuhlanga ah thoon kona ah pea ah pha lo be üng xüi tangka ah jah peeta xüh shoh-e sun ah jah khü shak. Asune noh xün sun üng i kän siima nung mja shak ktie ati sun ah nih noh kshing hlük kti.
16 Ak'hma lo xüh shoh mat noh ‘Booi Pao, xüi tangka mat nah nah peet hüt üng tangka xa kah yah ei ni’ tilü ah pyen mjoh.
17 Ah mah pa noh ‘Do kti ni. Nang hin xüh shoh kphyet ni. Nang hin api sa üng üm naak vaia nah thoona phäh nah up vai mlüh xa kah ning pek kkhai’ tilü ah mtheh mjoh.
18 Anghngih naaka xüh shoh mat lolü ‘Booi Pao, xüi tangka mat nah nah peet hüt üng tangka mhma kah yah ei ni’ tilü ah pyen mjoh.
19 Ah mah pa noh ‘Nah up vai mlüh mhma kah ning pek kkhai’ tilü ah mtheh mjoh.
20 Akthum naaka xüh shoh mat sun lobe tü lü ‘Booi Pao, nah xüi tangka mat sän hin ta. Jih üng hloop lü kah süm kyet ni.
21 I a thoon lüni ti ta kah ning kyüh. Nang angbe kshe ni. Nang noh ajüa nah lou ei hlük kti. Am nah nglin sho xa saang nah aat ei hlük kti’ tilü ah pyen mjoh.
22 Ah mah pa noh ta ‘Nang hin i a am kyah kti xüh shoh ni. Nah mpyong üng lut lok ktia kba mtaam kah ning pek kkhai. Kei angbe kshe, ajüa kah lou ei hlük kti, am kah nglin sho xa saang ajüa kah aat ei hlük kti ati sun nang noh nah kshing mjoh kti bä.
23 Asun kba ani ta kah ning peet xüi tangka sän ngui msoon mtaai naak luuma i lü am nah taak vaai ni. Asun kba nah poh-a ta tangka hin asa mah mah-a kah yah ei be vai shü’ tilü ah pyen mjoh.
24 Asun üng ah mah pa noh ah nih hlonga ngdüüi kti xüh shoh-e üng ‘Xüi tangka sän ah veeia lou vaai be lü xüi tangka xa tak kti üng pe-vaai ua’ tilü ah jah mtheh.
25 Asune noh ta ‘Booi Pao, ah nih noh xüi tangka xa ta-ei kti ni’ tilü ah nih pyen be mjoh.
26 Asun üng ah nih mah pa shang phuhlang noh ‘Ngngaai ua, kei kah pyen ma kkhai. Ta-ei kti noh yah ei ham kkhai ni. Am ta-ei kti noh ta akve sa phi shum na-ham kkhai ni.
27 Kah up vai am hlü ei kti kah ye-e ta tuh hi jah lo püi lü kah ma-a jah hnim ua’ ah ti mjoh” tilü Booi Jeishüh noh ah jah mtheh.
(Mate 21.1-11; Marküh 11.1-11; Johaan 12.12-19)
28 Booi Jeishüh noh asun kba ah pyen kona hma vaai lü Jeirüh Shalem mlüh da kaai kti.
29 Booi Jeishüh sun Kshi Dung msuung kpema vek kti Pet Phakei ngnam jah Pet Tanih ngnam xooi üng ah säh lo üng ta akläk nghngih ah jah tüih ma.
30 Akläk xooia joon hlaana Booi Jeishüh noh ah nih nih üng “Nah nih ngdanga ka saye da ngnama sit nih-a. Asuna ngnama nah nih vaan vaai jah u noh phi am ah ngsum naak ham ngkhun ei kti she la sa nah nih hmuvaai kkhai ni. Asun shuut lü ahia lo nih bä.
31 ‘I vai nah nih shuut kti ni’ tilü mat mat noh ah nih ning kthäh ta ‘Booi Pa noh hlü ei kti ni’ tilü pyen be nih bä” tilü ah jah sük.
32 Booi Jeishüh-a jah tüih xooi sun sit nih lüta Booi Jeishüh-a pyena kba kuunga ah nih hmuh vaai.
33 Asun xooi noh she la sa ah nih shuh üng ta ka mah noh “I vai nah nih shuut kkheve ja” tilü ah jah kthäh.
34 “Booi Pa noh hina she la sa hlü ei kti ni” ah nih ti be.
35 She la sa sun Booi Jeishüh-a veei ah nih kpha lo. She la-a mting lua ah nih jih phah peet nih lü Booi Jeishüh ah nih ngsum shak.
36 Booi Jeishüh noh she la sun ngsum lü ah lo naak lama kkhyaange noh ah nih jih ah nih jah phah u.
37 Booi Jeishüh sun Kshi Dung msuung jua kyalü Jeirüh Shalem mlüh-a ah säh lo hnüh üng akläk pä abäng noh je kyai xe xok nalü akthai kdäma Pangsiim mküüi mtou ktie. I lüni ti ta Booi Jeishüh noh ah poh mün sam kshe-e ah nih jah hmuh u ni.
38 Asune noh “Pangsiima tüih lo shang phuhlang hin do kya naak vek kti. Kkhaan kho pea diim deih naak veshe. Ak'hlüng ngtaai bok Pangsiima jou taai nih mküüi mtou vai u” tilü ngpyaang ktie.
39 Lüphi asuna kkhyaang pä üng ka Pharishe akhäk noh Booi Jeishüh üng “Angvaaio, nanga akläke hin üng asun kba käh ah nih ng'yün vaia jah hima” tilü ah nih mtheh u.
40 Booi Jeishüh noh ta “Kah ning jah mtheh kkhai. Ah nih nih-e angima ah nih ve u ta lunge hin va ngpyaang ngpyet lok kkhaie” tilü ah pyen.
41 Booi Jeishüh sun Jeirüh Shalem mlüh üng säh säh lolü mlüh nu sun ah hei hmuh üng ah kphyü tui bolok kti.
42 Booi Jeishüh noh “Jeirüh Shalem mlüh üng kaeo, Pangsiim üng ng'ye be vaia i hlü kti atia tuh ngooi nah nih kshinga ta do pi pi kkhai kyo. Lüphi asun bange sun käh nah nih hmuh yah vaia Pangsiim noh ah thup ni.
43 I a thoon lüni ti ta nah nih ye-e phalo-ulü mlüh ling leng abäng üng shung naak pyaang kkhaie. Ning vai kyet ulü käh nah nih va-joong khoh ktia ning kham kyet kkhaie ni.
44 Asune noh nah nih mlüh abänga ksim kpyak lü nah nih päte jah nah nih sa nae abäng jah hnim kkhaie. Nah nih im shak naak lung mata kkhaana mat hngoh phi käh ngtaih ti laang ktia sim pyak kkhai ni. I lüni ti ta Pangsiim noh kuum kyan naak ah ning jah peet hlüa ksüün üng nah nih not ua phäh ni” tilü ah pyen.
(Mate 21.12-17; Marküh 11.15-19; Johaan 2.13-22)
45 Booi Jeishüh sun hjok khah im nu ngvoonga lut kti. Asua jooi tuk ktie kho kpunga ah jah mshot.
46 Booi Jeishüh noh asune üng “Sangsiim üng ‘Kah im hin hjok khah naak vai ima thoon kkhai’ tilü ng'yuk hüt kti ni. Nang nih-e noh ta mpyuk ei ngsüm naak ima nah nih poh ei u” tilü ah jah mtheh.
47 Booi Jeishüh noh amhnüüp tä lü hjok khah im nua kkhyaange jah msuuk mtheh kti. Khotu ngsiim kdäme, Sangsiim ktheeme jah Jüdah khong mange noh Booi Jeishüh sun ah nih hnim naak vaia mkot shui ktie.
48 Lüphi kkhyaang abäng noh Booi Jeishüh-a pyen kshak sun hmu-ngjahlü pyei ulü ta i hok kba phi am poh khoh u.